'തേങ്ങാമരമതു കായ്ക്കണമെങ്കില്‍, കുമ്മാട്ടിക്കൊരു തേങ്ങ കൊടുപ്പിന്‍'

കേരളത്തിന്റെ തനതായ നാടന്‍ കലാപാരമ്പര്യത്തില്‍ പ്രത്യേക സ്ഥാനമുള്ള ആചാര-വിനോദ കലാരൂപമാണ് കുമ്മാട്ടിക്കളി. പ്രധാനമായും തൃശൂര്‍, പാലക്കാട്, വയനാട് ജില്ലകളിലാണ് ഇത് പ്രചാരത്തിലുള്ളത്. ഓണക്കാലത്തും കാര്‍ഷികോത്സവങ്ങളോടനുബന്ധിച്ചും ദേവ പ്രീതിക്കായും വിവിധ പ്രദേശങ്ങളില്‍ കുമ്മാട്ടിക്കളി അവതരിപ്പിച്ചുവരുന്നു. നാടിന്റെ വിശ്വാസങ്ങളും പുരാണകഥ കളും കാര്‍ഷിക സംസ്‌കാരവും ഒത്തുചേരുന്ന മ നോഹരമായ കലാരൂപമാണിത്.

ഓണക്കാലത്തെ കുമ്മാട്ടിക്കളി

തൃശൂര്‍ ജില്ലയില്‍ ഓണാഘോഷങ്ങളുടെ ഭാഗമായി കുമ്മാട്ടിക്കളിക്ക് വലിയ പ്രാധാന്യമുണ്ട്. ഓണ ദിവസങ്ങളില്‍ വീടുകള്‍ തോറും എത്തുന്ന കുമ്മാട്ടിക്കളി സംഘങ്ങള്‍ പാട്ടും നൃത്തവും അവതരിപ്പിച്ച് ആഘോഷത്തിന് മാറ്റുകൂട്ടുന്നു. കുട്ടികളും മുതിര്‍ന്നവരും ഒരുപോലെ ആസ്വദിക്കുന്ന ഈ കലാരൂപം ഗ്രാമീണ ഓണക്കാലത്തിന്റെ സവിശേഷ കാഴ്ചകളിലൊന്നാണ്.

പാലക്കാട്, വയനാട് തുടങ്ങിയ പ്രദേശങ്ങളില്‍ കാര്‍ഷികോത്സവങ്ങളോടും വിളവെടുപ്പിനോടും ബന്ധപ്പെടുത്തിയും കുമ്മാട്ടിക്കളി നടത്താറുണ്ട്. ചില പ്രദേശങ്ങളില്‍ ദേവതകളുടെ പ്രീതിക്കായുള്ള ആചാരത്തിന്റെ ഭാഗമായും ഇത് അവതരിപ്പിക്കുന്നു.

വ്യത്യസ്തമായ മുഖംമൂടികള്‍

കുമ്മാട്ടിക്കളിയുടെ ഏറ്റവും ശ്രദ്ധേയമായ സവിശേഷത അതിലെ വലിയ മുഖംമൂടികളാണ്. കമുകിന്‍പാള, മരം, മുരിക്കിന്‍തടി തുടങ്ങിയ വസ്തുക്കള്‍ ഉപയോഗിച്ചാണ് പരമ്പരാഗതമായി മുഖംമൂടികള്‍ നിര്‍മ്മിക്കുന്നത്. പുരാണ കഥാപാത്രങ്ങളുടെയും വിവിധ ജനകീയ കഥാപാത്രങ്ങ ളുടെയും രൂപങ്ങള്‍ മുഖംമൂടികളില്‍ പ്രത്യക്ഷപ്പെടുന്നു.

ശിവന്‍, പാര്‍വതി, കൃഷ്ണന്‍, നാരദന്‍, കിരാതന്‍ തുടങ്ങിയ കഥാപാത്രങ്ങള്‍ക്കു പുറമെ തള്ള, തന്ത തുടങ്ങിയ ജനകീയ വേഷങ്ങളും ചില പ്രദേശങ്ങളില്‍ കാണാം. ഓരോ കഥാപാത്രത്തിന്റെയും സ്വഭാവത്തിനനുസരിച്ചാണ് മുഖംമൂടികളും വേഷവിധാനങ്ങളും ഒരുക്കുന്നത്.

കുമ്മാട്ടിപ്പുല്ലിന്റെ വേഷം

കുമ്മാട്ടിക്കളിക്കാരുടെ വേഷവിധാനമാണ് ഈ കലാരൂപത്തെ കൂടുതല്‍ ആകര്‍ഷകമാക്കുന്നത്. ശരീരത്തില്‍ പര്‍പ്പടകപ്പുല്ല് അഥവാ കുമ്മാട്ടിപ്പുല്ല് വെച്ചുകെട്ടുന്നതും ചില പ്രദേശങ്ങളില്‍ വാഴയില ഉപയോഗിക്കുന്നതും പരമ്പരാഗത രീതിയാണ്. മുഖംമൂടിയും പുല്ലുകൊണ്ടുള്ള വേഷവും ചലന ങ്ങളും ചേര്‍ന്നപ്പോള്‍ കുമ്മാട്ടിക്കളിക്കാരുടെ രൂപം ഏറെ കൗതുകകരമായി മാറുന്നു.

പാട്ടും വാദ്യവും

കുമ്മാട്ടിക്കളിക്ക് ചുവടുകള്‍ക്ക് താളം നല്‍കുന്നത് വിവിധ നാടന്‍ വാദ്യങ്ങളാണ്. ചെണ്ട, തപ്പ് തുടങ്ങിയ വാദ്യങ്ങള്‍ക്കൊപ്പം കുമ്മാട്ടിപ്പാട്ടുകളും അവതരിപ്പിക്കപ്പെടുന്നു. പാട്ടിന്റെ താളത്തിനനുസരിച്ച് കഥാപാത്രങ്ങള്‍ നൃത്തച്ചുവടുകള്‍ വയ്ക്കുകയും കാണികളെ രസിപ്പിക്കുകയും ചെയ്യുന്നു.

പുരാണവും ജനകീയതയും

കുമ്മാട്ടിക്കളിയില്‍ പുരാണകഥാപാത്രങ്ങള്‍ പ്ര ത്യക്ഷപ്പെടുന്നുണ്ടെങ്കിലും ഇത് കേവലം ഒരു പു രാണാവിഷ്‌കാരം മാത്രമല്ല. ഗ്രാമീണ ജനജീവിതത്തിന്റെ സന്തോഷവും ആഘോഷവും കൂട്ടായ്മയും ഇതില്‍ പ്രകടമാണ്. കുട്ടികളെയും മുതിര്‍ന്നവരെയും ഒരുപോലെ പങ്കാളികളാക്കുന്ന ജനകീയ സ്വഭാവമാണ് ഈ കലാരൂപത്തിന്റെ പ്രധാന സവിശേഷത.

സംരക്ഷിക്കേണ്ട പൈതൃകം

ആധുനിക വിനോദരീതികള്‍ വ്യാപകമായ കാലത്തും കുമ്മാട്ടിക്കളി പോലുള്ള നാടന്‍ കലകള്‍ കേരളത്തിന്റെ സാംസ്‌കാരിക സ്വത്വത്തെ നിലനിര്‍ത്തുന്നു. തലമുറകളിലൂടെ കൈമാറിവന്ന വേഷ നിര്‍മാണരീതികളും പാട്ടുകളും നൃത്തച്ചുവടുകളും സംരക്ഷിക്കേണ്ടത് അനിവാര്യമാണ്. പുതുതലമുറയ്ക്ക് ഈ കലാരൂപത്തെ പരിചയ പ്പെടുത്തുകയും കലാകാരന്മാര്‍ക്ക് ആവശ്യമായ പിന്തുണ നല്‍കുകയും ചെയ്താല്‍ കുമ്മാട്ടിക്കളിക്ക് കൂടുതല്‍ പ്രചാരം നേടാനാകും. ഓണത്തിന്റെ ആഘോഷഭരിതമായ അന്തരീക്ഷത്തിലും കേരളത്തിന്റെ കാര്‍ഷിക-ഗ്രാമീണ പാരമ്പര്യത്തിലും നിറവും താളവും പകരുന്ന കുമ്മാട്ടിക്കളി നമ്മുടെ നാടന്‍ കലാസമ്പത്തിന്റെ വിലപ്പെട്ടൊരു ഭാഗമാണ്.