ഹൈദരാബാദ്: ആന്ധ്രാപ്രദേശില്‍ തെലുങ്ക് പുതുവര്‍ഷം ഉഗാഡി ആഘോഷങ്ങളുടെ ഭാഗമായി കോവിഡ് മാനദണ്ഡങ്ങള്‍ ലംഘിച്ച് നാട്ടുകാര്‍. സാമൂഹിക അകലം പാലിക്കാതെ തടിച്ചൂകൂടിയ നാട്ടുകാര്‍ ചടങ്ങുകളുടെ ഭാഗമായി ചാണക വറളി മുകളിലേക്ക് വലിച്ചെറിഞ്ഞാണ് ആഘോഷിച്ചത്.

കര്‍നൂള്‍ കൈരുപ്പാല ഗ്രാമത്തില്‍ ബുധനാഴ്ചയാണ്  തെലുങ്ക് പുതുവര്‍ഷത്തോടനുബന്ധിച്ച് ഗ്രാമവാസികളുടെ വ്യത്യസ്തമായ ആഘോഷ പരിപാടി നടന്നത്. രണ്ടു ചേരിയായി നിന്ന് നാട്ടുകാര്‍ പരസ്പരം ചാണക വറളി വലിച്ചെറിയുന്ന ദൃശ്യങ്ങള്‍ പുറത്തുവന്നിട്ടുണ്ട്. വീരഭദ്ര സ്വാമിയുടെ ഘോഷയാത്ര നടക്കുന്നതിനിടെയായിരുന്നു വ്യത്യസ്തമായ ചടങ്ങ്. 

കോവിഡ് രാജ്യത്ത് വീണ്ടും പിടിമുറുക്കുന്നതിനിടെയാണ്, കോവിഡ് മാനദണ്ഡങ്ങള്‍ ലംഘിച്ച് നാട്ടുകാര്‍ തടിച്ചുകൂടിയത്. വര്‍ഷങ്ങളായി നടന്നുവരുന്ന ചടങ്ങിന്റെ ഭാഗമായി ഒരു മാസം മുന്‍പ് തന്നെ ചാണക വറളികള്‍ ഗ്രാമവാസികള്‍ തയ്യാറാക്കി വെയ്ക്കും.