'വാഹനങ്ങൾക്ക് നമ്പർ നൽകുന്ന മാതൃക സിനിമകളുടെ പേരിന് വേണ്ടി വരും'; ജെഎസ്കെ വിവാദത്തിൽ ടി ജി രവി

തൃശൂർ: സുരേഷ് ഗോപി നായകനായെത്തിയ ജെഎസ്കെ - ജാനകി vs സ്റ്റേറ്റ് ഓഫ് കേരള എന്ന ചിത്രത്തിന് സെൻസർ സർട്ടിഫിക്കറ്റ് നിഷേധിച്ച സംഭവത്തിൽ പ്രതികരിച്ച് നടൻ ടി ജി രവി. ‘ജാനകി’ എന്ന പേര് സിനിമയിൽ ഉപയോഗിക്കുന്നതിലുള്ള കുഴപ്പം എന്താണെന്ന് ആർക്കും മനസിലായിട്ടില്ലെന്ന് ടി ജി രവി പറഞ്ഞു.

തൃശൂർ രാമു കാര്യാട്ട് കോംപ്ലെക്‌സിലെ പുതുക്കിയ കൈരളി, ശ്രീ തിയറ്ററുകളുടെ ഉദ്ഘാടന പരിപാടിയിൽ മുഖ്യാതിഥിയായി സംസാരിക്കുകയായിരുന്നു അദ്ദേഹം. വർഷങ്ങൾക്ക് മുൻപ് താൻ അഭിനയിച്ച സിനിമയുടെ പേര് ജാനകി എന്നാണെന്ന് ടി ജി രവി പറഞ്ഞു. ഇക്കണക്കിനാണെങ്കിൽ വാഹനങ്ങൾക്ക് നമ്പർ നൽകുന്ന മാതൃക സിനിമകളുടെ പേരിന് വേണ്ടി വരുമെന്നും അദ്ദേഹം വിമർശിച്ചു.

പ്രവീൺ നാരായണൻ ആണ് ജെഎസ്കെ സംവിധാനം ചെയ്യുന്നത്. അതേസമയം ചിത്രം ശനിയാഴ്ച ഹൈക്കോടതി കാണും. രാവിലെ പത്ത് മണിക്കാണ് ജസ്റ്റിസ് എൻ നഗരേഷ് സിനിമ കാണുക.