സ്റ്റിയറിങ്ങിൽനിന്ന് കൈവിട്ടാൽ നിമിഷങ്ങൾക്കകം അലർട്ട്; ഡ്രൈവറുടെ ഉറക്കം കെടുത്താൻ പാലക്കാട് ഐഐടിയുടെ 'മാജിക് ടച്ച്'!

പാലക്കാട്: ഡ്രൈവിങ്ങിനിടെ ഡ്രൈവർമാർ ഉറങ്ങിപ്പോകുന്നതും ശ്രദ്ധ തെറ്റുന്നതും തത്സമയം തൊട്ടറിഞ്ഞ് അപകട മുന്നറിയിപ്പ് നൽകാൻ കഴിയുന്ന അത്യാധുനിക ടച്ച് സെൻസർ സാങ്കേതികവിദ്യ വികസിപ്പിച്ചെടുത്ത് ഐഐടി പാലക്കാട്. വാഹനാപകടങ്ങൾ ഗണ്യമായി കുറയ്ക്കാൻ സഹായിക്കുന്ന ഈ നൂതന സംവിധാനം വാഹന നിർമ്മാണ മേഖലയിൽ വലിയ മുന്നേറ്റത്തിന് വഴിയൊരുക്കും. ഐഐടി പാലക്കാട് ഇലക്ട്രിക്കൽ എൻജിനീയറിങ് വിഭാഗം അസോസിയേറ്റ് പ്രൊഫസർ ഡോ. ശ്രീനാഥ് വിജയകുമാറും ടെക്നിക്കൽ സൂപ്രണ്ട് പിങ്കു സെബാസ്റ്റ്യനും ചേർന്നാണ് ഈ സുപ്രധാന സുരക്ഷാ സാങ്കേതികവിദ്യ രൂപകൽപ്പന ചെയ്തത്.

നിലവിൽ പല അത്യാധുനിക വാഹനങ്ങളിലും ഡ്രൈവർമാരെ നിരീക്ഷിക്കാൻ ഉപയോഗിക്കുന്നത് ക്യാമറ അധിഷ്ഠിത സംവിധാനങ്ങളാണ്. ഡ്രൈവറുടെ മുഖചലനങ്ങളും കൺപോളകളുടെ അനക്കവും ക്യാമറയിലൂടെ ഒപ്പിയെടുത്താണ് അവ പ്രവർത്തിക്കുന്നത്. എന്നാൽ ഐഐടി പാലക്കാട് വികസിപ്പിച്ച സംവിധാനത്തിന് ഇത്തരം ക്യാമറകളുടെ ആവശ്യമില്ല. വാഹനത്തിന്റെ സ്റ്റിയറിങ് വീലിൽത്തന്നെ ഘടിപ്പിക്കുന്ന പ്രത്യേക ടച്ച് സെൻസറുകൾ വഴി ഡ്രൈവറുടെ കൈകളുടെ സാന്നിധ്യവും സ്ഥാനവും കൃത്യമായി തിരിച്ചറിയാൻ സാധിക്കും.

ഡ്രൈവർ ഇരു കൈകളും ഉപയോഗിച്ച് സ്റ്റിയറിങ് വീൽ നിയന്ത്രിക്കുന്നുണ്ടോ, അതോ കൈകൾ ദീർഘനേരം സ്റ്റിയറിങ്ങിൽനിന്ന് മാറിയിട്ടുണ്ടോ തുടങ്ങിയ വിവരങ്ങൾ സെൻസർ നിരന്തരം വിലയിരുത്തും. വാഹനമോടിക്കുന്നതിനിടെ ഡ്രൈവർ ഉറങ്ങിപ്പോവുകയോ ശ്രദ്ധ പാളിപ്പോവുകയോ ചെയ്യുന്ന നിമിഷം തന്നെ അപകടസാധ്യത സ്വയം തിരിച്ചറിഞ്ഞ് ഡ്രൈവർക്ക് അടിയന്തര മുന്നറിയിപ്പ് നൽകാൻ ഈ സംവിധാനത്തിന് കഴിയും. പകലും രാത്രിയും ഒരുപോലെ കൃത്യതയോടെ പ്രവർത്തിക്കാൻ കഴിയുന്ന വിധത്തിലാണ് സെൻസർ നിർമ്മിച്ചിരിക്കുന്നത്. മഴയും മൂടൽമഞ്ഞും ഉൾപ്പെടെയുള്ള വ്യത്യസ്ത കാലാവസ്ഥാ വ്യതിയാനങ്ങളും ഇതിന്റെ പ്രവർത്തനത്തെ ബാധിക്കില്ല. ക്യാമറ അധിഷ്ഠിത മോണിറ്ററിങ് സംവിധാനങ്ങളെ അപേക്ഷിച്ച് നിർമ്മാണച്ചെലവ് വളരെ കുറവാണെന്നതും യാത്രക്കാരുടെ സ്വകാര്യതയിലേക്ക് കടന്നുകയറുന്നില്ലെന്നതും ഇതിന്റെ വലിയ സവിശേഷതയാണ്.

പ്രത്യേകം തയ്യാറാക്കിയ പ്രോട്ടോടൈപ്പ് സ്റ്റിയറിങ് വീലിൽ നടത്തിയ പരീക്ഷണങ്ങളിലെല്ലാം സംവിധാനം പൂർണ്ണവിജയമാണെന്ന് തെളിഞ്ഞു. ഗവേഷണ നേട്ടത്തിന് ഇന്ത്യൻ പേറ്റന്റും ഇതിനകം സ്വന്തമാക്കിയിട്ടുണ്ട്. വാഹനങ്ങളിലെ ഡ്രൈവർ സുരക്ഷയ്ക്ക് പുറമെ റോബോട്ടിക്സ് സംവിധാനങ്ങൾ, ആശുപത്രികളിലെ തീവ്രപരിചരണ വിഭാഗങ്ങളിലെ (ഐസിയു) സ്മാർട്ട് കിടക്കകൾ തുടങ്ങിയ മേഖലകളിലും ഈ ടച്ച് സെൻസർ സാങ്കേതികവിദ്യ വിജയകരമായി പ്രയോജനപ്പെടുത്താനാകുമെന്നാണ് ഗവേഷക സംഘത്തിന്റെ വിലയിരുത്തൽ.