വിജയ് സേതുപതി അല്ല, ആമിറിന്റെ സുഹൃത്ത് നാ​ഗചൈതന്യ; ചിത്രം പുറത്ത്

ആമിർ‌ഖാൻ പ്രധാന വേഷത്തിലെത്തുന്ന ലാൽ‌ സിങ് ഛദ്ദയ്ക്കായി കാത്തിരിക്കുകയാണ് സിനിമ പ്രേമികൾ. ക്ലാസിക് ചിത്രം ഫോറസ്റ്റ് ​ഗംപിന്റെ റീമേക്കാണ് ഇത്. ചിത്രത്തിൽ തമിഴ് താരം വിജയ് സേതുപതി അഭിനയിക്കുമെന്ന് റിപ്പോർട്ടുകളുണ്ടായിരുന്നു. എന്നാൽ സേതുപതിയല്ല തെലുങ്ക് താരം നാ​ഗചൈതന്യയാണ് ആമിർ ഖാനൊപ്പം ബോളിവുഡിലേക്ക് അരങ്ങേറ്റം കുറിക്കുന്നത്. സിനിമയുടെ ഷൂട്ടിങ് ലൊക്കേഷനിൽ നിന്നുള്ള ചിത്രം സോഷ്യൽ മീഡിയയിൽ വൈറലാവുകയാണ്. 

ആമിറിനും കിരണ്‍ റാവുവിനുമൊപ്പം നിൽക്കുന്ന ചിത്രം നാഗചൈതന്യ തന്നെയാണ് ട്വിറ്ററിൽ പങ്കുവെച്ചത്. പട്ടാളക്കാരുടെ വേഷത്തിലാണ് ആമിറിനേയും നാ​ഗചൈതന്യയേയും കാണുന്നത്. കൂടാതെ നാ​ഗചൈതന്യയെ ചിത്രത്തിലേക്ക് സ്വാ​ഗതം ചെയ്തുകൊണ്ട് ആമിർ ഖാൻ പ്രൊഡക്ഷൻസും ചിത്രം പങ്കുവെച്ചു. നാ​ഗചൈതന്യ ഹൃദയം കീഴടക്കുന്നവനാണെന്നും ഇപ്പോൾ തന്നെ തങ്ങളുടെ ഹൃദയം കീഴടക്കിയെന്നുമാണ് കുറിച്ചിരിക്കുന്നത്. 

ആമിർ ഖാന്റെ ആത്മസുഹൃത്തിനെയാണ് താരം അവതരിപ്പിക്കുക. ബാല എന്നാണ് ഈ കഥാപാത്രത്തിന്‍റെ പേര്. നേരത്തെ വിജയ് സേതുപതി അവതരിപ്പിക്കുമെന്ന് കരുതപ്പെട്ടിരുന്ന കഥാപാത്രമാണ് ഇത്. അദ്ദേഹം മാറിയതോടെ നാഗചൈതന്യ എത്തുകയായിരുന്നു. കരീന കപൂര്‍ ആണ് ചിത്രത്തിലെ നായിക.