എണ്ണ കുറച്ച് ഭക്ഷണം പാകം ചെയ്യാൻ സഹായിക്കുന്ന എയർ ഫ്രയർ ഇന്ന് പല വീടുകളിലെയും അടുക്കളയിലെ പ്രധാന ഉപകരണമാണ്. എന്നാൽ ഫ്രഞ്ച് ഫ്രൈസും സ്നാക്ക്സും തയ്യാറാക്കാൻ മാത്രമല്ല ഇത് ഉപയോഗിക്കാനാകുക..സമൂസ, ഫ്രഞ്ച് ഫ്രൈസ്, പൊട്ടറ്റോ വെഡ്ജസ്, കട്ട്ലറ്റ് തുടങ്ങിയവ കുറഞ്ഞ അളവിൽ എണ്ണ ഉപയോഗിച്ച് തയ്യാറാക്കാം. ഭക്ഷണസാധനങ്ങൾ ബാസ്കറ്റിൽ കുത്തിനിറയ്ക്കാതെ നിരത്തിവയ്ക്കുന്നത് ഒരുപോലെ വേവാനും ക്രിസ്പിയാകാനും സഹായിക്കും..പനീർ, കൂൺ, ക്യാപ്സിക്കം, ചിക്കൻ എന്നിവ മസാലകൾ ചേർത്ത് മാരിനേറ്റ് ചെയ്ത ശേഷം എയർ ഫ്രയറിൽ ഗ്രിൽ ചെയ്യാം. റസ്റ്ററന്റുകളിലെ ടിക്ക വിഭവങ്ങളോട് സാമ്യമുള്ള രുചിയും നിറവും ലഭിക്കാൻ ഇത് സഹായിക്കും..തലേദിവസം വാങ്ങിയ സമൂസ, പക്കോഡ, സ്പ്രിങ് റോൾ, പിസ എന്നിവ വീണ്ടും ചൂടാക്കുമ്പോൾ മൃദുവായിപ്പോകാറുണ്ട്. മൈക്രോവേവിന് പകരം എയർ ഫ്രയർ ഉപയോഗിക്കുന്നത് ഇവയുടെ ക്രിസ്പി സ്വഭാവം വീണ്ടെടുക്കാൻ സഹായിക്കും. അമിതമായി ചൂടാകാതിരിക്കാൻ ഇടയ്ക്കിടെ പരിശോധിക്കണം..വീട്ടിൽ ഓവൻ ഇല്ലെങ്കിലും ചെറിയ അളവിൽ കേക്ക്, കപ്പ്കേക്ക്, കുക്കീസ്, മഫിൻസ്, ഗാർലിക് ബ്രെഡ് എന്നിവ തയ്യാറാക്കാൻ എയർ ഫ്രയർ ഉപയോഗിക്കാം. ഉപകരണത്തിന് അനുയോജ്യമായ ബേക്കിങ് പാത്രങ്ങൾ മാത്രം ഉപയോഗിക്കണം..വീട്ടിൽ തയ്യാറാക്കുന്ന റൊട്ടി, ചപ്പാത്തി, നാൻ, തുടങ്ങി ചിലതരം പറാത്തകൾ എയർ ഫ്രയറിൽ പാകം ചെയ്യാം. പുറംഭാഗം ചെറുതായി മൊരിഞ്ഞ് ബ്രൗൺ നിറം ലഭിക്കാൻ ഇത് സഹായിക്കും. പരമ്പരാഗത തന്തൂരിയിൽ ലഭിക്കുന്ന അതേ രുചിയും ഘടനയും പൂർണമായി ലഭിക്കണമെന്നില്ല..ശരിയായ താപനിലയും പാചകസമയവും ഓരോ വിഭവത്തിനും അനുസരിച്ച് ക്രമീകരിക്കണം. എയർ ഫ്രയറിൽ ഭക്ഷണം പാകം ചെയ്യുമ്പോൾ എണ്ണയുടെ ഉപയോഗം കുറയ്ക്കാനാകുമെങ്കിലും, വിഭവത്തിന്റെ ചേരുവകളും തയ്യാറാക്കുന്ന രീതിയും അനുസരിച്ച് ഫലം മാറാം.
