റിക്കി പോണ്ടിങ്ങിന്റെ വസതിയില്‍ വന്‍ കവര്‍ച്ച; കാര്‍ മോഷണം പോയി 

മെല്‍ബണ്‍: ഓസ്‌ട്രേലിയന്‍ മുന്‍ നായകന്‍ റിക്കി പോണ്ടിങ്ങിന്റെ വസതിയില്‍ വന്‍ കവര്‍ച്ച. അദ്ദേഹത്തിന്റെ കാര്‍ മോഷണം പോയി. എന്നാല്‍ പൊലീസ് അന്വേഷണത്തില്‍ മണിക്കൂറുകള്‍ക്കുള്ളില്‍ തന്നെ കാര്‍ കണ്ടെത്താനായി. 

വെള്ളിയാഴ്ച രാത്രിയോടെയാണ് മോഷണം നടന്നത്. പൊലീസ് അന്വേഷണത്തില്‍ അപകടകരമായ രീതിയില്‍ മെല്‍ബണിലെ കാമ്പര്‍വെല്ലില്‍ മോഷ്ടാക്കള്‍ ഈ കാര്‍ ഓടിച്ചു പോവുന്നത് കണ്ടെത്തി. എന്നാല്‍ മോഷ്ടാക്കളെ പിടികൂടാന്‍ പൊലീസിന് കഴിഞ്ഞില്ല. 

കളിയിലേക്ക് വരുമ്പോള്‍ ഇന്ത്യ-ഓസ്‌ട്രേലിയ ടെസ്റ്റിലെ ഓസീസ് തോല്‍വിയില്‍ ഞെട്ടല്‍ പങ്കുവെച്ചാണ് റിക്കി പോണ്ടിങ് ഏറ്റവും ഒടുവിലായി എത്തിയത്. ഈ പരമ്പര ജയിക്കാന്‍ മാത്രം മികവ് ഓസീസ് ടീമിനുണ്ടായില്ല എന്നത് തന്നെ ഞെട്ടിക്കുന്നതായാണ് പോണ്ടിങ് പറഞ്ഞത്. ഇന്ത്യയുടെ എ ടീമാണ് ഈ ടെസ്റ്റ് കളിച്ചതും, ജയിച്ചതും എന്നതാണ് കൂടുതല്‍ അത്ഭുതപ്പെടുത്തുന്നത് എന്നും പോണ്ടിങ് പറഞ്ഞിരുന്നു.