ആക്ഷൻ സിനിമകളൊരുക്കി മലയാള സിനിമാ പ്രേക്ഷകരുടെ മനം കവർന്ന സംവിധായകരിൽ ഒരാളാണ് ടിനു പാപ്പച്ചൻ. അദ്ദേഹത്തിന്റെ ആദ്യ ചിത്രമായ സ്വാതന്ത്ര്യം അർദ്ധരാത്രിയിൽ മുതൽ നമുക്ക് ഈ പാറ്റേൺ കാണാൻ കഴിയും. 2023 ൽ കുഞ്ചാക്കോ ബോബനെ നായകനാക്കി ഒരുക്കിയ ചാവേർ ആണ് ടിനു പാപ്പച്ചന്റേതായി ഒടുവിൽ പ്രേക്ഷകരിലേക്കെത്തിയ ചിത്രം.

തിയറ്ററിൽ നിന്ന് സമ്മിശ്ര പ്രതികരണമാണ് ചാവേർ നേടിയതെങ്കിലും മികച്ച നിരൂപക പ്രശംസ ചിത്രത്തിന് ലഭിച്ചിരുന്നു. ലിജോ ജോസ് പെല്ലിശേരിയോടൊപ്പം സഹസംവിധായകനായും ടിനു പ്രവർത്തിച്ചിട്ടുണ്ട്. മോഹൻലാലിനെ നായകനാക്കി ലിജോ ഒരുക്കിയ മലൈക്കോട്ടൈ വാലിബനിലും സഹസംവിധായകനായി ടിനു പ്രവർത്തിച്ചിരുന്നു.

തന്റെ പുതിയ ചിത്രം പ്രഖ്യാപിച്ചിരിക്കുകയാണ് ടിനുവിപ്പോൾ. പുതുമുഖങ്ങളെ അണിനിരത്തിയാണ് പുതിയ ചിത്രമൊരുക്കുന്നത്. "പ്രിയപ്പെട്ടവരേ..സ്വാതന്ത്ര്യം അർദ്ധരാത്രിയിൽ, അജഗജാന്തരം, ചാവേർ എന്നീ സിനിമകൾക്ക് ശേഷം പുതുമുഖങ്ങളെ കേന്ദ്ര കഥാപാത്രമാക്കി ഞാൻ സംവിധാനം ചെയ്യുന്ന പുതിയ സിനിമയുടെ ചിത്രീകരണം ആരംഭിച്ചു. എല്ലാവരോടും സ്നേഹം" - എന്ന കുറിപ്പോടെയാണ് പുതിയ ചിത്രത്തിന്റെ വിശേഷം ടിനു പങ്കുവച്ചിരിക്കുന്നത്.

'ഈ സാഹചര്യത്തിൽ ആ വേദിയിൽ വന്ന് പാടാൻ മാനസിക ബുദ്ധിമുട്ടുണ്ട്; നിങ്ങളേക്കാൾ കൂടുതൽ വിഷമം എനിക്ക്'

ചിത്രത്തിന്റെ ടീസർ ഉടൻ വരുമെന്നും ടിനു കുറിച്ചിട്ടുണ്ട്. എന്നാൽ സിനിമയെ സംബന്ധിക്കുന്ന മറ്റു വിവരങ്ങളൊന്നും പുറത്തുവന്നിട്ടില്ല. കഴിഞ്ഞ വർഷം അജഗജാന്തരത്തിന്റെ സീക്വൽ ചെയ്യാൻ പ്ലാനുണ്ടെന്ന് ടിനു പാപ്പച്ചൻ തന്നെ അറിയിച്ചിരുന്നു.