ട്രാക്കിനോട് ചേര്‍ന്ന് ടിക് ടോക് വീഡിയോ ഷൂട്ട്; ട്രെയിന്‍ 17കാരനെ ഇടിച്ചുതെറിപ്പിച്ചു- വീഡിയോ 

ഹൈദരാബാദ്: തെലങ്കാനയില്‍ ട്രാക്കിന് അരികിലൂടെ നടന്നുപോകുന്ന വീഡിയോ ചിത്രീകരിക്കുന്നതിനിടെ, പിന്നില്‍ നിന്ന് വന്ന ട്രെയിന്‍ ഇടിച്ചു ബിടെക് വിദ്യാര്‍ഥിക്ക് ഗുരുതര പരിക്ക്. 17വയസുള്ള ചിന്താകുല അക്ഷയ് രാജുവാണ് അപകടത്തില്‍പ്പെട്ടത്.

ഹനംകൊണ്ട ജില്ലയിലെ കാസിപേട്ട് റെയില്‍വേ സ്റ്റേഷന് സമീപമാണ് സംഭവം. സോഷ്യല്‍മീഡിയയില്‍ പങ്കുവെയ്ക്കാന്‍ ഉദ്ദേശിച്ച് കൂട്ടുകാര്‍ക്കൊപ്പം ചേര്‍ന്ന് വീഡിയോ ചിത്രീകരിക്കുന്നതിനിടെയാണ് അപകടം ഉണ്ടായത്. ട്രാക്കിന് അരികിലൂടെ നടന്നുപോകുമ്പോള്‍ ട്രെയിന്‍ വരുന്ന ടിക് ടോക് വീഡിയോ മൊബൈലില്‍ ചിത്രീകരിക്കാനാണ് പദ്ധതിയിട്ടത്.

ഇതനുസരിച്ച് ഇരുപോക്കറ്റിലും കൈയിട്ട് ട്രാക്കിന് സമീപത്തുകൂടി നടന്നുപോകുമ്പോഴാണ് പിന്നില്‍ നിന്ന് വന്ന ട്രെയിന്‍ അക്ഷയ് രാജുവിനെ ഇടിച്ചത്. മുന്നില്‍ നിന്ന് കൂട്ടുകാര്‍ വീഡിയോ ചിത്രീകരിക്കുന്നതിനിടെയാണ് സംഭവം.

ട്രെയിന്‍ പിന്നില്‍ നിന്ന് വരുമ്പോള്‍ ഒച്ചയെടുത്ത് കൂട്ടുകാര്‍ അക്ഷയ് രാജുവിന് മുന്നറിയിപ്പ് നല്‍കുന്നതും വീഡിയോയില്‍ കേള്‍ക്കാം. ഇടിയുടെ ആഘാതത്തില്‍ അക്ഷയ് രാജു തെറിച്ചുവീണു. എന്‍ജിനീയറിങ് വിദ്യാര്‍ഥിയായ അക്ഷയ് രാജുവിനെ വാറങ്കലിലെ എംജിഎം ആശുപത്രിയിലാണ് പ്രവേശിപ്പിച്ചത്.

ഈ വാര്‍ത്ത കൂടി വായിക്കൂ 

ജയന്റ് വീല്‍ തകര്‍ന്നുവീണു; കുട്ടികള്‍ ഉള്‍പ്പെടെ പത്തുപേര്‍ക്ക് പരിക്ക്- വീഡിയോ 

സമകാലിക മലയാളം ഇപ്പോള്‍ വാട്ട്‌സ്ആപ്പിലും ലഭ്യമാണ്‌. ഏറ്റവും പുതിയ വാര്‍ത്തകള്‍ അറിയാന്‍ ക്ലിക്ക് ചെയ്യൂ