ജോലിസ്ഥലത്തെ സമ്മർദം എല്ലായ്പ്പോഴും ജോലിയുടെ സ്വഭാവം കൊണ്ടുമാത്രമാകണമെന്നില്ല. ചിലപ്പോൾ മേലുദ്യോഗസ്ഥന്റെ പെരുമാറ്റം തന്നെയാകും ജീവനക്കാരുടെ ആത്മവിശ്വാസത്തെയും ജോലിയോടുള്ള താൽപര്യത്തെയും മാനസിക ക്ഷേമത്തെയും ബാധിക്കുന്നത്..തന്റെ വാക്കുകളും പ്രവൃത്തികളും മറ്റുള്ളവരെ എങ്ങനെ ബാധിക്കുന്നുവെന്ന് തിരിച്ചറിയാത്ത ബോസാണ് പ്രധാന റെഡ് ഫ്ലാഗ്. എപ്പോഴും താൻ ശരിയാണെന്ന് കരുതുകയും മറ്റുള്ളവരുടെ അഭിപ്രായങ്ങളോ ഫീഡ്ബാക്കോ സ്വീകരിക്കാതിരിക്കുകയും ചെയ്യാം. ഒരു നല്ല മാനേജർ ജീവനക്കാരുടെ ബുദ്ധിമുട്ടുകളും അഭിപ്രായങ്ങളും മനസ്സിലാക്കാൻ ശ്രമിക്കും. എന്നാൽ ടോക്സിക് ബോസിന് ജീവനക്കാരുടെ വികാരങ്ങളോടും സാഹചര്യങ്ങളോടും സഹാനുഭൂതി കാണിക്കാൻ ബുദ്ധിമുട്ടുണ്ടാകും..ടീം അംഗങ്ങളുടെ ആശയങ്ങളും നേട്ടങ്ങളും സ്വന്തം പേരിലാക്കുക, മറ്റുള്ളവരുടെ അധ്വാനത്തിന് അർഹമായ അംഗീകാരം നൽകാതിരിക്കുക എന്നിവയും ടോക്സിക് നേതൃത്വത്തിന്റെ ലക്ഷണങ്ങളാണ്. പ്രശ്നമുണ്ടായാൽ അതിന്റെ ഉത്തരവാദിത്തം ഏറ്റെടുക്കുന്നതിനുപകരം മറ്റുള്ളവരെ കുറ്റപ്പെടുത്തുന്നത് മറ്റൊരു പ്രധാന ലക്ഷണമാണ്..ഒരു ദിവസം ഒരു രീതിയിലും അടുത്ത ദിവസം മറ്റൊരു രീതിയിലും പെരുമാറുക, എന്താണ് പ്രതീക്ഷിക്കുന്നതെന്ന് വ്യക്തമായി പറയാതിരിക്കുക, ചില ജീവനക്കാരോട് മാത്രം പ്രത്യേക പരിഗണന നൽകുക തുടങ്ങിയവ ടീമിൽ ആശയക്കുഴപ്പം സൃഷ്ടിക്കും. ഇത്തരം പ്രവചനാതീതമായ പെരുമാറ്റം ജോലിസ്ഥലത്തെ വിശ്വാസത്തെ ദുർബലപ്പെടുത്താം..“ഞാൻ ബോസാണ്, അതുകൊണ്ട് ചോദ്യം ചെയ്യരുത്” എന്ന സമീപനം ടോക്സിക് നേതൃത്വത്തിന്റെ പ്രധാന ലക്ഷണമാണ്. അധികാരത്തിന്റെ പേരിൽ ജീവനക്കാരെ അനുസരിക്കാൻ നിർബന്ധിക്കുകയും അവരുടെ ചോദ്യങ്ങളെയും അഭിപ്രായങ്ങളെയും വിലകുറച്ച് കാണുകയും ചെയ്യാം..മറ്റുള്ളവരുടെ മുന്നിൽ ജീവനക്കാരെ പരിഹസിക്കുക, അവരുടെ കഴിവുകളെ കുറിച്ച് മോശമായി സംസാരിക്കുക, കുറ്റപ്പെടുത്തുക തുടങ്ങിയ പെരുമാറ്റങ്ങൾ മാനസികമായി തളർത്തുന്ന അന്തരീക്ഷം സൃഷ്ടിക്കും. തമാശയുടെ പേരിൽ ഒരാളെ നിരന്തരം അപമാനിക്കുന്നതും ഇതിൽ ഉൾപ്പെടാം..തനിക്ക് എല്ലാം അറിയാമെന്ന് കരുതുകയും പുതിയ കാര്യങ്ങൾ പഠിക്കാനോ മറ്റുള്ളവരിൽ നിന്ന് നിർദേശങ്ങൾ സ്വീകരിക്കാനോ തയ്യാറാകാതിരിക്കുകയും ചെയ്യാം. സ്വയം മെച്ചപ്പെടുത്താനുള്ള ഫീഡ്ബാക്ക് പോലും നിരസിക്കുന്നത് ടീമിന്റെ വളർച്ചയെ ബാധിക്കും..ജീവനക്കാരെ വിശ്വസിക്കാതെ ഓരോ ചെറിയ കാര്യത്തിലും ഇടപെടുക, ജോലി എങ്ങനെ ചെയ്യണമെന്ന് നിരന്തരം നിർദേശിക്കുക, എല്ലാ ഇമെയിലിലും തന്നെ ഉൾപ്പെടുത്തണമെന്ന് നിർബന്ധിക്കുക തുടങ്ങിയവ മൈക്രോമാനേജ്മെന്റിന്റെ ലക്ഷണങ്ങളാണ്. ഇത് ജീവനക്കാരുടെ സ്വാതന്ത്ര്യവും ആത്മവിശ്വാസവും കുറയ്ക്കും..ഇത്തരം പെരുമാറ്റങ്ങൾ ജീവനക്കാരുടെ ഭയം, ഉത്കണ്ഠ, ആത്മവിശ്വാസക്കുറവ്, ജോലിയിൽ സംതൃപ്തിയില്ലായ്മ, ബേണൗട്ട് എന്നിവയ്ക്ക് കാരണമാകാം. ടോക്സിക് നേതൃത്വത്തിന്റെ സ്വാധീനം ഒരാളിൽ മാത്രം ഒതുങ്ങാതെ ടീമിലാകെ പടരുകയും ജീവനക്കാരുടെ കൊഴിഞ്ഞുപോക്ക് വർധിപ്പിക്കുകയും ചെയ്യും..അത്തരമൊരു ബോസിനൊപ്പം ജോലി ചെയ്യേണ്ടിവന്നാൽ സ്വന്തം ക്ഷേമത്തിന് മുൻഗണന നൽകുക. ജോലിനിർദേശങ്ങൾ, ഇമെയിലുകൾ, സന്ദേശങ്ങൾ, സംഭവങ്ങളുടെ തീയതികൾ തുടങ്ങിയവ വ്യക്തമായി രേഖപ്പെടുത്തി സൂക്ഷിക്കുന്നത് പ്രധാനമാണ്. പ്രത്യേകിച്ച് വാക്കാൽ നൽകിയ നിർദേശങ്ങൾ പിന്നീട് ഒരു ഇമെയിലിലൂടെ സ്ഥിരീകരിക്കുന്നത് ആശയക്കുഴപ്പം ഒഴിവാക്കാൻ സഹായിക്കും..ഒറ്റയ്ക്ക് എല്ലാം നേരിടേണ്ടതില്ല. വിശ്വസിക്കുന്ന സഹപ്രവർത്തകൻ, മെന്റർ, മറ്റൊരു സീനിയർ ഉദ്യോഗസ്ഥൻ തുടങ്ങിയവരോട് സംസാരിക്കുന്നത് മറ്റൊരു കാഴ്ചപ്പാട് ലഭിക്കാനും മുന്നോട്ടുള്ള വഴി തീരുമാനിക്കാനും സഹായിക്കും..എല്ലാ ശ്രമങ്ങൾക്കും ശേഷവും സ്ഥിതി മാറുന്നില്ലെങ്കിൽ, അതേ സ്ഥാപനത്തിനുള്ളിലെ മറ്റൊരു ജോലി തേടുകയോ പുതിയ സ്ഥാപനത്തിലേക്ക് മാറാനുള്ള സാധ്യതകൾ പരിശോധിക്കുകയോ ചെയ്യാം. ഒരാളുടെ മാന്യതയും ക്ഷേമവും തുടർച്ചയായി തകർക്കുന്ന സാഹചര്യത്തിൽ അവിടെ തുടരുക മാത്രമല്ല ഏക പരിഹാരം.Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
