ആഴ്ച മുഴുവൻ ജോലിത്തിരക്കിൽ മുങ്ങിക്കഴിയുന്നവർക്ക് വാരാന്ത്യം ലഭിക്കുന്നത് വിശ്രമിക്കാനുള്ള അവസരമായാണ്. വാരാന്ത്യം മുഴുവൻ ഉറങ്ങിയും ഫോണിൽ സമയം ചെലവഴിച്ചും വീട്ടുജോലികൾ ചെയ്തും തീർക്കുന്നതിനു പകരം, ശരീരത്തിനും മനസിനും വിശ്രമം നൽകുന്നതിനൊപ്പം അടുത്ത ആഴ്ചയെ കൂടുതൽ കാര്യക്ഷമമാക്കാനും ഉപയോഗിക്കാം..വാരാന്ത്യത്തിലും ഇ-മെയിലും ഫോൺകോളുകളും ഓഫീസ് സന്ദേശങ്ങളും പരിശോധിച്ചുകൊണ്ടിരുന്നാൽ ശരിയായ വിശ്രമം ലഭിക്കണമെന്നില്ല. അതിനാൽ സാധിക്കുന്നവർ വെള്ളിയാഴ്ച വൈകുന്നേരം മുതൽ തിങ്കളാഴ്ച രാവിലെ വരെ ജോലിയുമായി ബന്ധപ്പെട്ട കാര്യങ്ങളിൽ നിന്ന് മാറിനിൽക്കാൻ ശ്രമിക്കാം..പൂർണമായും ജോലിയിൽ നിന്ന് വിട്ടുനിൽക്കാൻ കഴിയാത്തവർക്ക് ശനി, ഞായർ ദിവസങ്ങളിൽ ഒരു നിശ്ചിത സമയത്ത് മാത്രം ഇ-മെയിലുകളും സന്ദേശങ്ങളും പരിശോധിക്കാം. ഇങ്ങനെ ചെയ്യുന്നത് ജോലിയുമായി പൂർണമായി വിച്ഛേദിക്കാതെ തന്നെ വിശ്രമിക്കാൻ സഹായിക്കും..വാരാന്ത്യം മുഴുവൻ വീട്ടുജോലികൾക്കായി മാറ്റിവച്ചാൽ വിശ്രമിക്കാനുള്ള സമയം തന്നെ ഇല്ലാതാകും. അതുകൊണ്ട് വീട്ടുജോലികൾക്കും കൃത്യമായ സമയം നിശ്ചയിക്കാം. നിശ്ചയിച്ച സമയത്തിനുള്ളിൽ പൂർത്തിയാക്കാൻ കഴിയാത്ത ജോലികൾ അടുത്ത ദിവസത്തേക്കോ അടുത്ത വാരാന്ത്യത്തിലേക്കോ മാറ്റിവയ്ക്കുന്നതാണ് നല്ലത്..ജോലിത്തിരക്കിനിടെ വ്യായാമം ചെയ്യാൻ കഴിയാത്തവർക്ക് വാരാന്ത്യം അതിനായി ഉപയോഗിക്കാം. ഓട്ടം, സൈക്ലിങ്, നടത്തം, പൂന്തോട്ടപരിപാലനം തുടങ്ങി ശരീരത്തെ ചലിപ്പിക്കുന്ന ഏത് പ്രവർത്തനവും തിരഞ്ഞെടുക്കാം. ശാരീരിക പ്രവർത്തനങ്ങൾ സമ്മർദം കുറയ്ക്കാനും പുതിയ ആശയങ്ങൾ രൂപപ്പെടാനും സഹായിക്കും..ജോലി മാത്രമല്ല ജീവിതം. വായന, എഴുത്ത്, സംഗീതം, പെയിന്റിങ്, പാചകം, പൂന്തോട്ടപരിപാലനം തുടങ്ങി ഇഷ്ടമുള്ള കാര്യങ്ങൾക്കായി വാരാന്ത്യത്തിൽ സമയം കണ്ടെത്തുന്നതും പ്രധാനമാണ്. സ്വന്തം താൽപര്യങ്ങൾക്കായി സമയം ചെലവഴിക്കുന്നത് സമ്മർദത്തിൽ നിന്ന് മാറിനിൽക്കാനും പുതിയ രീതിയിൽ ചിന്തിക്കാനും സഹായിക്കും..വാരാന്ത്യം കുടുംബത്തിനായും മാറ്റിവയ്ക്കാം. ഒരുമിച്ച് പുറത്തുപോകുക, പാർക്കിൽ സമയം ചെലവഴിക്കുക, മാതാപിതാക്കളെ സന്ദർശിക്കുക തുടങ്ങിയ ചെറിയ കാര്യങ്ങൾ പോലും ബന്ധങ്ങൾ കൂടുതൽ ഊട്ടിയുറപ്പിക്കാൻ സഹായിക്കും..വാരാന്ത്യത്തിൽ വലിയൊരു യാത്ര തന്നെ വേണമെന്നില്ല. പുതിയൊരു സ്ഥലത്തേക്ക് പോകുക, ഒരു പരിപാടിയിൽ പങ്കെടുക്കുക, പ്രകൃതിയിലൂടെ നടക്കുക, ഏറെക്കാലമായി ചെയ്യണമെന്ന് ആഗ്രഹിച്ചിരുന്ന ഒരു കാര്യം പരീക്ഷിക്കുക തുടങ്ങിയ ചെറിയ ‘മൈക്രോ അഡ്വഞ്ചറുകൾ’ ആസൂത്രണം ചെയ്യാം..വാരാന്ത്യം ആയതിനാൽ പതിവിലും ഏറെ വൈകി ഉണരുന്നത് സ്വാഭാവികമായി തോന്നാം. എന്നാൽ എല്ലാ ദിവസവും ഉണരുന്ന സമയത്തിൽ വലിയ വ്യത്യാസം വരുന്നത് ശരീരത്തിന്റെ സ്വാഭാവിക ഉറക്ക-ഉണർവ് ചക്രത്തെ ബാധിക്കാം. കൂടുതൽ ഉറക്കം ആവശ്യമുണ്ടെങ്കിൽ രാത്രി കുറച്ച് നേരത്തെ കിടക്കുന്നതാണ് മറ്റൊരു മാർഗം..വാരാന്ത്യത്തിലെ രാവിലകൾ ‘മീ ടൈം’ ആയി മാറ്റിവയ്ക്കുന്നതും നല്ലൊരു ശീലമാണ്. വായന, വ്യായാമം, ധ്യാനം, എഴുത്ത് തുടങ്ങിയ കാര്യങ്ങൾക്കായി ഈ സമയം ഉപയോഗിക്കാം. ദിവസത്തിന്റെ തുടക്കത്തിൽ തന്നെ മനസിന് ഇഷ്ടമുള്ള കാര്യങ്ങൾ ചെയ്യുന്നത് ഉന്മേഷത്തോടെ ദിവസം ആരംഭിക്കാൻ സഹായിക്കും..വാരാന്ത്യത്തെ പൂർണമായും ‘പ്രൊഡക്ടീവ്’ ആക്കണമെന്ന നിർബന്ധവും വേണ്ട. വിശ്രമം തന്നെയാണ് അതിന്റെ പ്രധാന ലക്ഷ്യം. ജോലി, വീട്ടുജോലി, വ്യായാമം, കുടുംബം, സ്വന്തം താൽപര്യങ്ങൾ, അടുത്ത ആഴ്ചയുടെ ആസൂത്രണം എന്നിവയ്ക്കിടയിൽ ശരിയായ ബാലൻസ് കണ്ടെത്തുകയാണ് പ്രധാനം..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
