അവസാന നാളുകൾ റോമിൽ തന്നെ, അർജന്റീനയിലേക്ക് മടങ്ങില്ലെന്ന് മാർപാപ്പ

ബ്യൂണസ് ഐറിസ്: വിരമിച്ചാലും റോമിൽ നിന്ന് തിരിച്ചുപോകില്ലെന്ന് വ്യക്തമാക്കി ഫ്രാൻസിസ് മാർപാപ്പ. തന്റെ അവസാന ദിനങ്ങൾ റോമിൽ ചെലവഴിക്കാനാണ് ആഗ്രഹിക്കുന്നത്. ജന്മനാടായ അർജന്റീനയിലേക്ക് മടങ്ങില്ലെന്നും ‘ദ ഹെൽത്ത് ഓഫ് പോപ്‌സ്’ എന്ന പുസ്തകത്തിലൂടെ മാർപാപ്പ വ്യക്തമാക്കി. 

അവസാന നാളുകൾ എങ്ങനെയായിരിക്കും എന്നായിരുന്നു ചോദ്യം. 'ഞാൻ മാർപാപ്പ ആയിരിക്കാം, അല്ലെങ്കിൽ വിരമിച്ചിരിക്കും. റോമിൽ തന്നെയായിരിക്കും. ഞാൻ അർജന്റീനയിലേക്ക് മടങ്ങില്ല'- മാർപാപ്പ വ്യക്തമാക്കി. മരണത്തെക്കുറിച്ച് ചിന്തിക്കുന്നുണ്ടെങ്കിലും ഭയപ്പെടുന്നില്ലെന്ന് മാർപാപ്പ അഭിമുഖത്തിൽ പറഞ്ഞു. 

2019 ഫെബ്രുവരിയിൽ അർജന്റീനിയൻ മാധ്യമപ്രവർത്തകനും ഡോക്ടറുമായ നെൽസൺ കാസ്ട്രയ്ക്ക് വത്തിക്കാനിൽ നൽകിയ അഭിമുഖത്തെ അടിസ്ഥാനമാക്കിയാണ് പുസ്തകം തയ്യാറാക്കിയിട്ടുള്ളത്. 84 കാരനായ മാർപാപ്പ തന്റെ ആരോ​ഗ്യത്തെക്കുറിച്ച് തുറന്നു പറയുന്നത് ആദ്യമായാണ്. നടുവിനും ഇടുപ്പിനും വേദനയുള്ളതിനാൽ മാർപാപ്പ അടുത്തിടെ ചില യാത്രകൾ റദ്ദാക്കിയിരുന്നു.