ന്യൂഡല്‍ഹി: കേന്ദ്രസര്‍ക്കാരിന്റെ കാര്‍ഷിക നിയമങ്ങള്‍ക്ക് എതിരെയുള്ള സമരം വ്യാപിപ്പിക്കാന്‍ കര്‍ഷക സംഘടനകളുടെ തീരുമാനം. ബജറ്റ് അവതരണ ദിനമായ ഫെബ്രുവരി ഒന്നിന് പാര്‍ലമെന്റിലേക്ക് മാര്‍ച്ച് നടത്തുമെന്ന് കര്‍ഷക സംഘടനകളുടെ യോഗത്തിന് ശേഷം ക്രാന്തികാരി കിസാന്‍ യൂണിയന്‍ നേതാവ് ദര്‍ശന്‍ പാല്‍ മാധ്യമങ്ങളോട് പറഞ്ഞു. പല സ്ഥലങ്ങളില്‍ നിന്നാകും പാര്‍ലമെന്റ് വളയുകയെന്നും അദ്ദേഹം പറഞ്ഞു. 

അതേസമയം, റിപ്പബ്ലിക് ദിനമായ നാളെ നടത്താന്‍ തീരുമാനിച്ച ട്രാക്ടര്‍ റാലിയില്‍ നിന്ന് പിന്നോട്ടില്ലെന്നും കര്‍ഷകര്‍ വ്യക്തമാക്കി. ഒന്‍പത് ഭാഗങ്ങളില്‍ നിന്നും റാലി നടത്തുമെന്നും സ്വരാജ് ഇന്ത്യ നേതാവ് യോഗേന്ദ്ര യാദവ് പറഞ്ഞു. 

രാവിലെ 11.30ഓടെ റിപ്പബ്ലിക് ദിന ആഘോഷങ്ങള്‍ അവസാനിപ്പിച്ച ശേഷം റാലി നടത്താനാണ് കര്‍ഷകര്‍ക്ക് ഡല്‍ഹി പൊലീസ് അനുമതി നല്‍കിയിരിക്കുന്നത്. ഇതിനായി റൂട്ടു മാപ്പും നല്‍കിയിട്ടുണ്ടുണ്ട്. തങ്ങളുടെ പ്രകടനം സമാധാനപരമായിരിക്കുമെന്ന് കര്‍ഷക നേതാക്കളും അറിയിച്ചിട്ടുണ്ട്.ഡല്‍ഹി അതിര്‍ത്തികളായ തിക്രിയിലും സിംഘുവിലും ട്രാക്ടര്‍ റാലിയുടെ റിഹേഴ്‌സല്‍ നടത്തി. രാജ്യത്തിന്റെ വിവിധ ഭാഗങ്ങളില്‍ നിന്ന് കര്‍ഷകര്‍ ട്രാക്ടറുകളുമായി ഡല്‍ഹി അതിര്‍ത്തികളിലേക്ക് എത്തുകയാണ്.