സിനിമ തിയേറ്ററുകളില്‍ മുഴുവന്‍ സീറ്റിലും ആളെ പ്രവേശിപ്പിക്കാന്‍ തീരുമാനം ; തമിഴ്‌നാട് സര്‍ക്കാരിന്റെ ഉത്തരവിറങ്ങി ; 'മാസ്റ്റര്‍' തീയേറ്ററിലേക്ക്

ചെന്നൈ : തമിഴ്‌നാട്ടില്‍ തീയേറ്ററുകളില്‍ മുഴുവന്‍ സീറ്റിലും കാണികളെ പ്രവേശിപ്പിക്കാന്‍ തീരുമാനം. കോവിഡ് നിയന്ത്രണങ്ങളില്‍ ഇളവു വരുത്തി തമിഴ്‌നാട് സര്‍ക്കാര്‍ ഉത്തരവ് പുറപ്പെടുവിച്ചു. സിനിമാ തിയേറ്ററുകളിലും മള്‍ട്ടി പ്ലക്‌സുകളിലും എല്ലാം 50 ശതമാനം പേരെ പ്രവേശിപ്പിക്കാനായിരുന്നു അനുമതി ഉണ്ടായിരുന്നത്. 

പുതിയ ഉത്തരവോടെ എല്ലാ സീറ്റിലും ആളെ ഇരുത്താനാകും. തീയേറ്ററുകളില്‍ എല്ലാ സീറ്റിലേക്കും ആളെ പ്രവേശിപ്പിക്കണമെന്ന് ആവശ്യപ്പെട്ട് നടന്‍ വിജയ് കഴിഞ്ഞദിവസം മുഖ്യമന്ത്രി എടപ്പാടി പളനിസ്വാമിയെ കണ്ടിരുന്നു. 

സര്‍ക്കാര്‍ ഉത്തരവിന് പിന്നാലെ, വിജയിന്റെ മാസ്റ്റര്‍ സിനിമ പൊങ്കല്‍ റിലീസായി തിയേറ്ററുകളിലെത്തുമെന്ന് അണിയറ പ്രവര്‍ത്തകര്‍ അറിയിച്ചു. ഈ മാസം 13 നാണ് മാസ്റ്റര്‍ തിയേറ്ററുകളിലെത്തുക. 

തമിഴ്‌നാട്ടില്‍ ഞായറാഴ്ച 867 പുതിയ കോവിഡ് കേസുകളാണ് റിപ്പോര്‍ട്ട് ചെയ്തത്. 10 മരണവും റിപ്പോര്‍ട്ട് ചെയ്തു. ചെന്നൈ, അരിയാലൂര്‍, പെരമ്പലൂര്‍ തുടങ്ങിയ പ്രദേശങ്ങളിലാണ് കൂടുതല്‍ രോഗബാധ സ്ഥിരീകരിച്ചത്.