പശുവിന്റെ മുന്നിൽ മൂത്രമൊഴിച്ച ആൾക്ക് മർദ്ദനം; വിഡിയോ വൈറൽ, ഒരാൾ അറസ്റ്റിൽ 

ഭോപ്പാൽ:  പശുവിന്റെ മുന്നിൽ മൂത്രമൊഴിച്ച ആളെ മർദ്ദിച്ച കേസിൽ ഒരാൾ അറസ്റ്റിൽ. സംഭവത്തിന്റെ വിഡിയോ വൈറലായതിന് പിന്നാലെയാണ് അറസ്റ്റ്. മധ്യപ്രദേശിലെ രത്‌ലം ജില്ലയിലാണ് സംഭവം. 

പശുവിന്റെ മുന്നിൽ മൂത്രമൊഴിച്ചുവെന്നാരോപിച്ച് സെയ്ഫുദ്ദീൻ പട്‌ലിവാല എന്നയാളെ റാത്തോഡ് എന്നൊരാൾ മർദ്ദിക്കുന്ന വിഡിയോ സോഷ്യൽ മീഡിയയിൽ വൈറലായിരുന്നു. മൂത്രമൊഴിച്ചതിന് സെയ്ഫുദ്ദീൻ മാപ്പ് ചോദിച്ചിട്ടും റാത്തോഡ് മർദ്ദിക്കുകയായിരുന്നു. 

വിഡിയോ വ്യാപകമായി പ്രചരിച്ചതിന് പിന്നാലെ പൊലീസ് ഇരയെ കണ്ടെത്തി. ഇയാളുടെ പരാതിയെത്തുടർന്നാണ്  പ്രതിയെ അറസ്റ്റ് ചെയ്തത്. ഐപിസി സെക്ഷൻ 323 സ്വമേധയാ വേദനിപ്പിക്കൽ, 294 അശ്ലീല പ്രവർത്തനം, 506 ക്രിമിനൽ ഭീഷണിപ്പെടുത്തൽ എന്നീ വകുപ്പുകൾ പ്രകാരമാണ് കേസെടുത്തത്.