ന്യൂഡൽഹി: കോവിഡ് വൈറസ് വകഭേദങ്ങളെക്കുറിച്ചുള്ള അഭ്യൂഹങ്ങളിൽ വിശ്വസിക്കരുതെന്ന് കേന്ദ്രസർക്കാർ. കോവിഡിനെതിരായ പോരാട്ടത്തിൽ പ്രധാനപ്പെട്ട നാലുകാര്യങ്ങൾ പാലിക്കുകയാണ് വേണ്ടതെന്നും കേന്ദ്ര വാർത്താവിതരണ പ്രക്ഷേപണ വകുപ്പ് ട്വിറ്ററിൽ കുറിച്ചു. 

പകർച്ചവ്യാധിക്കെതിരായ പോരാട്ടത്തിൽ എ, ബി, സി, ഡി, എന്നീ നാലുകാര്യങ്ങൾ കൃത്യമായി പാലിക്കുക. എ എന്നാൽ അഡ്‍വൈസ് (ഉപദേശം), ബി എന്നാൽ ബിലീവ് (വിശ്വാസം), സി എന്നാൽ ക്രോസ്ചെക്ക് (പരിശോധിക്കുക), ഡി എന്നാൽ ഡു നോട്ട് ഫിയർ (ഭയം പ്രചരിപ്പിക്കരുത്).' ഐ ബി മന്ത്രാലയം വ്യക്തമാക്കി. 

കഴിഞ്ഞ ഡിസംബറിലാണ് ഡെൽറ്റ വകഭേദം ഇന്ത്യയിൽ പ്രത്യക്ഷപ്പെട്ടത്. 'വളരെ മോശപ്പെട്ട വകഭേദം' എന്നാണ് ഡെൽറ്റ വകഭേദത്തെ യുഎസ് ഉന്നത ഉപദേഷ്ടാവ് ഡോ. അന്തോണി ഫൗസി വിശേഷിപ്പിച്ചത്. എത്രയും പെട്ടെന്ന് ജനങ്ങൾ കോവിഡ് വാക്സീൻ എടുക്കണമെന്നും അദ്ദേഹം ആവശ്യപ്പെട്ടു.