രാത്രി ഭക്ഷണം കഴിച്ച ശേഷം പാത്രങ്ങൾ സിങ്കിൽ കൂട്ടിയിട്ട് രാവിലെ കഴുകാമെന്ന് കരുതുന്നവരാണ് പലരും. തിരക്കേറിയ ദിവസങ്ങളിൽ ഇത് വളരെ സാധാരണമായൊരു ശീലവുമാണ്. എന്നാൽ, സിങ്കിൽ അഴുക്കുപാത്രങ്ങൾ രാത്രി മുഴുവൻ കിടക്കുന്നത് അടുക്കളയുടെ ശുചിത്വത്തെ മാത്രമല്ല, കീടങ്ങളുടെ സാന്നിധ്യത്തെയും ബാധിക്കാമെന്നാണ് വിദഗ്ധരുടെ മുന്നറിയിപ്പ്..അടുക്കളയിൽ ഭക്ഷണാവശിഷ്ടങ്ങളും വെള്ളവും ഒരുമിച്ച് ലഭിക്കുന്ന സാഹചര്യം കീടങ്ങൾക്ക് അനുയോജ്യമായ അന്തരീക്ഷമാണ്. അതുകൊണ്ടുതന്നെ രാത്രി അഴുക്കുപാത്രങ്ങൾ സിങ്കിൽ ഉപേക്ഷിക്കുന്ന ശീലം ഒഴിവാക്കുന്നതാണ് നല്ലതെന്നാണ് ക്ലീനിങ്, പെസ്റ്റ് കൺട്രോൾ വിദഗ്ധർ പറയുന്നത്..അഴുക്കുപാത്രങ്ങളിൽ അവശേഷിക്കുന്ന ഭക്ഷണത്തിന്റെ ഗന്ധവും കണികകളും പാറ്റകൾ, ഉറുമ്പുകൾ, എലികൾ തുടങ്ങിയ കീടങ്ങളെ ആകർഷിച്ചേക്കാം. ഒരിക്കൽ ഭക്ഷണത്തിന്റെ സ്ഥിരം ഉറവിടമായി അടുക്കളയെ തിരിച്ചറിഞ്ഞാൽ ഇവ വീണ്ടും വീണ്ടും അവിടേക്ക് എത്താനുള്ള സാധ്യതയുണ്ട്..ഭക്ഷണം, വെള്ളം, ഒളിച്ചിരിക്കാനുള്ള ഇടം എന്നിവ ലഭിക്കുന്ന സാഹചര്യം കീടങ്ങൾക്ക് അനുയോജ്യമാണ്. രാത്രി മുഴുവൻ സിങ്കിൽ കിടക്കുന്ന അഴുക്കുപാത്രങ്ങൾ ഈ മൂന്ന് ഘടകങ്ങളും ഒരുമിച്ച് ലഭ്യമാക്കുന്ന സാഹചര്യം സൃഷ്ടിച്ചേക്കാം..പാത്രങ്ങളിലെ ഭക്ഷണാവശിഷ്ടം എളുപ്പത്തിൽ നീക്കാൻ സോപ്പും വെള്ളവും നിറച്ച് കുറച്ചുനേരം പാത്രങ്ങൾ കുതിർക്കുന്നത് സാധാരണ രീതിയാണ്. എന്നാൽ ഇത് മണിക്കൂറുകളോളം, പ്രത്യേകിച്ച് രാത്രി മുഴുവൻ തുടരുന്നത് നല്ല ശീലമല്ലെന്നാണ് വിദഗ്ധരുടെ നിർദേശം..വെള്ളത്തിൽ കിടക്കുന്ന ഭക്ഷണാവശിഷ്ടങ്ങളിൽ ബാക്ടീരിയ പെരുകാൻ സാധ്യതയുണ്ട്. കാലം കഴിയുന്തോറും വെള്ളം മങ്ങിയതാകുകയും പാത്രങ്ങളിൽ വഴുവഴുപ്പുള്ള പാളി രൂപപ്പെടുകയും ചെയ്യാം. ഇത് പിന്നീട് പാത്രങ്ങൾ വൃത്തിയാക്കുന്നത് കൂടുതൽ ബുദ്ധിമുട്ടാക്കുകയും ചെയ്യും..പാത്രങ്ങളിൽ അവശേഷിക്കുന്ന ഭക്ഷണത്തിന്റെ ഗന്ധം മണിക്കൂറുകളോളം നിലനിൽക്കുന്നത് അടുക്കളയിൽ അസുഖകരമായ മണം ഉണ്ടാകാനും കാരണമാകും. മരത്തടി പോലുള്ള സുഷിരങ്ങളുള്ള വസ്തുക്കൾ ഈർപ്പവും ഗന്ധവും എളുപ്പത്തിൽ ആഗിരണം ചെയ്യുന്നതിനാൽ അവയിൽ ബാക്ടീരിയ നിലനിൽക്കാനുള്ള സാധ്യതയും കൂടുതലാണ്..ഭക്ഷണം കഴിച്ച ശേഷം പാത്രങ്ങൾ ഉടൻ കഴുകാൻ കഴിയുന്നില്ലെങ്കിൽ പോലും ആദ്യം അവ നന്നായി കഴുകി ഭക്ഷണാവശിഷ്ടങ്ങൾ നീക്കം ചെയ്യുന്നതാണ് നല്ലത്. ഡിഷ്വാഷർ ഉപയോഗിക്കുന്നവർ പാത്രങ്ങൾ അതിലേക്ക് ഉടൻ മാറ്റിവയ്ക്കാം..കൈകൊണ്ട് കഴുകുന്നവരാണെങ്കിൽ ചൂടുവെള്ളത്തിലും ചെറിയ അളവിലുള്ള ഡിഷ് സോപ്പിലും പാത്രങ്ങൾ അൽപനേരം മാത്രം കുതിർത്ത് പിന്നീട് നന്നായി കഴുകാം. രാത്രി മുഴുവൻ കുതിർത്ത് വയ്ക്കുന്നത് ഒഴിവാക്കുന്നതാണ് ഉചിതം..ഉറങ്ങുന്നതിന് മുമ്പ് പാത്രങ്ങൾ കഴുകി സിങ്ക് വൃത്തിയാക്കി വയ്ക്കുന്നത് അടുക്കളയിൽ ഭക്ഷണത്തിന്റെ സ്ഥിരം ഉറവിടം ഒഴിവാക്കാൻ സഹായിക്കും. സ്പോഞ്ചുകളും ഡിഷ് ക്ലോത്തുകളും പതിവായി വൃത്തിയാക്കുന്നതും പ്രധാനമാണ്. സിങ്കിൽ ഭക്ഷണാവശിഷ്ടങ്ങൾ അവശേഷിക്കുന്നില്ലെന്ന് ഉറപ്പാക്കുന്നതും ദുർഗന്ധം ഒഴിവാക്കാൻ സഹായിക്കും..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
