'ആകെയുള്ള സമ്പാദ്യം 600 രൂപ; ശരീരം തകർന്നു'; ചെയ്യാത്ത കുറ്റത്തിന് 20 വർഷം ജയിലിൽ; മോചിതനായ 43 കാരൻ പറയുന്നു

ലക്നൗ: ബലാത്സം​ഗക്കേസിൽ 20 വർഷം തടവുശിക്ഷ അനുഭവിച്ചയാൾ നിരപരാധിയെന്ന് കോടതി. അലഹബാ​ദ് കോടതിയാണ് ബലാത്സം​ഗക്കേസിൽ വിഷ്ണു തിവാരിയെ കുറ്റവിമുക്തനാക്കിയത്. ബുധനാഴ്ച വൈകീട്ട് ഇയാൾ ആ​ഗ്ര ജയിലിൽ നിന്നും പുറത്തിറങ്ങി. 

കഴിഞ്ഞ 20 വർഷമായി താൻ ജയിലിലാണ്​. എൻറെ കുടുംബവും ശരീരവും തകർന്നിരിക്കുന്നു. എനിക്ക്​ ഒരു സഹോദരൻ മാത്രമാണുള്ളത്​. ഞാൻ വിവാഹം കഴിച്ചിട്ടില്ല. ജയിലിലെ അടുക്കളയിൽ ജോലിയെടുത്താണ്​ എൻറെ കൈകൾ ഇങ്ങനെയായത്​. ജയിലിൽ നിന്നിറങ്ങുമ്പോൾ അധികൃതർ നൽകിയ 600 രൂപ മാത്രമാണുള്ളതെന്നും വിഷ്​ണു തിവാരി പറഞ്ഞു.

2000, സെപ്​റ്റംബർ 16നാണ്​ തിവാരിയെ പൊലീസ്​ അറസ്റ്റ്​ ചെയ്തത്. ബലാത്സംഗം, പട്ടികജാതി-പട്ടിക വർഗക്കാർക്കെതിരായ അതിക്രമം തുടങ്ങിയ വകുപ്പുകൾ പ്രകാരമായിരുന്നു കേസ്​. മൂന്ന്​ വർഷത്തിന്​ ശേഷം ലാലിത്​പൂരിലെ കോടതി വിഷ്​ണു തിവാരിയെ 10 വർഷം തടവിന്​ ശിക്ഷിച്ചു. പിന്നീട്​ എസ്​സി, എസ്​ടി ആക്​ട്​ പ്രകാരം ജീവപര്യന്തം തടവിനും ശിക്ഷിച്ചു.

ജോലി സ്ഥലത്തേക്ക്​ പോകുന്നതിനിടെ പെൺകുട്ടിയെ ബലാത്സംഗത്തിനിരയാക്കിയെന്നായിരുന്നു ഇയാൾക്കെതിരായ പരാതി. പെൺകുട്ടിക്ക്​ നേരെ ബലാത്സംഗശ്രമമുണ്ടായിട്ടില്ലെന്ന്​ വിശദമായ പരിശോധനയിൽ വ്യക്​തമായതായി അലഹബാദ്​ ഹൈക്കാടതി അറിയിച്ചു. പീഡനത്തിനിരയായെന്ന്​ പറയുന്ന യുവതിക്ക്​ ആന്തരികമായ മുറിവുകളില്ലെന്നും കോടതി വ്യക്​തമാക്കി. ഇതോടെയാണ്​ വിഷ്​ണു തിവാരിയെ അലഹാബാദ്​ ഹൈകോടതി കുറ്റവിമുക്​തനാക്കിയത്​.