ഭോപ്പാല്‍: എല്ലാ മാധ്യമപ്രവര്‍ത്തകര്‍ക്കും കുടുംബാംഗങ്ങള്‍ക്കും സൗജന്യമായി കോവിഡ് ചികിത്സ നല്‍കുമെന്ന് മധ്യപ്രദേശ് മുഖ്യമന്ത്രി ശിവരാജ്‌സിങ് ചൗഹാന്‍. അക്രഡിറ്റേഷന്‍ ഉള്ളവര്‍ക്കും ഇല്ലാത്തവര്‍ക്കും ചികിത്സസഹായം ലഭിക്കുമെന്നും അദ്ദേഹം പറഞ്ഞു.

അക്രഡിറ്റേഷന്‍ ഉള്ള മാധ്യമപ്രവര്‍ത്തകരെ കോവിഡ് മുന്നണി പോരാളികളായി കഴിഞ്ഞ ദിവസം മുഖ്യമന്ത്രി പ്രഖ്യാപിച്ചിരുന്നു. അതിന് പിന്നാലെയാണ് എല്ലാ മാധ്യമപ്രവര്‍ത്തകര്‍ക്കും കോവിഡ് ചികിത്സ സൗജന്യമാക്കുമെന്ന മുഖ്യമന്ത്രിയുടെ പ്രഖ്യാപനം.ജോലി ചെയ്യുന്നതിനിടെ നിരവധി മാധ്യമപ്രവര്‍ത്തകര്‍ക്കാണ് കോവിഡ് ബാധിച്ചത്. ചിലര്‍ മരിക്കുകയും ചെയ്തതായും മുഖ്യമന്ത്രി പറഞ്ഞു.

സംസ്ഥാനത്തെ എല്ലാ മാധ്യമപ്രവര്‍ത്തകര്‍ക്കും സൗജന്യമായി കോവിഡ് ചികിത്സ നല്‍കും. അത് അക്രഡിറ്റേഷന്‍ ഉള്ളവര്‍ക്കും അല്ലാത്തവര്‍ക്കും ലഭിക്കും. അച്ചടി, ഇലക്ട്രോണിക്, ഡിജിറ്റല്‍ മാധ്യമങ്ങളില്‍ ജോലി ചെയ്യുന്നവര്‍ക്കും അവരുടെ കുടുംബാംഗങ്ങള്‍ക്കും സൗജന്യ ചികിത്സ നല്‍കുമെന്നും മുഖ്യമന്ത്രി പറഞ്ഞു.