സിനിമ കാണാൻ തിയറ്ററിലെത്തുമ്പോൾ ടിക്കറ്റിനൊപ്പം പോപ്കോണും പാനീയങ്ങളും വാങ്ങുന്നത് പലർക്കും പതിവാണ്. എന്നാൽ പിവിആർ ഐനോക്സിനെ സംബന്ധിച്ച് ഇത് വെറുമൊരു സൈഡ് ബിസിനസല്ല..തിയറ്ററിലെ ഫുഡ് ആൻഡ് ബെവറേജ് വിഭാഗം ഇപ്പോൾ വലിയ വരുമാനമാർഗമായി മാറുകയാണ്. പല പ്രമുഖ ക്വിക്ക് സർവീസ് റസ്റ്ററന്റ് കമ്പനികളെയും മറികടക്കുന്ന വേഗത്തിലാണ് ഈ വിഭാഗം വളരുന്നത്..2025–26 സാമ്പത്തിക വർഷത്തിൽ പിവിആർ ഐനോക്സിന്റെ ഫുഡ് ആൻഡ് ബെവറേജ് വരുമാനം 2,088.4 കോടി രൂപയിലെത്തി. മുൻ സാമ്പത്തിക വർഷത്തെ 1,747 കോടി രൂപയിൽ നിന്ന് 19.5 ശതമാനമാണ് വളർച്ച. ഭക്ഷണവിൽപ്പന പ്രധാന ബിസിനസായ നിരവധി ക്യുആർഎസ് കമ്പനികളുടെ വളർച്ചയേക്കാൾ വേഗത്തിലാണ് പിവിആർ ഐനോക്സിന്റെ ഈ വിഭാഗം മുന്നേറിയത്..ഇതോടെ വെസ്റ്റ്ലൈഫ് ഫുഡ്വേൾഡിന്റെ ബിസിനസ് വലുപ്പത്തോട് അടുക്കുന്ന നിലയിലേക്കും പിവിആർ ഐനോക്സിന്റെ ഫുഡ് ബിസിനസ് എത്തി. അതേസമയം, വലിയ റസ്റ്ററന്റ് ശൃംഖലകളുടെ മൊത്തം ബിസിനസ് വലുപ്പവുമായി നേരിട്ട് താരതമ്യം ചെയ്യാനാകില്ലെങ്കിലും വളർച്ചയുടെ വേഗം ശ്രദ്ധേയമാണ്..ഒരുകാലത്ത് തിയറ്ററുകളിലെ ഫുഡ് ബിസിനസ് പ്രധാനമായും പോപ്കോൺ, നാച്ചോസ്, ശീതളപാനീയങ്ങൾ എന്നിവയിൽ ഒതുങ്ങിയിരുന്നു. ഇപ്പോൾ പിവിആർ ഐനോക്സ് മെനു വിപുലീകരിക്കുന്നതിനൊപ്പം സ്വന്തമായി ഫുഡ് ബ്രാൻഡുകളും വികസിപ്പിക്കുകയാണ്..ഡോഗ്ഫാദർ, ഫ്രൈടോപ്പിയ, സിനി കഫേ തുടങ്ങിയ ബ്രാൻഡുകളാണ് കമ്പനിയുടെ ഫുഡ് വിഭാഗത്തിലുള്ളത്. സിനിമാ ഹാളിനുള്ളിലെ വിൽപ്പനയ്ക്കപ്പുറം ഈ ബ്രാൻഡുകൾക്ക് മറ്റ് ഇടങ്ങളിലും വളരാനുള്ള സാധ്യത പരിശോധിക്കുകയാണ് കമ്പനി..2025–26ൽ പിവിആർ ഐനോക്സിൽ ഒരാൾ ഭക്ഷണത്തിനായി ചെലവഴിക്കുന്ന ശരാശരി തുക 147 രൂപയായി ഉയർന്നു. മുൻവർഷത്തേക്കാൾ 9.5 ശതമാനം വർധനയാണിത്. ഭക്ഷണത്തിനുള്ള ശരാശരി ചെലവ് ടിക്കറ്റ് നിരക്കിന്റെ 53 ശതമാനത്തോളം എത്തിയതും ഈ വിഭാഗത്തിന്റെ പ്രാധാന്യം വ്യക്തമാക്കുന്നു..സിനിമ കാണുക എന്നതിനപ്പുറം ഭക്ഷണം ഉൾപ്പെടുന്ന ഒരു സമ്പൂർണ എന്റർടെയ്ൻമെന്റ് അനുഭവത്തിനായി ഉപഭോക്താക്കൾ കൂടുതൽ പണം ചെലവഴിക്കാൻ തയ്യാറാകുന്നതാണ് ഇതിന് പിന്നിലെ പ്രധാന കാരണങ്ങളിലൊന്ന്. മെനുവിന്റെ നിലവാരം ഉയർത്തുന്നതും പ്രീമിയം ഓപ്ഷനുകൾ അവതരിപ്പിക്കുന്നതും കമ്പനിക്ക് നേട്ടമായി..2025–26ൽ പിവിആർ ഐനോക്സിലെ സിനിമാ പ്രവേശനം 10 ശതമാനം ഉയർന്ന് 15 കോടി എന്ന നിലയിലെത്തി. കൂടുതൽ ആളുകൾ തിയറ്ററുകളിലെത്തുന്നതിനൊപ്പം ഒരാൾ ചെലവഴിക്കുന്ന ഭക്ഷണത്തുകയും വർധിച്ചതാണ് ഫുഡ് ബിസിനസിന്റെ വളർച്ചയ്ക്ക് സഹായിച്ചത്..സിനിമയുടെ വിജയവും പരാജയവും തിയറ്ററുകളുടെ ടിക്കറ്റ് വരുമാനത്തെ നേരിട്ട് ബാധിക്കും. എന്നാൽ ഒരാൾ ഇതിനകം തിയറ്ററിലെത്തിക്കഴിഞ്ഞാൽ ഭക്ഷണത്തിനും പാനീയങ്ങൾക്കുമായി ചെലവഴിക്കാൻ സാധ്യതയുണ്ട്. അതുകൊണ്ടുതന്നെ ടിക്കറ്റ് വിൽപ്പനയ്ക്കപ്പുറം ഓരോ പ്രേക്ഷകനിൽനിന്നും കൂടുതൽ വരുമാനം നേടാനുള്ള വഴിയാണ് പിവിആർ ഐനോക്സ് തേടുന്നത്..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
