തിയറ്റർ കൈ വിട്ടു, ഒടിടിയിൽ കത്തിക്കയറുമോ ഡൊമിനിക് ആൻഡ് ദ് ലേഡീസ് പേഴ്സ് ?; പുത്തൻ റിലീസുകളിതാ

നിരവധി സിനിമകളും പരമ്പരകളുമാണ് വിവിധ ഒടിടി പ്ലാറ്റ്‌ഫോമുകളിലായി നിങ്ങളെ കാത്തിരിക്കുന്നത്. ഈ ക്രിസ്മസ് രാവുകൾ മികച്ച സിനിമകൾക്കൊപ്പം കൂടിയാകട്ടെ. ഈ വാരാന്ത്യം ഒടിടിയിലെത്തുന്ന ചിത്രങ്ങൾ ഏതൊക്കെയാണെന്ന് നോക്കാം.

നിവിൻ പോളി നായകനായെത്തുന്ന ആദ്യത്തെ വെബ് സീരിസാണ് ഫാർമ. പി ആർ അരുണ്‍ ആണ് ഈ വെബ്‌ സീരിസ് സംവിധാനം ചെയ്തിരിക്കുന്നത്. ജിയോ ഹോട്ട്സ്റ്റാറിലൂടെ ഡിസംബർ 19 ന് സീരിസ് സ്ട്രീമിങ് ആരംഭിക്കും. മലയാളം, തമിഴ്, തെലുങ്ക്, കന്നഡ, ഹിന്ദി, ബം​ഗാളി, മറാത്തി ഭാഷകളിലും സീരിസ് കാണാനാകും.

ഷാനു സമദ് രചനയും സംവിധാനവും നിർവഹിച്ച ഫാമിലി ത്രില്ലർ ചിത്രമാണ് ബെസ്റ്റി. അഷ്‌കർ സൗദാൻ, ഷഹീൻ സിദ്ദിഖ്, സാക്ഷി അഗർവാൾ, ശ്രാവണ എന്നിവരാണ് ചിത്രത്തിലെ പ്രധാന താരങ്ങൾ. ജനുവരിയിൽ തിയറ്ററുകളിലെത്തിയ ചിത്രമിപ്പോൾ ഒടിടിയിൽ സ്ട്രീമിങ് ആരംഭിച്ചിരിക്കുകയാണ്. മനോരമ മാക്സിലൂടെ ചിത്രം കാണാനാകും.

മമ്മൂട്ടിയെ നായകനാക്കി ഗൗതം വാസുദേവ് മേനോൻ സംവിധാനം ചെയ്ത ചിത്രമാണ് 'ഡൊമിനിക് ആൻഡ് ദ് ലേഡീസ് പേഴ്സ്'. ഈ വർഷം ജനുവരി 23 ന് തിയറ്ററുകളിലെത്തിയ ചിത്രം ഒടിടി റിലീസിനൊരുങ്ങുകയാണ്. സീ ഫൈവിലൂടെ ഡിസംബര്‍ 19 മുതൽ സിനിമയുടെ സ്ട്രീമിങ് ആരംഭിക്കും.

സൂപ്പർ നാച്ചുറൽ ഹൊറർ കോമഡിയായി എത്തി ബോക്സോഫീസിൽ ഹിറ്റായ ചിത്രമാണ് തമ. രശ്മിക മന്ദാനയും ആയുഷ്മാൻ ഖുറാനയും പ്രധാന വേഷത്തിലെത്തിയ ചിത്രം ഒക്ടോബറിലാണ് തിയറ്ററുകളിലെത്തിയത്. ഇപ്പോഴിതാ ചിത്രം ഒടിടിയിലും എത്തിയിരിക്കുകയാണ്. ആദിത്യ സർപോദർ സംവിധാനം ചെയ്ത ചിത്രം ഡിസംബർ 16 മുതൽ ഒടിടി സ്ട്രീമിങ് ആരംഭിച്ചു. ആമസോൺ പ്രൈം വിഡിയോയിലൂടെ ചിത്രം കാണാനാകും.

എമിലി ഇൻ പാരീസ് സീസൺ 5 റിലീസിനൊരുങ്ങുകയാണ്. നെറ്റ്ഫ്ലിക്സിലൂടെയാണ് പരമ്പര സ്ട്രീമിങ്ങിന് ഒരുങ്ങുന്നത്. ഡിസംബർ 18 മുതൽ പ്രേക്ഷകർക്ക് കാണാനാകും.

ഫോർ മോർ ഷോട്ട്സ് പ്ലീസിന്റെ അവസാന സീസണും റിലീസിനൊരുങ്ങുകയാണ്. ആമസോൺ പ്രൈം വിഡിയോയിലൂടെ ഡിസംബർ 19 മുതൽ പ്രേക്ഷകർക്ക് കാണാനാകും. ദാമിനി, അഞ്ജന, ഉമാങ്, സിദ്ധി എന്നീ നാല് സുഹൃത്തുക്കളുടെ കഥയാണ് സീരിസ് പറയുന്നത്.