പ്രതിപക്ഷ ഉപനേതാവ്: സിപിഐയെ അനുനയിപ്പിക്കാന്‍ സിപിഎം; ബിനോയ് വിശ്വവുമായി ഇന്ന് ചര്‍ച്ച

തിരുവനന്തപുരം: പ്രതിപക്ഷ ഉപനേതാവ് പദവിയില്‍ ഉടക്കി നില്‍ക്കുന്ന സിപിഐയെ അനുനയിപ്പിക്കാന്‍ ഇന്ന് ചര്‍ച്ച നടക്കും. ഇടതുമുന്നണി കണ്‍വീനര്‍ ടിപി രാമകൃഷ്ണന്‍ സിപിഐ സംസ്ഥാന സെക്രട്ടറി ബിനോയ് വിശ്വവുമായിട്ടാണ് ചര്‍ച്ച നടത്തുന്നത്. സിപിഐ ആസ്ഥാനമായ എംഎന്‍ സ്മാരകത്തില്‍ വെച്ചാണ് ചര്‍ച്ച. വിഷയം ഇന്നു ചേരുന്ന സിപിഎം സംസ്ഥാന സെക്രട്ടേറിയറ്റും, സിപിഐ എക്‌സിക്യൂട്ടീവിലും ചര്‍ച്ചയാകും.

പ്രതിപക്ഷ ഉപനേതാവ് പദവി തങ്ങള്‍ക്ക് വേണമെന്നാണ് സിപിഐ ആവശ്യപ്പെടുന്നത്. പ്രതിപക്ഷ നേതാവ്, ഉപനേതാവ് എന്നീ രണ്ടു പദവികളും സിപിഎം തന്നെ കയ്യാളുന്നത് ശരിയല്ലെന്നും, മുന്നണി മര്യാദകള്‍ക്ക് നിരക്കുന്നതല്ലെന്നുമാണ് സിപിഐ നിലപാട്. എന്നാല്‍ കാലങ്ങളായി സിപിഎമ്മാണ് ഈ പദവികള്‍ വഹിച്ചിരുന്നതെന്നും, കീഴ്‌വഴക്കം അതാണെന്നുമാണ് പിണറായി വിജയന്‍ വ്യക്തമാക്കിയിരുന്നത്.

പ്രതിപക്ഷ ഉപനേതാവ് പദവി വിട്ടുനല്‍കാനാകില്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദനും വ്യക്തമാക്കിയിരുന്നു. എന്നാല്‍ കീഴ്‌വഴക്കങ്ങള്‍ മാറ്റേണ്ടതാണെന്നാണ് സിപിഐ സംസ്ഥാന സെക്രട്ടറി ബിനോയ് വിശ്വം പ്രതികരിച്ചത്. പ്രതിപക്ഷ ഉപനേതാവ് പദവിയെച്ചൊല്ലിയുള്ള തര്‍ക്കം മൂലം ഇടതുമുന്നണി യോഗം ചേരാന്‍ സാധിച്ചിട്ടില്ല. എല്‍ഡിഎഫ് പാര്‍ലമെന്ററി പാര്‍ട്ടി പ്രവര്‍ത്തനവും തടസ്സപ്പെട്ടിരിക്കുകയാണ്.