ഗ്യാനേഷ് കുമാറിനെതിരെ ക്രിമിനല്‍ നടപടി വേണമെന്ന് ഹര്‍ജി, മരംമുറി കേസില്‍ വീണ്ടും കുറ്റപത്രം, സിജെപി നേതാക്കള്‍ക്ക് നോട്ടീസ്...; ഇന്നത്തെ 5 പ്രധാന വാര്‍ത്തകള്‍

മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനു നേരെ പ്രതിഷേധം ശക്തമാകുന്നു. ഗ്യാനേഷ് കുമാര്‍ രാജിവെച്ചില്ലെങ്കില്‍ ഒക്ടോബര്‍ 2 മുതല്‍ പ്രക്ഷോഭം ആരംഭിക്കുമെന്ന് സിജെപി പ്രഖ്യാപിച്ചതിനിടെ, അദ്ദേഹത്തിനെതിരെ നടപടി വേണമെന്ന് ആവശ്യപ്പെട്ട് സുപ്രീംകോടതിയില്‍ ഹര്‍ജിയെത്തി. ഡല്‍ഹി പ്രക്ഷോഭത്തിനിടെ യുവതിയുടെ ചിത്രം മോര്‍ഫ് ചെയ്‌തെന്ന കേസില്‍ സിജെപി നേതാക്കള്‍ക്ക് ഹൈക്കോടതി നോട്ടീസ് നല്‍കി. മുട്ടില്‍ മരംമുറി കേസില്‍ വനംവകുപ്പ് പുതിയ കുറ്റപത്രം സമര്‍പ്പിച്ചു. ഇവയുള്‍പ്പെടെ ഇന്നത്തെ അഞ്ച് പ്രധാന വാര്‍ത്തകള്‍ ചുവടെ.

വോട്ടർപട്ടികയുടെ സമഗ്ര പുതുക്കൽ പ്രക്രിയയിൽ ഔദ്യോഗിക പദവി ദുരുപയോഗം ചെയ്യുകയും നിയമപരമായ ചുമതലകൾ ബോധപൂർവ്വം ലംഘിക്കുകയും ചെയ്തെന്ന് ആരോപിച്ച് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ക്രിമിനൽ നടപടി ആവശ്യപ്പെട്ട് സുപ്രീം കോടതിയിൽ ഹർജി. ഭരണഘടനയുടെ അനുച്ഛേദം 32 പ്രകാരം സുപ്രീം കോടതി അഭിഭാഷകനായ ശൈലേന്ദ്ര മണി ത്രിപാഠിയാണ് പൊതുതാൽപ്പര്യ ഹർജി ഫയൽ ചെയ്തത്. 

രാജ്യത്ത് 18 വയസ്സ് തികഞ്ഞ ജെന്‍-സികളെ വോട്ടര്‍ പട്ടികയില്‍ ഉള്‍പ്പെടുത്തുന്നതിനുള്ള നടപടികള്‍ 2024 മുതല്‍ നിലച്ചതായി റിപ്പോര്‍ട്ട്. തെരഞ്ഞെടുപ്പ് കമ്മീഷനുള്ളിലെ ആഭ്യന്തര തര്‍ക്കങ്ങളെക്കുറിച്ചുള്ള വെളിപ്പെടുത്തലിന് പിന്നാലെയാണ് പുതിയ റിപ്പോര്‍ട്ട് വന്നിരിക്കുന്നത്.

മുട്ടിൽ മരംമുറിക്കേസിൽ നേരത്തെയുണ്ടായിരുന്ന പിഴവുകൾ തിരുത്തി വനം വകുപ്പ് പുതുക്കിയ കുറ്റപത്രം സമർപ്പിച്ചു. സുൽത്താൻ ബത്തേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതിയിലാണ് കുറ്റപത്രം വീണ്ടും സമർപ്പിച്ചത്. ഹൈക്കോടതിയുടെ സ്റ്റേ ഉത്തരവാണ് കുറ്റപത്രം സമർപ്പിക്കുന്നത് വൈകാൻ കാരണമായതെന്ന് വനം വകുപ്പ് ഉദ്യോഗസ്ഥർ വ്യക്തമാക്കി.

സംസ്ഥാനത്തെ പരിസ്ഥിതി ലോല പ്രദേശ ( ഇഎസ്എ) പട്ടികയില്‍ നിന്നും ജനവാസ മേഖലയെ ഒഴിവാക്കണമെന്ന് സര്‍ക്കാര്‍. പരിസ്ഥിതി ലോല മേഖലാ വിസ്തൃതി കുറയ്ക്കണം. തോട്ടങ്ങളെയും കൃഷി സ്ഥലങ്ങളെയും ജനവാസ മേഖലകളെയും പൂര്‍ണമായും ഒഴിവാക്കിക്കൊണ്ടും, വന മേഖലകളില്‍ മാത്രം ഇഎസ്എ നിര്‍ണയിച്ചുകൊണ്ടും അന്തിമ വിജ്ഞാപനം പുറപ്പെടുവിക്കണമെന്നാണ് സംസ്ഥാന സര്‍ക്കാരിന്റെ ആവശ്യമെന്ന് മന്ത്രി സണ്ണി ജോസഫ് വ്യക്തമാക്കി.

യുവതിയുടെ അനുവാദമില്ലാതെ മോര്‍ഫ് ചെയ്ത് പ്രചരിപ്പിച്ച അശ്ലീല ചിത്രങ്ങളും ലിങ്കുകളും 24 മണിക്കൂറിനുള്ളില്‍ പ്ലാറ്റ്ഫോമുകളില്‍ നിന്ന് നീക്കം ചെയ്യാന്‍ മെറ്റയോട് ഡല്‍ഹി ഹൈക്കോടതി ഉത്തരവിട്ടു. യുവതിയുടെ പരാതിയെത്തുടര്‍ന്നാണ് കോടതിയുടെ കര്‍ശന നടപടി. സംഭവവുമായി ബന്ധപ്പെട്ട് സിജെപി നേതാക്കളായ സൗരവ് ദാസ്, അഭിജീത് ദീപ്‌കെ, അശുതോഷ് രങ്ക, രത്‌ന സിങ് എന്നിവര്‍ക്ക് ഹൈക്കോടതി നോട്ടീസ് അയച്ചു.