വിവാഹത്തിനും ഗൃഹപ്രവേശത്തിനും മുഹൂര്‍ത്തങ്ങള്‍, ശാന്തസുന്ദരം ഈയാഴ്ച

ഓഗസ്റ്റ് 30 രാത്രി 9 മണി 44 മിനിറ്റ് വരെയാണ് മകം ഞാറ്റുവേല. ഓഗസ്റ്റ് 30 വരെ ബുധശുക്രന്മാര്‍ കര്‍ക്കടകം രാശിയില്‍ നില്‍ക്കുന്നത് മഴയുടെ ലക്ഷണം തന്നെയാണ്. മകം ഞാറ്റുവേല പിറന്നതിനുശേഷം കേരളത്തില്‍ മഴ കുറഞ്ഞിട്ടുണ്ടെങ്കിലും മറ്റു സംസ്ഥാനങ്ങളില്‍ തുടരുന്നുണ്ട്. ഈ ആഴ്ചയില്‍ വിവാഹം, ഗൃഹപ്രവേശാദികള്‍ എന്നിവയ്ക്ക് മുഹൂര്‍ത്തങ്ങള്‍ ഉള്ളതാണ്. ഓഗസ്റ്റ് 26-നാണ് അത്തം, അത്തച്ചമയം. ഓഗസ്റ്റ് 27-നാണ് വിനായകചതുര്‍ത്ഥി. ഓഗസ്റ്റ് 28-ന് ഋഷിപഞ്ചമി, 29-ന് ഷഷ്ഠിവ്രതം എന്നിങ്ങനെ പല പ്രത്യേകതകളും ഈ ആഴ്ചയ്ക്കുണ്ട്. പൊതുവെ പ്രശാന്തസുന്ദരമായ ഒരു സമയമായിരിക്കും ഈ ആഴ്ച.

അശ്വതി, ഭരണി, കാര്‍ത്തിക 1-ാം പാദം

നൂതന ഗൃഹനിര്‍മ്മാണ പ്രവര്‍ത്തനങ്ങള്‍, ഭൂമീലാഭം, ജലാശയനിര്‍മ്മാണം, കാര്‍ഷികപ്രവൃത്തികളില്‍ ശ്രദ്ധ എന്നിവയ്ക്ക് യോഗമുള്ള സമയമാണ്. എന്നിരുന്നാലും ശ്രദ്ധിക്കാതെ വരുന്ന അനാവശ്യചെലവുകള്‍ക്ക് സാധ്യതയുണ്ട്. സ്ഥാനമാനങ്ങള്‍ക്കും ഈയാഴ്ച യോഗമുണ്ട്.

കാര്‍ത്തിക 2, 3, 4 പാദങ്ങള്‍, രോഹിണി, മകയിരം 1, 2 പാദങ്ങള്‍

പൊതുവെ ഈശ്വരാധീനമുള്ള സമയമാണ്. സഹായികളുടെ വര്‍ദ്ധന, ജനോപകാരപ്രദമായ പ്രവൃത്തികള്‍, ധനലാഭം, ഭൂമീലാഭം, ഭവനമാറ്റം, തൊഴില്‍സ്ഥലത്ത് അധികാരലബ്ധി, സംഗീതാദികലകളില്‍ താല്പര്യം ഇത്യാദികള്‍ക്കും ഗവേഷണപ്രവര്‍ത്തനങ്ങളില്‍ അഭിവൃദ്ധിക്കും യോഗമുണ്ട്.

മകീരം 3, 4 പാദങ്ങള്‍, തിരുവാതിര, പുണര്‍തം 1, 2, 3 പാദങ്ങള്‍

ഈ നക്ഷത്രക്കാര്‍ക്ക് ഈശ്വരാധീനമുള്ള സമയമാണ്. ആരോഗ്യം, ഐശ്വര്യം, പ്രതാപം, അധികാരലബ്ധി, വിദ്യാഗുണം എന്നിവയ്ക്കും നല്ലതാണ്. നൂതനഗൃഹനിര്‍മ്മാണ പ്രവര്‍ത്തനങ്ങള്‍ക്കും യോഗമുണ്ട്. വൈവാഹിക കാര്യങ്ങള്‍ക്കും നല്ലതാണ്.

പുണര്‍തം 4-ാം പാദം, പൂയം, ആയില്യം നക്ഷത്രങ്ങള്‍

നല്ല കാര്യങ്ങള്‍ക്ക് ധനം ചെലവു ചെയ്യേണ്ടിവരുന്ന സമയമാണ്. ധര്‍മ്മാനുഷ്ഠാന തല്‍പ്പരത, പുണ്യതീര്‍ത്ഥസ്നാനാദി ഗുണം, സജ്ജനസംസര്‍ഗ്ഗം, അന്നപാനാദിസുഖം എന്നിവയ്ക്കും, നൂതന വസ്ത്രാഭരണാദികളുടെ ലബ്ധിക്കും യോഗമുണ്ട്.

മകം, പൂരം, ഉത്രം 1-ാം പാദം

ഈ നക്ഷത്രക്കാര്‍ക്ക് വ്യാഴം 11-ാം ഭാവത്തിലായതിനാല്‍ വളരെ നല്ലതാണ്. ധനലാഭം, ഐശ്വര്യം, വിദ്യാഗുണം, കര്‍മ്മാദിവൃദ്ധി എന്നിവയ്‌ക്കെല്ലാം നല്ലതാണ്. അഷ്ടമശ്ശനിദോഷവും ജന്മരാശിയില്‍ കേതുവിന്റെ സ്ഥിതിയും ഇടയ്ക്കിടെ രക്തദൂഷ്യം, പിത്തകോപം, കഫശല്യം, വീഴ്ച, മുറിവേല്‍ക്കാനിടവരിക എന്നിവയ്ക്ക് സാധ്യതയുണ്ട്.

ഉത്രം 2, 3, 4 പാദങ്ങള്‍, അത്തം, ചിത്ര 1, 2 പാദങ്ങള്‍

ഈ നക്ഷത്രക്കാര്‍ക്ക് കണ്ടകശ്ശനി ദോഷമുണ്ടെങ്കിലും കേതു 12-ലാണെങ്കിലും ഗുണദോഷമിശ്ര കാലഘട്ടമാണ്. ഇക്കാലത്ത് വീഴ്ച, തീപ്പൊള്ളല്‍ ഏല്‍ക്കാനിടവരിക, അകാരണഭയം എന്നിവയ്ക്കും സാധ്യതയുണ്ട്. പല്ലിന് അസുഖങ്ങള്‍, നാല്‍ക്കാലികളില്‍നിന്ന് ഉപദ്രവം എന്നിവയും ശ്രദ്ധിക്കേണ്ട സമയമാണ്.

ചിത്ര 3, 4 പാദങ്ങള്‍, ചോതി, വിശാഖം 1, 2, 3 പാദങ്ങള്‍

ഇവര്‍ക്ക് പൊതുവെ നല്ല സമയമാണ്. വിവാഹം, ഉദ്യോഗലബ്ധി, വിദ്യകൊണ്ട് യശസ്സ്, ധനധാന്യസമൃദ്ധി, ഉദ്ദിഷ്ടകാര്യസിദ്ധി എന്നിവയ്‌ക്കെല്ലാം യോഗമുണ്ട്. കലാസാഹിത്യപ്രവര്‍ത്തനങ്ങള്‍ക്കും പൊതുരംഗത്തെ പ്രവര്‍ത്തനങ്ങള്‍ക്കും ഇത് ശുഭസൂചകമായ കാലമാണ്.

വിശാഖം 4-ാം പാദം, അനിഴം, തൃക്കേട്ട

ഈശ്വരാധീനക്കുറവ് പറയാവുന്ന സമയമാണ്. നല്ലത് ചെയ്താലും ചീത്ത ഫലങ്ങള്‍ അനുഭവിക്കേണ്ടിവന്നേയ്ക്കാം. അകാരണദുഃഖം, ചതിയേല്‍ക്കാനിടവരുക, കര്‍ണരോഗം, കഫശല്യം ഇത്യാദികള്‍ക്ക് യോഗമുണ്ട്.

മൂലം, പൂരാടം, ഉത്രാടം 1-ാം പാദം

ഈ നക്ഷത്രക്കാര്‍ക്ക് പൊതുവെ നല്ല സമയമാണ്. കണ്ടകശ്ശനി ദോഷമുള്ളതിനാല്‍ സ്ഥാനചലനങ്ങള്‍ക്കും ഗൃഹമാറ്റത്തിനും സമയമാണ്. ഗുരുക്കന്മാരോടും സ്‌നേഹിതരോടും ദയയും അവരെ ആദരിക്കുന്നതിന് യോഗവുമുണ്ട്. ഉദ്ദിഷ്ടകാര്യസിദ്ധിക്കും യോഗമുള്ള കാലമാണ്.

ഉത്രാടം 2, 3, 4 പാദങ്ങള്‍, തിരുവോണം, അവിട്ടം 1, 2 പാദങ്ങള്‍

ഈ നക്ഷത്രക്കാര്‍ക്ക് ഗുണദോഷ സമ്മിശ്രമായ കാലമാണ്. ഇക്കാലത്ത് നൂതനസംരംഭങ്ങള്‍ ആരംഭിക്കാവുന്നതാണ്. കര്‍മ്മഗുണാനുഭവങ്ങള്‍ക്കും വിദ്യാഗുണങ്ങള്‍ക്കും സാധ്യതയുണ്ട്.

അവിട്ടം 3, 4 പാദങ്ങള്‍, ചതയം, പൂരോരുട്ടാതി 1, 2, 3 പാദങ്ങള്‍

ഈ നക്ഷത്രക്കാര്‍ക്ക് സമ്പദ്സമൃദ്ധി, ധനാഗമം, വിദ്യുല്‍പ്രശംസ, ആദരവുകള്‍ ഇത്യാദികള്‍ക്കെല്ലാം യോഗമുണ്ട്. എന്നിരുന്നാലും ഞരമ്പ് സംബന്ധമായും നട്ടെല്ല് സംബന്ധമായും അസുഖസാധ്യതകള്‍ കാണുന്നുണ്ട്.

പൂരോരുട്ടാതി 4-ാം പാദം, ഉത്രട്ടാതി, രേവതി

ഈ നക്ഷത്രക്കാര്‍ക്ക് ഈ ആഴ്ച വളരെ ഗുണകരമാണ്. പ്രതാപം, ഐശ്വര്യം, കുടുംബത്തില്‍ മംഗളകര്‍മ്മങ്ങള്‍ക്ക് നേതൃത്വംവഹിക്കാനിടവരിക, കര്‍മ്മകുശലത, ആരോഗ്യം, സുഭഗത്വം, ഐശ്വര്യം എന്നിവയ്‌ക്കെല്ലാം യോഗമുണ്ട്. ക്രയവിക്രയകാര്യങ്ങള്‍ക്കും ഈ ആഴ്ച നല്ലതാണ്.