പിണറായിയേയും മോദിജിയേയും കുറ്റം പറഞ്ഞിട്ട് കാര്യമില്ല, മദ്യം വാങ്ങാനുള്ള തിരക്കുകണ്ട് പ്രിയദർശൻ; വിഡിയോ

ലോക്ക്ഡൗണിനെ തുടർന്ന് ആഴ്ചകളോളം മദ്യ വിൽപ്പന ശാലകൾ അടച്ചിട്ടിരിക്കുകയായിരുന്നു. നിയന്ത്രണങ്ങളിൽ ഇളവുകൾ വന്നതോടെ കഴിഞ്ഞ ദിവസമാണ് ബാറുകളും ബെവ്കോയും തുറന്നു പ്രവർത്തിക്കാൻ തുടങ്ങിയത്. ആദ്യ ദിവസം മുതൽ മദ്യ വിൽപ്പന ശാലകളിൽ വലിയ തിരക്കാണ് അനുഭവപ്പെടുന്നത്. ഇപ്പോൾ മദ്യവിൽപ്പന ശാലയിലെ തിരക്കിനെ വിമർശിച്ചുതൊണ്ട് രം​ഗത്തെത്തിയിരിക്കുകയാണ് സംവിധായകൻ പ്രിയദർശൻ. 

നമ്മൾ കോവിഡിന്റെ മൂന്നാം തരം​ഗത്തെ സ്വാ​ഗതം ചെയ്യുകയാണോ എന്നാണ് അദ്ദേഹം ചോദിക്കുന്നത്. പാലക്കാട് ബിവറേജസിനു മുന്നിലുള്ള നീണ്ട ക്യുവിന്റെ വിഡിയോ പങ്കുവെച്ചുകൊണ്ടാണ് കുറിപ്പ്. വെറുതെ ശ്രീ പിണറായി വിജയനെയും, മോദിജിയെയും, വാക്സിനേയും കുറ്റം പറഞ്ഞിട്ട് കാര്യം ഇല്ല. ഇതാ കണ്ടോളു.... നമ്മൾ കോവിഡ് മൂന്നാം തരംഗത്തെ സ്വാഗതം ചെയ്യുകയാണോ??????- പ്രിയദർശൻ കുറിച്ചു. 

സാമൂഹിക അകലം പാലിക്കാതെ മദ്യം വാങ്ങാനായി റോഡിന്റെ ഇരുവശവും തിങ്ങി നിറഞ്ഞു നിൽക്കുന്നവരെയാണ് വിഡിയോയിൽ കാണുന്നത്. മദ്യശാലകൾ തുറന്നതിനെ വിമർശിച്ച് നിരവധി പേരാണ് രം​ഗത്തെത്തുന്നത്. തിരക്ക് ഒഴിവാക്കാനുള്ള സംവിധാനം ഏർപ്പെടുത്തേണ്ടതായിരുന്നുവെന്നും പലരും പറയുന്നു.