കുഞ്ഞിന്റെ ജനനം ജീവിതത്തിലെ ഏറ്റവും സന്തോഷകരമായ നിമിഷങ്ങളിലൊന്നായാണ് പൊതുവെ കണക്കാക്കപ്പെടുന്നത്. എന്നാൽ കുഞ്ഞ് ജനിച്ചതിന് ശേഷമുള്ള ജീവിതം എല്ലായ്പ്പോഴും സന്തോഷകരമാകണമെന്നില്ലെന്നാണ് വിവിധ രാജ്യങ്ങളിലെ പഠനങ്ങളും സർവേകളും സൂചിപ്പിക്കുന്നത്..വികസിത രാജ്യങ്ങളിലെ മാതാപിതാക്കൾ കുട്ടികളില്ലാത്തവരെക്കാൾ അസന്തുഷ്ടരാണെന്ന് റിപ്പോർട്ടുകൾ സൂചിപ്പിക്കുന്നു. അമേരിക്കയിലാണ് മാതാപിതാക്കളും കുട്ടികളില്ലാത്തവരും തമ്മിലുള്ള സന്തോഷത്തിലെ വ്യത്യാസം ഏറ്റവും കൂടുതൽ. അതേസമയം പോർച്ചുഗൽ, ഹംഗറി, സ്പെയിൻ, നോർവേ തുടങ്ങിയ രാജ്യങ്ങളിൽ മാതാപിതാക്കൾ താരതമ്യേന കൂടുതൽ സന്തുഷ്ടരാണ്..അമേരിക്കയിൽ മാതാപിതാക്കൾ കൂടുതൽ അസന്തുഷ്ടരാകുന്നത് എന്തുകൊണ്ട്?സാമൂഹിക പിന്തുണയുടെ അഭാവമാണ് പ്രധാന കാരണമായി ഗവേഷകർ ചൂണ്ടിക്കാട്ടുന്നത്. വ്യക്തിസ്വാതന്ത്ര്യത്തിനും സ്വയംപര്യാപ്തതയ്ക്കും പ്രാധാന്യം നൽകുന്ന അമേരിക്കൻ സമൂഹത്തിൽ മാതാപിതാക്കളുടെ ഉത്തരവാദിത്തങ്ങളിൽ പലതും കുടുംബത്തിന്റെയോ സമൂഹത്തിന്റെയോ സർക്കാരിന്റെയോ പിന്തുണയില്ലാതെ വ്യക്തികൾ തന്നെ ഏറ്റെടുക്കേണ്ടിവരുന്നു..കുട്ടിയെ വളർത്തുന്നതിനുള്ള സാമ്പത്തിക ചെലവുകൾക്കൊപ്പം ജോലി, ഭവനം, ശിശുപരിചരണം, സമയക്കുറവ് തുടങ്ങിയ പ്രശ്നങ്ങളും മാതാപിതാക്കളുടെ സമ്മർദ്ദം വർധിപ്പിക്കുന്നതായാണ് റിപ്പോർട്ട്..മാതാപിതാക്കളുടെ സന്തോഷനിലയിൽ പോർച്ചുഗൽ ശ്രദ്ധേയമാണ്. പോർച്ചുഗലിലെ മാതാപിതാക്കൾ കുട്ടികളില്ലാത്തവരെക്കാൾ ഏകദേശം 8 ശതമാനം കൂടുതൽ സന്തുഷ്ടരാണ്. ഹംഗറിയിൽ ഇത് 4.7 ശതമാനവും സ്പെയിനിൽ 3.1 ശതമാനവുമാണ്. നോർവേ, സ്വീഡൻ തുടങ്ങിയ രാജ്യങ്ങളിലും മാതാപിതാക്കളുടെ സന്തോഷനില ഉയർന്നതായി റിപ്പോർട്ടുണ്ട്..ഈ രാജ്യങ്ങളിൽ ശമ്പളത്തോടെയുള്ള അവധി, ശിശുപരിചരണ സഹായം തുടങ്ങിയ കുടുംബസൗഹൃദ സർക്കാർ നയങ്ങൾ മാതാപിതാക്കളുടെ സമ്മർദ്ദം കുറയ്ക്കുന്നതിൽ പങ്കുവഹിക്കുന്നുണ്ടെന്നാണ് വിലയിരുത്തൽ..മാതാപിതാക്കളും കുട്ടികളും തമ്മിലുള്ള വൈകാരികബന്ധം വളരെ ശക്തമാണ്. അതുകൊണ്ടുതന്നെ കുട്ടിയുടെ സന്തോഷവും സുരക്ഷയും ഉറപ്പാക്കാനുള്ള ഉത്തരവാദിത്തം മാതാപിതാക്കളിൽ വലിയ മാനസിക സമ്മർദ്ദം സൃഷ്ടിക്കാം..കുട്ടിയുടെ സന്തോഷം മാതാപിതാക്കൾക്ക് വലിയ സന്തോഷം നൽകുന്നതുപോലെ തന്നെ, കുട്ടി കഷ്ടപ്പെടുമ്പോഴും പരാജയപ്പെടുമ്പോഴും അസുഖബാധിതരാകുമ്പോഴും ആശങ്കയും സമ്മർദ്ദവും ഉണ്ടാക്കും..വിവിധ രാജ്യങ്ങളിലെ കുടുംബസംവിധാനങ്ങളും മാതാപിതാക്കളെ സഹായിക്കുന്ന സംവിധാനങ്ങളും വ്യത്യസ്തമാണ്. ചില സമൂഹങ്ങളിൽ കുട്ടികളെ വളർത്തുന്നത് വലിയ തോതിൽ കുടുംബത്തിന്റെയും ബന്ധുക്കളുടെയും സമൂഹത്തിന്റെയും കൂട്ടുത്തരവാദിത്തമായി കാണുമ്പോൾ, മറ്റിടങ്ങളിൽ അത് പ്രധാനമായും മാതാപിതാക്കളുടെ വ്യക്തിഗത ഉത്തരവാദിത്തമാണ്..Subscribe to our Newsletter to stay connected with the world around youFollow Samakalika Malayalam channel on WhatsApp Download the Samakalika Malayalam App to follow the latest news updates
