അബുദാബി: ചെന്നൈ സൂപ്പര്‍ കിങ്‌സിനെതിരായ നിര്‍ണായക ഐപിഎല്‍ പോരാട്ടത്തില്‍ 154 റണ്‍സ് വിജയ ലക്ഷ്യം വച്ച് കിങ്‌സ് ഇലവന്‍ പഞ്ചാബ്. ടോസ് നേടി ചെന്നൈ പഞ്ചാബിനെ ബാറ്റിങിന് അയക്കുകയായിരുന്നു. നിശ്ചിത 20 ഓവറില്‍ ആറ് വിക്കറ്റ് നഷ്ടത്തില്‍ 153 റണ്‍സാണ് പഞ്ചാബ് കണ്ടെത്തിയത്. 

മികച്ച തുടക്കത്തിന് ശേഷം പഞ്ചാബിന് പിന്നാക്കം പോവുകയായിരുന്നു. തുടരെ വിക്കറ്റുകള്‍ വീഴ്ത്തി പഞ്ചാബിനെ സമ്മര്‍ദ്ദത്തിലാക്കാന്‍ ചെന്നൈക്ക് സാധിച്ചു. ആറാമനായി ക്രീസിലെത്തിയ ദീപക് ഹൂഡയുടെ കടന്നാക്രമണമാണ് പഞ്ചാബിന് ഭേദപ്പെട്ട സ്‌കോര്‍ സമ്മാനിച്ചത്. ഹൂഡ നാല് സിക്‌സും മൂന്ന് ഫോറും സഹിതം 30 പന്തില്‍ 62 റണ്‍സ് വാരി. 

ക്യാപ്റ്റന്‍ കെഎല്‍ രാഹുല്‍ (29), മായങ്ക് അഗര്‍വാള്‍ (26) എന്നിവരും ഭേദപ്പെട്ട പ്രകടനം പുറത്തെടുത്തു. ക്രിസ് ഗെയ്ല്‍ 12 റണ്‍സിലും നിക്കോളാസ് പൂരന്‍ രണ്ട് റണ്‍സിലും മടങ്ങി. 

ചെന്നൈയ്ക്കായി ലുംഗി എന്‍ഗിഡി മൂന്ന് വിക്കറ്റുകള്‍ വീഴ്ത്തി. ശാര്‍ദുല്‍ ഠാക്കൂര്‍, ഇമ്രാന്‍ താഹിര്‍, ജഡേജ എന്നിവര്‍ ഓരോ വിക്കറ്റെടുത്തു.