വെള്ളം കുടിച്ചില്ലെങ്കിൽ മാത്രമല്ല, നിർജ്ജലീകരണത്തിന്റെ നിശബ്ദ ലക്ഷണങ്ങൾ

ശരീരത്തിൽ മതിയായ അളവിൽ ജലാംശമില്ലെങ്കിൽ അത് ശരീരത്തിനുള്ളിലെ പ്രവർത്തനങ്ങളെ ബാധിക്കുകയും നിർജ്ജലീകരണത്തിലേക്ക് നയിക്കുകയും ചെയ്യുന്നു. ഇന്ന് ദശലക്ഷക്കണക്കിന് ആളുകൾ നേരിടുന്ന വലിയൊരു പ്രശ്നമാണ് നിർജ്ജലീകരണം. വെള്ളം കുടിക്കാത്തതു മാത്രമല്ല ശരീരത്തിൽ നിന്ന് അമിതമായി ജലാംശം നഷ്ടപ്പെടുന്നതും നിർജ്ജലീകരണത്തിന് കാരണമാകും.

പലപ്പോഴും നിർജ്ജലീകരണത്തിന്റെ ലക്ഷണങ്ങൾ നിശബ്ദമാണ്. അവ തിരിച്ചറിയാൻ വൈകുന്നത് ആരോ​ഗ്യം വഷളാകാൻ കാരണമാകും. അമിതമായ വിയർപ്പ്, വയറിളക്കം, ഛർദ്ദി, ആവശ്യത്തിന് വെള്ളം കുടിക്കാത്തത് തുടങ്ങി വിവിധ ഘടകങ്ങൾ നിർജ്ജലീകരണത്തിന് കാരണമാകാം. ശരീരത്തിൽ നിന്ന് വെള്ളം നഷ്ടപ്പെടുമ്പോൾ, സോഡിയം, പൊട്ടാസ്യം, ക്ലോറൈഡ് തുടങ്ങിയ പ്രധാനപ്പെട്ട ഇലക്ട്രോലൈറ്റുകളും നഷ്ടപ്പെടും. ഈ ഇലക്ട്രോലൈറ്റുകൾ കോശങ്ങളുടെ ശരിയായ പ്രവർത്തനത്തിന് പ്രധാനമാണ്. ഇതിന്‍റെ അഭാവം ഗുരുതര ആരോഗ്യ പ്രശ്നങ്ങളിലേക്ക് നയിക്കാം.

നീര്‍ജ്ജലീകരണത്തിന്‍റെ ലക്ഷണങ്ങള്‍ വളരെ സൂഷ്മമായതുകൊണ്ട് തന്നെ ഇവ തിരിച്ചറിയുക പ്രയാസമാണ്. ദാഹം, വരണ്ട വായ, ക്ഷീണം, തലവേദന എന്നിവയാണ് നിർജ്ജലീകരണത്തിന്റെ ചില സാധാരണ ലക്ഷണങ്ങൾ. ചില കഠിനമായ കേസുകളില്‍ നിർജ്ജലീകരണം തലകറക്കം, ആശയക്കുഴപ്പം, ദ്രുതഗതിയിലുള്ള ഹൃദയമിടിപ്പ്, കൂടാതെ അപസ്മാരം എന്നിവയ്‌ക്ക് കാരണമാകും. പ്രായമോ ആരോഗ്യസ്ഥിതിയോ പരിഗണിക്കാതെ ഇത് ആരെയും ബാധിക്കാം എന്നതാണ് നിശബ്‌ദ നിർജ്ജലീകരണത്തിന്റെ ഏറ്റവും വലിയ വെല്ലുവിളി.

രോഗാവസ്ഥയില്‍ പ്രത്യേകം ശ്രദ്ധിക്കണം

പനി, ജലദോഷം ഉള്ളപ്പോള്‍ ഓരോ 15 മിനിറ്റിലും ഇലക്ട്രോലൈറ്റുകളും കലോറിയും അടങ്ങിയ ദ്രാവകങ്ങള്‍ (ഒആര്‍എസ് പോലുള്ളവ) കുടിക്കുന്നത് നിര്‍ജ്ജലീകരണം തടയാനും ശരീരത്തില്‍ ഊര്‍ജ്ജം നിലനിര്‍ത്താനും സഹായിക്കും. വെള്ളം മാത്രം കുടിക്കുന്നതിന് പകരം ഇലക്ട്രോലൈറ്റുകള്‍ അടങ്ങിയ ദ്രാവകം കുടിക്കുന്നത് പേശി വേദനയും മലബന്ധവും കുറയ്ക്കാൻ സഹായിക്കും.