ചെന്നൈയെ 200 കടത്താതെ കൊല്‍ക്കത്ത; ആദ്യ ജയത്തിലേക്ക് അടിക്കണം 193 റണ്‍സ്

ചെന്നൈ: ഐപിഎല്ലില്‍ ചെന്നൈ സൂപ്പര്‍ കിങ്‌സിനെ 200 കടത്താതെ 192ല്‍ ഒതുക്കി കൊല്‍ക്കത്ത നൈറ്റ്‌റൈഡേഴ്‌സ്. ആദ്യ ജയം തേടുന്ന കെകെആറിന് 193 റണ്‍സ് വിജയ ലക്ഷ്യം. ആദ്യം ബാറ്റ് ചെയ്ത ചെന്നൈ നിശ്ചിത ഓവറില്‍ 5 വിക്കറ്റ് നഷ്ടത്തിലാണ് 192ല്‍ എത്തിയത്.

ടോസ് നേടി കെകെആര്‍ ബൗളിങ് തിരഞ്ഞെടുക്കുകയായിരുന്നു. ഇന്നിങ്‌സിലെ ആദ്യ മൂന്ന് പന്തുകളും ബൗണ്ടറി പായിച്ച് സഞ്ജു സാംസണ്‍ മികച്ച തുടക്കമാണ് ടീമിനു നല്‍കിയത്. എന്നാല്‍ ക്യാപ്റ്റന്‍ ഋതുരാജ് ഗെയ്ക്‌വാദ് വീണ്ടും പരാജയമായി. താരം 6 പന്തില്‍ 7 റണ്‍സുമായി പുറത്തായി.

കഴിഞ്ഞ കളിയില്‍ തിളങ്ങിയ സഞ്ജു- ആയുഷ് മാത്രെ സഖ്യം ഇത്തവണയും തിളങ്ങി. ഇരുവരും ചേര്‍ന്നു അതിവേഗം സ്‌കോര്‍ മുന്നോട്ടു നയിച്ചു. പവര്‍പ്ലേയുടെ അവസാനത്തില്‍ ആയുഷും പുറത്തായി. താരം 17 പന്തില്‍ 6 ഫോറും 2 സിക്‌സും സഹിതം 38 റണ്‍സ് അടിച്ചാണ് മടങ്ങിയത്.

പിന്നാലെ വന്ന ഡെവാള്‍ഡ് ബ്രവിസിനെ കൂട്ടുപിടിച്ച് സഞ്ജു സ്‌കോര്‍ മുന്നോട്ടു കൊണ്ടുപോയി. അതിനിടെ മലയാളി താരവും പുറത്തായി. സഞ്ജു അര്‍ധ സെഞ്ച്വറിക്കരികെ വീണു. സഞ്ജു 32 പന്തില്‍ 3 സിക്‌സും 4 ഫോറും സഹിതം 48 റണ്‍സെടുത്തു മടങ്ങി. കാര്‍ത്തിക് ത്യാഗിയുടെ പന്തില്‍ സഞ്ജു ക്ലീന്‍ ബൗള്‍ഡായി മടങ്ങുകയായിരുന്നു.

ഡെവാള്‍ഡ് ബ്രവിസ് 29 പന്തില്‍ 41 റണ്‍സെടുത്തു. താരം 4 ഫോറും 2 സിക്‌സും പറത്തി. സര്‍ഫറാസ് ഖാനും നിര്‍ണായക സംഭാവന നല്‍കി. താരം 18 പന്തില്‍ 2 സിക്‌സും ഒരു ഫോറും സഹിതം 23 റണ്‍സ് സ്വന്തമാക്കി.

ശിവം ദുബെ (13), ജാമി ഓവര്‍ടന്‍ (7) എന്നിവര്‍ പുറത്താകാതെ നിന്നു. ഇരുവര്‍ക്കും പക്ഷേ സ്‌കോര്‍ 200 കടത്താനായില്ല.

കെകെആറിനായി കാര്‍ത്തിക് ത്യാഗി 2 വിക്കറ്റുകള്‍ വീഴ്ത്തി. വൈഭവ് അറോറ, അനുകുല്‍ റോയ്, സുനില്‍ നരെയ്ന്‍ എന്നിവര്‍ ഓരോ വിക്കറ്റുകള്‍ സ്വന്തമാക്കി.