വളരുന്ന കുഴികള്‍ - ഷംല ജഹ്ഫര്‍ എഴുതിയ കവിത

ചിലര്‍ പൂവിനും കായ്കനിക്കും

വാക്കുകളുടെ മണമുറപ്പിക്കുന്നു.

ചിലര്‍ പുഴയിലും കടലിലും

ഇലകളുടെ ശബ്ദം കലര്‍ത്തി

കവിത മെനയുന്നു

കുറെ മനുഷ്യര്‍

തങ്ങളുടെ മൊട്ടുകളെ പിച്ചിയെറിഞ്ഞ കൈകളെ

തിരിച്ചറിയാന്‍

തോക്കുകളുടെ ഉള്ളില്‍

രക്തത്തിന്റെ നിറം കലര്‍ത്തുന്നു.

ഒരു വശത്ത്

വിരിയുന്ന പൂക്കള്‍;

മറുവശത്ത്

പൊടിയിലാഴ്ന്ന മൊട്ടുകള്‍.

ഒരു വശത്ത്

മഷി നനഞ്ഞ വിരലുകള്‍;

മറുവശത്ത്

നിണം വലിക്കുന്ന

ട്രിഗറിലുറഞ്ഞ വിരലുകള്‍.

ഈ ഭൂമിയില്‍

ഒരേ സമയം

കവിതയും

കലാപവും

വില്‍ക്കപ്പെടുന്നു.

നിരന്തരം

കുഴികള്‍ മാത്രം വളരുന്നു.