'റോസ്‌‌‌‌‌‌ലിൻ' അടക്കം നിരവധി ത്രില്ലറുകൾ; ഈ ആഴ്ചയിലെ ഒടിടി റിലീസുകൾ

ഈ വർഷത്തെ രണ്ടാമത്തെ മാസവും തീരുകയാണ്. കണ്ണടച്ചു തുറക്കും മുൻപേ ആണല്ലേ ദിവസങ്ങളും ആഴ്ചകളും മാസങ്ങളുമൊക്കെ കടന്നു പോകുന്നത്. സിനിമകൾ നോക്കുകയാണെങ്കിൽ ഈ മാസം അങ്ങനെ വലിയ ഹിറ്റുകളോ വമ്പൻ റിലീസുകളോ ഒന്നും ഉണ്ടായിരുന്നുമില്ല. ഒട്ടും നിരാശപ്പെടണ്ട. ഈ ആഴ്ച ഒടിടിയിൽ ത്രില്ലറുകൾ ഉൾപ്പെടെ അടിപൊളി ചിത്രങ്ങളാണ് നിങ്ങളെ കാത്തിരിക്കുന്നത്. ഒടിടി റിലീസുകൾ ഏതൊക്കെയാണെന്ന് നോക്കിയാലോ.

മീന, വിനീത്, ഹക്കിം ഷാജഹാൻ എന്നിവർ പ്രധാന വേഷങ്ങളിലെത്തുന്ന സീരിസ് ആണ് സീക്രട്ട് സ്റ്റോറീസ്: റോസ്‌ലിൻ. ഗാനരചയിതാവ് വിനായക് ശശികുമാർ സീക്രട്ട് സ്റ്റോറീസ്: റോസ്‌ലിനിലൂടെ തിരക്കഥാകൃത്തായി കൂടി അരങ്ങേറ്റം കുറിക്കുകയാണ്. സംവിധായകൻ ജീത്തു ജോസഫ് ആണ് ഷോ റണ്ണർ. സുമേഷ് നന്ദകുമാർ സംവിധാനം ചെയ്ത സീരിസ് സെൻട്രൽ അഡ്വർടൈസിങ്ങിന്റെ ബാനറിൽ മാത്യു ജോർജാണ് നിർമിക്കുന്നത്. ജിയോ ഹോട്ട്സ്റ്റാറിലൂടെ ഈ മാസം 27ന് സീരിസ് സ്ട്രീമിങ് ആരംഭിക്കും. മലയാളം, തമിഴ്, തെലുങ്ക്, കന്നഡ, ഹിന്ദി, ബം​ഗാളി, മറാത്തി എന്നീ ഭാഷകളിൽ സീരിസ് സ്ട്രീം ചെയ്യും.

പ്രിയങ്ക ചോപ്രയുടെ ഹോളിവുഡ് ആക്ഷൻ ഡ്രാമയായ ദ് ബ്ലഫ് ഒടിടിയിലെത്തി. ഫ്രാങ്ക് ഇ ഫ്ലവേഴ്‌സ് സംവിധാനം ചെയ്ത ചിത്രത്തിൽ കാൾ അർബനും അഭിനയിക്കുന്നു. ആമസോൺ പ്രൈം വിഡിയോയിലൂടെ ചിത്രം നിങ്ങൾക്ക് കാണാനാകും. അതിജീവനത്തെ അടിസ്ഥാനമാക്കിയുള്ള ചിത്രത്തിൽ പ്രിയങ്ക ശക്തമായ ഒരു കഥാപാത്രമായാണ് എത്തുന്നത്.

1999 ൽ തമിഴ്നാട്- ആന്ധ്രാപ്രദേശ് അതിർത്തിയിൽ നടന്ന ഞെട്ടിപ്പിക്കുന്ന കൊലപാതകങ്ങളുടെ ഒരു പരമ്പരയാണ് തടയം. നവീൻകുമാർ പളനിവേൽ സംവിധാനം ചെയ്ത ഈ പരമ്പരയിൽ സമുദ്രക്കനി ആണ് പ്രധാന വേഷത്തിലെത്തുന്നത്. നടി ശിവദയാണ് നായിക. സീ 5 തമിഴിലൂടെ ഈ മാസം 27 മുതൽ സ്ട്രീമിങ് ആരംഭിക്കും.

കൊങ്കണ സെൻ ശർമ പ്രധാന വേഷത്തിലെത്തുന്ന ചിത്രമാണ് അക്യൂസ്ഡ്. എല്ലാ ബന്ധങ്ങളിലും രഹസ്യങ്ങളുണ്ട്. അവരുടേത് കണ്ടെത്താൻ നിങ്ങൾ തയ്യാറാണോ? എന്ന ടാ​ഗ്‌ലൈനോടെയാണ് ചിത്രമെത്തുന്നത്. നെറ്റ്ഫ്ലിക്സിലൂടെ ഈ മാസം 27ന് ചിത്രം സ്ട്രീമിങ് ആരംഭിക്കും.