നാഗ്പുർ: കാമുകനെ വിവാഹം കഴിക്കാനായി, കൂട്ട ബലാത്സംഗത്തിന് ഇരയായതായി വ്യാജ പരാതി നൽകി പൊലീസിനെ വട്ടംകറക്കി 19 വയസ്സുകാരി. തിങ്കളാഴ്ച രാവിലെയാണ് യുവതി പൊലീസിൽ പരാതി നൽകിയത്. ഇതിന്റെ അടിസ്ഥാനത്തിൽ കേസ് അന്വേഷിച്ചത് നൂറിലേറെപ്പേരാണ്. 

യുവതിയുടെ പരാതിയുടെ അടിസ്ഥാനത്തിൽ പൊലീസ് 250 ലധികം സിസി ടിവി ദൃശ്യങ്ങളാണ് പരിശോധിച്ചത് പിന്നാലെയാണ് യുവതിയുടെ പരാതി വ്യാജമാണെന്ന് മനസിലായത്. പിന്നീട് ആൺ സുഹൃത്തിനെ വിവാഹം കഴിക്കാൻ തയാറാക്കിയ പദ്ധതി പ്രകാരമാണു കള്ളക്കേസ് നൽകിയതെന്നു യുവതി സമ്മതിച്ചതായും പൊലീസ് ഉദ്യോഗസ്ഥർ പറഞ്ഞു. എന്നാൽ തന്റെ പദ്ധതി എന്താണെന്നു യുവതി വ്യക്തമാക്കിയില്ല.

നാഗ്പുരിൽ, ആളൊഴിഞ്ഞ സ്ഥലത്തുവച്ചു 2 പേർ വാഹനത്തിൽ ബലമായി പിടിച്ചു കയറ്റിക്കൊണ്ടുപോയി പീഡിപ്പിക്കുകയായിരുന്നു എന്നായിരുന്നു പരാതി. കേസന്വേഷണത്തിനായി 40 സംഘങ്ങളെയാണു നിയോഗിച്ചത്.  50 പേരെ പൊലീസ് ചോദ്യം ചെയ്തു. 

എന്നാൽ സിസിടിവി ദൃശ്യങ്ങൾ പരിശോധിച്ചപ്പോൾ യുവതി പല ഇടങ്ങളിലും കറങ്ങി നടന്നശേഷം പൊലീസ് സ്റ്റേഷനിലെത്തി പരാതി നൽകുകയായിരുന്നെന്ന് പൊലീസ് കണ്ടെത്തി. തുടർന്ന് നടത്തിയ അന്വേഷണത്തിലാണ് യുവതി വ്യാജ പരാതി നൽകുകയായിരുന്നെന്ന് അറിയിച്ചത്.