അയർലൻ‍ഡിനെ വീഴ്ത്തി അഫ്​ഗാൻ ലോകകപ്പിന്; വിൻഡീസ് വീണ്ടും വെട്ടിൽ!

ബെൽഫാസ്റ്റ്: അയർലൻഡിനെതിരായ മൂന്നാം ഏകദിന പോരാട്ടം വിജയിച്ച് അഫ്​ഗാനിസ്ഥാൻ 2027ലെ ഏകദിന ലോകകപ്പ് പോരാട്ടത്തിനു നേരിട്ട് യോ​ഗ്യത ഉറപ്പാക്കി. രണ്ട് തവണ ലോക ചാംപ്യൻമാരായ വെസ്റ്റ് ഇൻഡീസ് വീണ്ടുമൊരിക്കൽ കൂടി വെട്ടിലാവുകയും ചെയ്തു. കഴി‍ഞ്ഞ രണ്ട് ഏകദിന ലോകകപ്പ് പോരാട്ടങ്ങൾക്ക് യോ​ഗ്യത പോലും നേടാൻ സാധിക്കാതെ പോയ വിൻഡീസ് ഇത്തവണയും യോ​ഗ്യാതാ പോരാട്ടം ജയിച്ച് സ്ഥാനം ഉറപ്പിക്കേണ്ട ​ഗതികേടിലായി. അഫ്​ഗാന്റെ മുന്നേറ്റമാണ് അവരുടെ സാധ്യത ത്രിശങ്കുവിലാക്കിയത്.

അയർലൻഡിനെതിരായ മൂന്നാം പോരിൽ 3 വിക്കറ്റിന്റെ ആവേശ വിജയമാണ് അഫ്​ഗാനിസ്ഥാൻ സ്വന്തമാക്കിയത്. അഞ്ച് മത്സരങ്ങളടങ്ങിയ പരമ്പരയിൽ അഫ്​ഗാൻ 2-0ത്തിനു മുന്നിലെത്തുകയും ചെയ്തു.

റാഷിദ് ഖാന്റെ ഓൾ റൗണ്ട് മികവാണ് അഫ്​ഗാൻ ജയം എളുപ്പമാക്കിയത്. ആദ്യം ബാറ്റ് ചെയ്ത അയർലൻഡിനെ 46.3 ഓവറിൽ 206 റൺസിൽ പുറത്താക്കാൻ അഫ്​ഗാന് സാധിച്ചു. മറുപടി പറയാനിറങ്ങിയ അഫ്​ഗാനിസ്ഥാൻ 44.5 ഓവറിൽ 7 വിക്കറ്റ് നഷ്ടത്തിൽ 207 റൺസ് കണ്ടെത്തി.

അനായാസ ലക്ഷ്യത്തിലേക്ക് ബാറ്റേന്തുന്നതിനിടെ അഫ്​ഗാനിസ്ഥാൻ ഒരു ഘട്ടത്തിൽ 2 വിക്കറ്റ് നഷ്ടത്തിൽ 97 റൺസെന്ന നിലയിലായിരുന്നു. എന്നാൽ പിന്നീട് തുടരെ വിക്കറ്റുകൾ നഷ്ടമായി അവർ 7 വിക്കറ്റിന് 176 റൺസെന്ന നിലയിലേക്ക് വീണു. എട്ടാം വിക്കറ്റിൽ ഒന്നിച്ച റാഷിദ് ഖാൻ- യമീൻ അഹമ്മദ്സായി സഖ്യം കൂടുതൽ നഷ്ടങ്ങളില്ലാതെ ടീമിനെ ജയത്തിലെത്തിച്ചു.

റാഷിദ് ഖാൻ 37 റൺസുമായി പുറത്താകാതെ നിന്നു. യമീൻ അഹമ്മദ്സായി 4 റൺസ് മാത്രമാണ് എടുത്തതെങ്കിലും 26 പന്തുകൾ ചെറുത്ത് റാഷിദിനു സ്ട്രൈക്ക് കൈമാറുന്നതിൽ നിർണായകമായി. നേരത്തെ ബൗളിങിലും റാഷിദ് തിളങ്ങിയിരുന്നു. താരം 10 ഓവറിൽ 44 റൺസ് വഴങ്ങി 3 വിക്കറ്റെടുത്തു.

നിലവിൽ ഐസിസി റാങ്കിങിൽ 8ാം സ്ഥാനത്തുള്ള അഫ്​ഗാൻ ദക്ഷിണാഫ്രിക്ക, സിംബാബ്‍വെ, നമീബിയ എന്നിവർ സംയുക്തമായി ആതിഥേയത്വം വഹിക്കുന്ന ലോകകപ്പ് പോരിലേക്ക് നേരിട്ട് യോ​ഗ്യത ഉറപ്പിക്കുകയായിരുന്നു. അവരുടെ നാലാം ലോകകപ്പ് പ്രവേശമാണിത്.

വിൻഡീസിന് സംഭവിച്ചത്

അഫ്​ഗാൻ ജയത്തോടെ 8ാം റാങ്ക് ഉറപ്പിച്ചപ്പോൾ വെസ്റ്റ് ഇൻഡീസിന്റെ നേരിട്ട് യോ​ഗ്യതയെന്ന സാധ്യതയാണ് അടഞ്ഞത്. റാങ്കിങിലെ തിരിച്ചടിയാണ് മുൻ ചാംപ്യൻമാർക്ക് വിനയായത്. അവർക്ക് ഇനി യോ​ഗ്യതാ പോരാട്ടം ജയിച്ചാൽ മാത്രമേ ലോകകപ്പ് യോ​ഗ്യത കിട്ടു. കഴിഞ്ഞ രണ്ട് തവണയും സമാന അവസ്ഥ നേരിട്ട് യോ​ഗ്യതാ പോര് കളിച്ചിട്ടും കരീബിയൻ സംഘം ലോകകപ്പ് കളിച്ചിരുന്നില്ല.

സെപ്റ്റംബർ 30 വരെയുള്ള ഐസിസി ഏകദിന റാങ്കിങ് അടിസ്ഥാനത്തിലാണ് ടീമുകൾ നേരിട്ട് ലോകകപ്പ് യോ​ഗ്യത ഉറപ്പിക്കുന്നത്. നിലവിലെ ചാംപ്യൻമാരായ ഓസ്ട്രേലിയ, ഇന്ത്യ, ന്യൂസിലൻഡ്, പാകിസ്ഥാൻ, ശ്രീലങ്ക, ഇം​ഗ്ലണ്ട്, ബം​ഗ്ലാദേശ്, അഫ്​ഗാനിസ്ഥാൻ എന്നിവരാണ് നേരിട്ട് യോ​ഗ്യത ഉറപ്പിച്ചത്. ആതിഥേയരെന്ന നിലയിൽ ദക്ഷിണാഫ്രിക്ക, സിംബാബ്‍വെ ടീമുകളും യോ​ഗ്യത നേടി.

നിലവിലെ ഏകദിന റാങ്കിങിൽ വിൻഡീസ് 10ാം സ്ഥാനത്താണ്. ഇന്ത്യക്കെതിരെ 2 ഏകദിന മത്സരങ്ങൾ വിൻഡീസ് കളിക്കുന്നുണ്ട്. എന്നാൽ ഇത് രണ്ടും ജയിച്ചാൽ പോലും റാങ്കിങിൽ വലിയ മാറ്റം സംഭവിക്കില്ല. അതിനാൽ ലോകകപ്പ് സീറ്റിന് അവർ യോ​ഗ്യതാ പോരാട്ടം കളിക്കേണ്ടി വരുമെന്നത് നിർബന്ധമാണ്.

വിൻഡീസ്, അയർലൻഡ് ടീമുകളാണ് യോ​ഗ്യതാ പോര് കളിക്കുന്ന ഐസിസിയുടെ ഫുൾ മെമ്പർ ടീമുകൾ. ലോകകപ്പ് ലീ​ഗ് 2ൽ നിന്നു നാല് ടീമുകളും വേൾഡ് കപ്പ് ക്വാളിഫയർ പ്ലേ ഓഫിൽ നിന്നുള്ള നാല് ടീമുകളുമാണ് വിൻഡീസ്, അയർലൻ‍ഡ് ടീമുകൾക്ക് പുറമെ മത്സര രം​ഗത്തുള്ളത്. ഇതിൽ നാല് ടീമുകൾക്കാണ് ലോകകപ്പ് യോ​ഗ്യത കിട്ടുക.