കൊല്ലം: നറുക്കെടുപ്പിന് മണിക്കൂറുകൾ മാത്രം ശേഷിക്കെ കടയുടമ ഫോണിൽ വിളിച്ചുവരുത്തിയാണ് മാതേഷിന് വിൻവിൻ ലോട്ടറിയുടെ ടിക്കറ്റ് നൽകിയത്. സ്ഥിരമായി ലോട്ടറിയെടുക്കാറുള്ള മാതേഷ് ഇക്കുറി വാങ്ങിയ രണ്ട് ടിക്കറ്റുകളിലൊന്ന‌് സമ്മാനാർഹമായി, അതും ഒന്നാം സമ്മാനം. 75 ലക്ഷം രൂപയുടെ സമ്മാനമാണ് തമിഴ്നാട് സ്വദേശിയായ ഈ 25കാരന് ലഭിച്ചത്. 

അഞ്ചൽ മാർക്കറ്റ് ജംഗ്ഷന് സമീപത്തെ അമ്മൂസ് ലക്കി സെന്ററിൽ നിന്നാണ് മാതേഷ് ടിക്കറ്റ് വാങ്ങിയത്. തുണി വ്യാപാര സ്ഥാപനത്തിലെ തൊഴിലാളിയാണ് മാതേഷ്. അഞ്ചുവർഷമായി ഭാര്യ ശ്രീകലയുമൊത്ത് ഇടമുളയ്ക്കലിലെ വാടക വീട്ടിലാണ് ഇയാൾ താമസിക്കുന്നത്. 

സമ്മാനാർഹ​മായ ടിക്കറ്റ് കാനറാ ബാങ്കിന്റെ അഞ്ചൽ ശാഖയിൽ ഏൽപ്പിച്ചു. സമ്മാനത്തുകയ്ക്ക് കേരളത്തിൽ വീടും സ്ഥലവും വാങ്ങി താമസിക്കാനാണ് മാതേഷിന്റെ ആ​ഗ്രഹം.