ക്രിക്കറ്റ് ​ഗ്രൗണ്ടിൽ തരം​ഗം തീർത്ത് വീണ്ടും 'പുഷ്പ'- വിക്കറ്റ് നേട്ടം 'അല്ലു അർജുൻ സ്റ്റൈലിൽ' ആഘോഷിച്ച് ബം​ഗ്ലാ ബൗളർ (വീഡിയോ)

ധാക്ക: അല്ലു അർജുൻ നായകനായ തെലുങ്ക് ചിത്രം പുഷ്പയിലെ ഡയലോഗുകളും ആക്ഷനും നൃത്തവുമെല്ലാം സോഷ്യൽ മീഡിയയിൽ തരം​ഗം തീർത്ത് മുന്നേറുകയാണ്. അതിന്റെ അലയൊലികൾ ക്രിക്കറ്റ് ലോകത്തും വ്യാപകമാണ്. അല്ലു അർജുന്റെ പുഷ്പ നൃത്തവുമായി ഡേവിഡ് വാർണറും പിന്നാലെ ആക്ഷൻ അനുകരിക്കാൻ ശ്രമിച്ച് ഇന്ത്യൻ താരം രവീന്ദ്ര ജഡേജയും രം​ഗത്തെത്തിയിരുന്നു. 

അതിന് പിന്നാലെ പുഷ്പ തരം​ഗം ഇപ്പോൾ ക്രിക്കറ്റ് ​ഗ്രൗണ്ടിലും എത്തി. ഗ്രൗണ്ടിൽ മത്സരത്തിനിടെ അല്ലുവിന്റെ ആക്ഷൻ അനുകരിച്ചിരിക്കുകയാണ് ബംഗ്ലാദേശ് താരം. ബംഗ്ലാദേശ് പ്രീമിയർ ലീഗിലാണ് സംഭവം. 

എതിർ ബാറ്റ്‌സ്മാന്റെ വിക്കറ്റ് വീഴ്ത്തിയപ്പോൾ പുഷ്പയിലെ 'ശ്രീവള്ളി' എന്ന ഗാനത്തിലെ അല്ലുവിന്റെ നൃത്തച്ചുവടുകൾ അനുകരിക്കുകയായിരുന്നു ബംഗ്ലാ ബൗളർ. നിരവധി ആരാധകർ ഈ വീഡിയോ സോഷ്യൽ മീഡിയയിൽ പങ്കുവെച്ചിട്ടുണ്ട്.