മോഹൻലാലും മമ്മൂട്ടിയും സ്ക്രീനിൽ ഒന്നിച്ചപ്പോഴൊക്കെ മലയാളികൾ അത് ആഘോഷമാക്കിയിട്ടുണ്ട്. വർഷങ്ങൾക്ക് ശേഷം മഹേഷ് നാരായണൻ ചിത്രത്തിലൂടെ മമ്മൂട്ടിയും മോഹൻലാലും ഒന്നിച്ച് സ്ക്രീനിൽ എത്തുകയാണ്. ഇതുവരെ പേരിട്ടിട്ടില്ലാത്ത ഈ മൾട്ടിസ്റ്റാർ ചിത്രത്തിന്റെ ഓരോ അപ്ഡേറ്റുകളും ഇരുകൈയും നീട്ടിയാണ് സിനിമാ പ്രേക്ഷകർ സ്വീകരിക്കുന്നതും. ചിത്രത്തിൽ നടി ​ഗ്രേസ് ആന്റണി (Grace Antony) യും ഒരു പ്രധാന വേഷത്തിലെത്തുന്നുണ്ട്.

ഇപ്പോഴിതാ മമ്മൂട്ടിക്കും മോഹൻലാലിനുമൊപ്പം അഭിനയിക്കാൻ കഴിഞ്ഞതിനേക്കുറിച്ച് സംസാരിക്കുകയാണ് ​ഗ്രേസ്. വളരെ യാദൃച്ഛികമായാണ് ചിത്രത്തിലെ കഥാപാത്രം തന്നെ തേടിയെത്തിയതെന്ന് ​ഗ്രേസ് ആന്റണി ദ് ന്യൂ ഇന്ത്യൻ എക്സ്പ്രസിന് നൽകിയ അഭിമുഖത്തിൽ പറഞ്ഞു.

"മമ്മൂക്കയെ കണ്ട് ഒരു ഹായ് പറയാൻ വേണ്ടി മാത്രമാണ് ഞാൻ ആ സെറ്റിലെത്തിയത്. അപ്പോഴാണ് മഹേഷ് നാരായണൻ സിനിമയിൽ അഭിനയിക്കാമോ എന്ന് ചോദിച്ചത്. അവൾ അത് ചെയ്യുമെന്ന് മമ്മൂക്ക പെട്ടെന്ന് മറുപടി പറഞ്ഞു. അദ്ദേഹം അങ്ങനെ പറഞ്ഞാൽ ഞാൻ സമ്മതിക്കും. കാരണം എനിക്കേറ്റവും കംഫർട്ടബിൾ ആയി തോന്നിയ നടൻ അദ്ദേഹമാണ്.

ഈ സിനിമയൽ ചെറിയ ഒരു കഥാപാത്രത്തെയാണ് ഞാൻ അവതരിപ്പിക്കുന്നത്. എന്നാലും ഇതിഹാസങ്ങൾ ഒന്നിക്കുന്ന ഈ സിനിമയുടെ ഭാ​ഗമാകാൻ കഴിഞ്ഞതിൽ എനിക്ക് അഭിമാനമുണ്ട്. ആ പ്രൊജക്ടിന്റെ ഭാ​ഗമായതിൽ ഞാൻ വളരെ ആവേശത്തിലാണ്". -​ഗ്രേസ് ആന്റണി പറഞ്ഞു.

മുൻപ് മമ്മൂട്ടിയ്ക്കും മോഹൻലാലിനുമൊപ്പം ചിത്രത്തിന്റെ ലൊക്കേഷനിൽ നിന്നുള്ള ചിത്രവും ​ഗ്രേസ് ആന്റണി പങ്കുവച്ചിരുന്നു. ലെജൻഡ്സിനൊപ്പം സ്ക്രീൻ സ്പെയ്സ് പങ്കിടാൻ കഴിഞ്ഞതിൽ അനു​ഗ്രഹീതയാണെന്നും ​ഗ്രേസ് ആന്റണി ചിത്രത്തിനൊപ്പം കുറിച്ചിരുന്നു.

'നായികയാകാൻ പറ്റിയ ആളല്ല ഞാൻ; എന്റെ കഴിവുകളും പരിമിതികളുമൊക്കെ എന്താണെന്ന് നന്നായി അറിയാം'

മുൻപ് മമ്മൂട്ടിയ്ക്കൊപ്പം റോഷാക്ക് എന്ന ചിത്രത്തിൽ ​ഗ്രേസ് ആന്റണി അഭിനയിച്ചിരുന്നു. അതേസമയം മഹേഷ് നാരായണൻ ചിത്രത്തിന്റെ ഷൂട്ടിങ്ങിനായി ശ്രീലങ്കയിലെത്തിയ മോഹൻലാലിന്റെ ചിത്രങ്ങളും വിഡിയോകളുമൊക്കെ സോഷ്യൽ മീഡിയയിൽ വൈറലായി മാറിയിരുന്നു.