ഹരിശങ്കരനശോകന്‍ എഴുതിയ കവിത ഏകാന്തബുദ്ധോല്ലാസം

എന്തിനുവേണ്ടി തിരക്ക് കൂട്ടുന്നു ഞാ-

നെങ്ങോട്ടുമെത്താൻ ധൃതിയില്ല

രാത്രിയിലീവഴിയൊക്കെ വിജനമാ-

ണാർത്തുവിളിച്ചുകടന്നുപോകാം

എങ്കിലും വേഗതയില്ലാതിഴഞ്ഞിടാ-

നുള്ളിലൊരാളിന്നലറിടുന്നു

തട്ടുകടകളടഞ്ഞുകിടക്കയാ-

ണെത്രയോ ദോശകൾ ചുട്ടുപോയി

ആഭരണങ്ങൾ നിരത്തിയ ശാ-

ലയിലേതോ വിമുക്തനുറങ്ങിടുന്നു

തീരെയും വയ്യാത്ത രോഗികൾ പോ-

ലുമിന്നാശ്വാസമാസ്പത്രിനിദ്ര പൂണ്ടു

ഉള്ളിലിരുന്നലറീടുന്നയാളെന്റെ-

യുല്ലാസദൈവതമായിടുന്നു

ഈ രാത്രിയെന്റെയാണെന്റെയാ-

ണീവഴിയെന്റേതു മാത്രമാണെന്റെ മാത്രം

വേഗത വീണ്ടും കുറഞ്ഞു പിന്നോട്ട് ഞാ-

നേകാന്തയാത്രയെ വിസ്തരിച്ചു

നായകൾ മാണ്ട് കിടക്കുമോരങ്ങളി-

ലാരണ്യസസ്യങ്ങൾ പൂത്തുലർന്നു

ഗന്ധർവ്വഗന്ധികളാവുന്ന കാറ്റു-

കളുന്മത്തരീതിയിലൂതിടുന്നു

ഇന്ധനസൂചിയനന്തമായാരംഭ-

ഗംഭീരനാദത്തിലെത്തിടുന്നു

ഉല്ലാസദേവതപോലും വെരണ്ടെന്റെ-

യുന്മാദഗർവ്വിഷ്ഠബുദ്ധതയിൽ...