മുഖ്യമന്ത്രി പദവിയിലെ തർക്കം 'പ്രസവവേദന' പോലെ; എല്ലാം പരിഹരിക്കുമെന്ന് ടി സിദ്ദിഖ്

തിരുവനന്തപുരം: പുതിയ യുഡിഎഫ് സർക്കാരിന്റെ മുഖ്യമന്ത്രി പദവിയെച്ചൊല്ലി കോൺഗ്രസിനകത്തുണ്ടായ തർക്കങ്ങൾ ഉടൻ പരിഹരിക്കുമെന്ന് ടി. സിദ്ദിഖ് എംഎൽഎ. എഐസിസി ജനറൽ സെക്രട്ടറി കെ.സി. വേണുഗോപാലുമായി കൂടിക്കാഴ്ച നടത്തുന്നതിനായി തലസ്ഥാനത്ത് എത്തിയതായിരുന്നു അദ്ദേഹം. നിയുക്ത മുഖ്യമന്ത്രിയും പാർട്ടി നേതൃത്വവും എല്ലാവരുടെയും അഭിപ്രായങ്ങൾ കേട്ട് പ്രശ്നങ്ങൾക്ക് പരിഹാരം കാണുമെന്നും അദ്ദേഹം കൂട്ടിച്ചേർത്തു.

പ്രസവവേദനയും നല്ലൊരു കുഞ്ഞും

മുഖ്യമന്ത്രി പദവി നിഷേധിക്കപ്പെട്ടതിൽ രമേശ് ചെന്നിത്തലയ്ക്കുള്ള അതൃപ്തിയെക്കുറിച്ചും മുഖ്യമന്ത്രിയെ തീരുമാനിക്കുന്നത് വൈകിയതിനെക്കുറിച്ചുമുള്ള മാധ്യമപ്രവർത്തകരുടെ ചോദ്യങ്ങളോട് പ്രതികരിക്കവെയാണ് പാർട്ടിയിലെ ആഭ്യന്തര ഭിന്നതകളെ സിദ്ദിഖ് പ്രസവവേദനയുമായി ഉപമിച്ചത്.

"ഒരു പ്രസവത്തെക്കുറിച്ച് സംസാരിക്കുന്നത് എളുപ്പമായിരിക്കാം. എന്നാൽ ഒരു അമ്മയ്ക്ക് കഠിനമായ മാനസികവും ശാരീരികവുമായ വേദനകളിലൂടെ കടന്നുപോകേണ്ടി വരുന്നുണ്ട്. ഈ പ്രശ്നം പരിഹരിക്കാൻ ചർച്ചകളും ആസൂത്രണങ്ങളും നടക്കുന്നുണ്ട്. നല്ലൊരു കുഞ്ഞിന്റെ ജനനം ഉറപ്പാക്കാനുള്ള ശ്രമമാണിത്," ടി. സിദ്ദിഖ് വ്യക്തമാക്കി. എല്ലാ പ്രശ്നങ്ങളും ചർച്ചകളിലൂടെ പരിഹരിക്കപ്പെടുമെന്നും അദ്ദേഹം ആവർത്തിച്ചു

മന്ത്രിസ്ഥാനം പാർട്ടി തീരുമാനിക്കും

പുതിയ മന്ത്രിസഭയിൽ അംഗമാകുമോ എന്ന ചോദ്യത്തിന്, മന്ത്രിസ്ഥാനം സംബന്ധിച്ച കാര്യങ്ങളിൽ പാർട്ടി നേതൃത്വമാണ് അന്തിമ തീരുമാനമെടുക്കുകയെന്ന് കൽപ്പറ്റ എംഎൽഎ മറുപടി നൽകി. തിങ്കളാഴ്ചയാണ് വി.ഡി. സതീശന്റെ നേതൃത്വത്തിലുള്ള പുതിയ യുഡിഎഫ് മന്ത്രിസഭയുടെ സത്യപ്രതിജ്ഞാ ചടങ്ങ് തലസ്ഥാനത്ത് നിശ്ചയിച്ചിരിക്കുന്നത്. ഇതിന് മുന്നോടിയായി മന്ത്രിമാരുടെ പട്ടികയ്ക്ക് അന്തിമരൂപം നൽകാനുള്ള ചർച്ചകൾ കോൺഗ്രസിലും മുന്നണിയിലും പുരോഗമിക്കുകയാണ്.