തുനിവിന്റെ കളക്ഷൻ പൊട്ടിക്കാനായില്ല! വിടാമുയർച്ചി ആദ്യ ദിനം നേടിയത് എത്ര?; കണക്കുകൾ പുറത്ത്

മ​ഗിഴ് തിരുമേനി രചനയും സംവിധാനവും നിർവഹിച്ച് അജിത് നായകനായെത്തിയ വിടാമുയർച്ചി തിയറ്ററുകളിൽ വിജയകരമായി പ്ര​ദർശനം തുടരുകയാണ്. ഫെബ്രുവരി ആറിന് തിയറ്ററുകളിലെത്തിയ ചിത്രത്തിന് സമ്മിശ്ര പ്രതികരണമാണ് ലഭിച്ചത്. 1997 ല്‍ പുറത്തിറങ്ങിയ ഹോളിവുഡ് ചിത്രം ബ്രേക്ക്ഡൗണിൽ നിന്ന് പ്രചോദനമുൾക്കൊണ്ടാണ് സംവിധായകൻ ചിത്രമൊരുക്കിയിരിക്കുന്നത്. ഇപ്പോഴിതാ ചിത്രത്തിന്‍റെ ഓപ്പണിങ് കളക്ഷന്‍ സംബന്ധിച്ചുള്ള ആദ്യ കണക്കുകള്‍ പുറത്തെത്തിയിരിക്കുകയാണ്.

പ്രമുഖ ഇൻഡസ്ട്രി ട്രാക്കിങ് വെബ്‌സൈറ്റായ സാക്നിൽകിന്റെ കണക്കനുസരിച്ച് റിലീസ് ദിവസം വിടാമുയർച്ചി ഇന്ത്യയിൽ നിന്ന് 22 കോടി രൂപ നേടി. ചിത്രത്തിന്റെ തമിഴ് പതിപ്പ് 21.5 കോടി കളക്ഷനാണ് നേടിയത്. ഇതോടെ ഈ വർഷം കോളിവുഡ് സിനിമകളിലെ മികച്ച ഓപ്പണിങ് വിടാമുയർച്ചിയുടെ പേരിലായിരിക്കുകയാണ്. അതേസമയം അജിത്തിന്റെ മുൻ ചിത്രമായ തുനിവ് റിലീസ് ദിവസം ഇന്ത്യയിൽ നിന്ന് 24.4 കോടി രൂപ നേടിയിരുന്നു.

ഇത് മറിക്കടക്കാൻ വിടാമുയർച്ചിയ്ക്ക് ആയില്ല എന്നതും ശ്രദ്ധേയമാണ്. വാരാന്ത്യത്തിൽ വിടാമുയർച്ചിയുടെ കളക്ഷനിൽ കുതിപ്പ് ഉണ്ടാകുമെന്നാണ് സാക്നിൽകിന്റെ വിലയിരുത്തൽ. അജിത് - അർജുൻ - തൃഷ കൂട്ടുകെട്ട് തന്നെയായിരുന്നു ചിത്രത്തിന്റെ ഏറ്റവും വലിയ ഹൈലൈറ്റ്.

തട്ടിപ്പ് കേസ്: മൊഴി നൽകാൻ എത്തിയില്ല; നടൻ സോനു സൂദിനെതിരെ അറസ്റ്റ് വാറന്റ്

ആക്ഷൻ സിനിമയെന്നതിനേക്കാളുപരി ചിത്രം‌ മികച്ചൊരു ത്രില്ലർ ആണെന്നാണ് തിയറ്ററുകളിൽ നിന്ന് ലഭിച്ച ആദ്യ പ്രതികരണങ്ങൾ. അനിരുദ്ധ് രവിചന്ദറാണ് ചിത്രത്തിന് സം​ഗീതമൊരുക്കിയിരിക്കുന്നത്. ലൈക്ക പ്രൊഡക്ഷൻസ് ആണ് ചിത്രത്തിന്റെ നിർമാണം.