'നന്നായി വാദിച്ചു', അഭിഭാഷകനായി പ്രാക്ടീസ് ചെയ്യാമെന്ന് ജഡ്ജി; ഇപ്പോള്‍ സന്തുഷ്ടനാണെന്ന് മറുപടി നല്‍കി കെജരിവാള്‍

ന്യൂഡല്‍ഹി: നന്നായി വാദിച്ചുവെന്നും അഭിഭാഷകനായി പ്രാക്ടീസ് ചെയ്യാമെന്നും കെജരിവാളിനോട് ഡല്‍ഹി ഹൈക്കോടതി ജഡ്ജി. മദ്യനയക്കേസില്‍ തന്നെ വിചാരണ ചെയ്യുന്നതില്‍ നിന്ന് ജസ്റ്റിസ് സ്വര്‍ണ്ണ കാന്ത ശര്‍മ പിന്മാറണമെന്ന് ആവശ്യപ്പെട്ട് ഡല്‍ഹി മുന്‍ മുഖ്യമന്ത്രി അരവിന്ദ്കെജരിവാള്‍ തിങ്കളാഴ്ച ഡല്‍ഹി ഹൈക്കോടതിയില്‍ വാദിക്കുന്നതിനിടെയായിരുന്നു ജഡ്ജിയുടെ പരാമര്‍ശം. എന്നാല്‍ തന്റെ ഇപ്പോഴത്തെ പ്രവര്‍ത്തനങ്ങളില്‍ താന്‍ സന്തുഷ്ടനാണെന്നായിരുന്നു കെജരിവാളിന്റെ മറുപടി.

മദ്യനയക്കേസില്‍ തന്നെയും മറ്റ് പ്രതികളെയും വിട്ടയച്ച വിചാരണ കോടതി ഉത്തരവിനെതിരെ സിബിഐ നല്‍കിയ ഹര്‍ജി പരിഗണിക്കുന്നതില്‍ നിന്ന് ജസ്റ്റിസ് പിന്മാറണമെന്ന് ആവശ്യപ്പെട്ട് കെജ്രിവാള്‍ നടത്തിയ ഒരു മണിക്കൂര്‍ നീണ്ട വാദത്തിനൊടുവിലാണ് ജസ്റ്റിസ് സ്വര്‍ണ്ണ കാന്ത ശര്‍മ ഇക്കാര്യം പറഞ്ഞത്. 'നിങ്ങള്‍ നന്നായി വാദിച്ചു. നിങ്ങള്‍ക്ക് ഒരു വക്കീലാകാന്‍ സാധിക്കും ജഡ്ജി കെജ്രിവാളിനോട് പറഞ്ഞു. മുന്‍ ഐആര്‍എസ് ഉദ്യോഗസ്ഥന്‍ കൂടിയായ കെജരിവാള്‍ തന്റെ ഇപ്പോഴത്തെ മേഖലയില്‍ സന്തോഷവാനാണെന്ന് പ്രതികരിച്ചപ്പോള്‍, എഎപി നേതാവ് മനീഷ് സിസോദിയയ്ക്ക് വേണ്ടി ഹാജരായ മുതിര്‍ന്ന അഭിഭാഷകന്‍ സഞ്ജയ് ഹെഗ്ഡെ 'മത്സരം വര്‍ദ്ധിപ്പിക്കരുത്' എന്ന് കെജരിവാളിനോട് തമാശരൂപേണ പറഞ്ഞു.

തിങ്കളാഴ്ച ഉച്ചയ്ക്ക് 2.30-ന് ആരംഭിച്ച വാദം വൈകുന്നേരം 7 മണി വരെ നീണ്ടുനിന്നു. എല്ലാ കക്ഷികളുടെയും വാദം കേട്ട ശേഷം പിന്മാറ്റ വിഷയത്തില്‍ കോടതി വിധി പറയാനായി മാറ്റി. ഞാന്‍ ഏതാണ്ട് കുറ്റവാളിയായി പ്രഖ്യാപിക്കപ്പെട്ടിരുന്നു. ഞാന്‍ അഴിമതിക്കാരനാണെന്ന് ഏകദേശം ഉറപ്പിക്കപ്പെട്ടു. കേവലം ശിക്ഷാവിധി പ്രഖ്യാപിക്കല്‍ മാത്രമേ ബാക്കിയുണ്ടായിരുന്നുള്ളൂ, അദ്ദേഹം പറഞ്ഞു. കെജരിവാള്‍ നേരിട്ട് കോടതിയില്‍ വാദങ്ങള്‍ ഉന്നയിക്കുന്ന ആദ്യ സംഭവമല്ല ഇത്.

2024 മാര്‍ച്ച് 28-ന്, ഇതുമായി ബന്ധപ്പെട്ട കേസില്‍ എന്‍ഫോഴ്സ്മെന്റ് ഡയറക്ടറേറ്റിന്റെ കസ്റ്റഡി കാലാവധി ട്രൈബ്യൂണല്‍ കോടതി നീട്ടിയപ്പോള്‍, അധികാരത്തിലിരിക്കുന്ന ഒരു മുഖ്യമന്ത്രിയെ അറസ്റ്റ് ചെയ്യാന്‍ ആവശ്യമായ തെളിവുകളുണ്ടോ എന്ന് കെജ്രിവാള്‍ നേരിട്ട് വിചാരണാ ജഡ്ജിയോട് ചോദിച്ചിരുന്നു. മുതിര്‍ന്ന അഭിഭാഷകന്‍ ഹാജരായിട്ടുണ്ടായിരുന്നിട്ടും നേരിട്ട് വാദങ്ങള്‍ ഉന്നയിക്കാന്‍ അന്ന് വിചാരണാ കോടതി അദ്ദേഹത്തിന് അനുമതി നല്‍കിയിരുന്നു. ഫെബ്രുവരി 27 ന് വിചാരണ കോടതി കെജ്രിവാളിനെയും സിസോദിയയെയും മറ്റ് 21 പേരെയും കേസില്‍ നിന്ന് വിട്ടയച്ചിരുന്നു. സിബിഐയുടെ കേസ് നിയമപരമായ പരിശോധനകളെ അതിജീവിക്കാന്‍ ഒട്ടും പ്രാപ്തമല്ലെന്നും അത് പൂര്‍ണമായും വിശ്വാസയോഗ്യമല്ലെന്നും പറഞ്ഞുകൊണ്ട് കോടതി സിബിഐയെ രൂക്ഷമായി വിമര്‍ശിക്കുകയും ചെയ്തിരുന്നു. എന്നാല്‍, കുറ്റം ചുമത്തുന്ന ഘട്ടത്തില്‍ വിചാരണ കോടതി നടത്തിയ ചില നിരീക്ഷണങ്ങളും കണ്ടെത്തലുകളും പ്രഥമദൃഷ്ട്യാ തെറ്റാണെന്നും അവ പരിഗണിക്കേണ്ടതുണ്ടെന്നും ചൂണ്ടിക്കാട്ടി, മാര്‍ച്ച് 9-ന് ജസ്റ്റിസ് ശര്‍മ വിട്ടയച്ച 23 പ്രതികള്‍ക്കും സിബിഐ നല്‍കിയ ഹര്‍ജിയില്‍ നോട്ടീസ് അയച്ചു. കൂടാതെ, മദ്യനയക്കേസിലെ സിബിഐ അന്വേഷണ ഉദ്യോഗസ്ഥനെതിരെ വകുപ്പുതല നടപടി ആരംഭിക്കണമെന്ന വിചാരണ കോടതിയുടെ ശുപാര്‍ശയും സ്റ്റേ ചെയ്തു.