ന്യൂഡല്‍ഹി: വായ്പ വളര്‍ച്ച മെച്ചപ്പെടുത്തി സമ്പദ് വ്യവസ്ഥയ്ക്ക് കരുത്തുപകരുന്നതിന് പുതിയ നടപടികള്‍ പ്രഖ്യാപിച്ച് റിസര്‍വ് ബാങ്ക്. ലിസ്റ്റ് ചെയ്ത കടപ്പത്രങ്ങള്‍ക്കെതിരായ വായ്പകളുടെ നിയന്ത്രണ പരിധി നീക്കം ചെയ്യാനും ഓഹരികള്‍ക്കെതിരായ വായ്പയുടെ പരിധി അഞ്ചു മടങ്ങ് വര്‍ധിപ്പിക്കാനുമാണ് റിസര്‍വ് ബാങ്ക് നിര്‍ദേശിച്ചത്.

റിസര്‍വ് ബാങ്കിന്റെ നാലാമത്തെ ദ്വൈമാസ ധനനയം പ്രഖ്യാപിച്ച് നടത്തിയ വാര്‍ത്താസമ്മേളനത്തിലാണ് ആര്‍ബിഐ സ്വീകരിച്ച പുതിയ നടപടികള്‍ പങ്കുവെച്ചത്. ലിസ്റ്റ് ചെയ്ത കടപ്പത്രങ്ങളിന്മേലുള്ള വായ്പയുടെ നിയന്ത്രണ പരിധി നീക്കം ചെയ്യാനും ഓഹരികളിന്മേല്‍ ബാങ്കുകള്‍ നല്‍കുന്ന വായ്പയുടെ പരിധി 20 ലക്ഷം രൂപയില്‍ നിന്ന് 1 കോടി രൂപയായി ഉയര്‍ത്താനും നിര്‍ദേശിച്ചു. ഐപിഒ ധനസഹായത്തിനുള്ള പരിധി ഒരാള്‍ക്ക് 10 ലക്ഷം രൂപയില്‍ നിന്ന് 25 ലക്ഷം രൂപയായി വര്‍ധിപ്പിക്കാനും നിര്‍ദേശിച്ചതായി ആര്‍ബിഐ ഗവര്‍ണര്‍ പറഞ്ഞു.

വായ്പയുടെ ഒഴുക്ക് മെച്ചപ്പെടുത്തുന്നതിനുള്ള അഞ്ച് നടപടികളുടെ ഭാഗമാണിതെന്നും ആര്‍ബിഐ ഗവര്‍ണര്‍ വ്യക്തമാക്കി. ബാങ്കിങ് മേഖലയുടെ മത്സരശേഷി ശക്തിപ്പെടുത്തുക, വായ്പാ ഒഴുക്ക് മെച്ചപ്പെടുത്തുക, ബിസിനസ്സ് എളുപ്പമാക്കല്‍ പ്രോത്സാഹിപ്പിക്കുക, വിദേശനാണ്യ മാനേജ്‌മെന്റ് ലളിതമാക്കുക, ഉപഭോക്തൃ സംതൃപ്തി വര്‍ദ്ധിപ്പിക്കുക, ഇന്ത്യന്‍ രൂപയുടെ അന്താരാഷ്ട്രവല്‍ക്കരണം എന്നിവ ലക്ഷ്യമിട്ടുള്ള 22 അധിക നടപടികളുടെ ഒരു പാക്കേജും ഗവര്‍ണര്‍ പ്രഖ്യാപിച്ചിട്ടുണ്ട്. റിപ്പോനിരക്ക് 5.5 ശതമാനമായി തന്നെ നിലനിര്‍ത്താനും ധനനയ സമിതി തീരുമാനിച്ചിട്ടുണ്ട്.