അശ്വതി മുതല്‍ തൃക്കേട്ട വരെയുള്ള നക്ഷത്രക്കാര്‍ക്ക് ഈയാഴ്ച എങ്ങനെ?

അശ്വതി, ഭരണി, കാര്‍ത്തിക 1-ാം പാദം

ഈ നക്ഷത്രക്കാര്‍ക്ക് പൊതുവെ ഗുണപരമായ ആഴ്ചയാണ്. സല്‍കീര്‍ത്തി, സഹായികളുടെ വര്‍ദ്ധന, നൂതനപദ്ധതികളുടെ ആരംഭം, ഉദ്ദിഷ്ടമായ സിദ്ധി എന്നിവയ്ക്ക് യോഗമുണ്ട്. എന്നിരുന്നാലും അകാരണഭയം, കാലിന് അസുഖങ്ങള്‍, വിചാരിക്കാതെ വന്നുചേരുന്ന ചെലവുകള്‍ എന്നിവയ്ക്കും സാധ്യതയുണ്ട്. ആത്മാര്‍ത്ഥമായ പ്രവര്‍ത്തനംകൊണ്ട് പലതും എത്തിപ്പിടിക്കാവുന്ന ആഴ്ചയാണിത്.

കാര്‍ത്തിക 2, 3, 4 പാദങ്ങള്‍, രോഹിണി, മകയിരം1, 2 പാദങ്ങള്‍

കലാസാഹിത്യഭരണമേഖലകളില്‍ വിഹരിക്കുന്നവര്‍ക്ക് വളരെ നല്ല സമയമാണിത്. എന്നാല്‍, വാഹനാദികള്‍ക്ക് നാശം, വാഗ്‌വാദങ്ങള്‍, കെട്ടിടങ്ങള്‍ക്ക് നാശനഷ്ടങ്ങള്‍, വൃക്ഷം വീണുണ്ടാവുന്ന നാശനഷ്ടങ്ങള്‍, നാല്‍ക്കാലികളില്‍നിന്ന് ഉപദ്രവം എന്നിവയ്ക്കും സാധ്യതയുണ്ട്. ഭൂമിസംബന്ധമായ വഴക്കുകള്‍ക്കും സാധ്യതയുണ്ടെന്നറിഞ്ഞ് ക്ഷമ കാത്തുസൂക്ഷിച്ച് പെരുമാറേണ്ട സമയമാണ്.

മകയിരം 3, 4 പാദങ്ങള്‍, തിരുവാതിര, പുണര്‍തം 1, 2, 3 പാദങ്ങള്‍

ഏര്‍പ്പെടുന്ന മേഖലകളില്‍ തന്റേതായ കഴിവ് പ്രകടിപ്പിക്കാനും പ്രശസ്തിക്കും യോഗമുണ്ട്. സ്ഥാനമാനങ്ങള്‍ക്കും സ്ഥാനചലനങ്ങള്‍ക്കും ഒരുപോലെ സാധ്യതയുള്ള സമയമാണ്. ഗവേഷണരംഗത്ത് പ്രവര്‍ത്തിക്കുന്നവര്‍ക്കും അദ്ധ്യാപക രംഗത്തുള്ളവര്‍ക്കും ശോഭിക്കാവുന്ന സമയമാണ്.

പുണര്‍തം 4-ാം പാദം, പൂയം, ആയില്യം നാളുകള്‍

നല്ല പ്രവൃത്തികള്‍ക്കായി ധനച്ചെലവു വരുന്ന കാലമാണിത്. ഗൃഹാരംഭപ്രവര്‍ത്തനങ്ങള്‍, യാത്രകള്‍, ഭവനസംബന്ധമായ ചെലവുകള്‍ തുടങ്ങിയവയ്ക്ക് സാധ്യത ഏറെയുണ്ട്. കലാസാഹിത്യരംഗങ്ങളിലുള്ളവര്‍ക്ക് ഗുണകരമായ സമയമാണ്. സാമൂഹ്യപ്രസക്തിയുള്ള വിഷയങ്ങളില്‍ ഏര്‍പ്പെടുന്നവര്‍ക്ക് പ്രശസ്തിക്ക് യോഗമുള്ള സമയംകൂടിയാണിത്.

മകം, പൂരം, ഉത്രം 1-ാം പാദം

ഈ നക്ഷത്രക്കാര്‍ക്ക് ഈശ്വരാനുഗ്രഹമുള്ള കാലമാണിത്. ഗവേഷണരംഗത്തുള്ളവര്‍ക്ക് വളരെ ഗുണപ്രദമായ കാലമാണ്. ചിത്രകല, ദാരുശില്പനിര്‍മാണം, വാസ്തുമേഖലകള്‍ എന്നിവയിലുള്ളവര്‍ക്കും ഈയാഴ്ച വളരെ ഗുണകരമാണ്.

ഉത്രം 2, 3, 4 പാദങ്ങള്‍, അത്തം, ചിത്ര 1, 2, പാദം

നൂതന തൊഴില്‍ദാതാക്കളുമായി സംസര്‍ഗം, ധര്‍മാര്‍ത്ഥങ്ങളായ ഗ്രന്ഥങ്ങളില്‍ താല്പര്യം, പുണ്യതീര്‍ത്ഥ സ്‌നാനാദിഗുണം, നൂതന ഉദ്യോഗലബ്ധി, പ്രശസ്തി ഇത്യാദികള്‍ക്ക് യോഗമുണ്ട്.

ചിത്ര 3, 4 പാദങ്ങള്‍, ചോതി, വിശാഖം 1, 2, 3 പാദങ്ങള്‍

ഈ നക്ഷത്രക്കാര്‍ക്ക് വളരെ ഗുണകരമായ ആഴ്ചയാണിത്. എന്‍ജിനീയറിങ്ങ്, കൃഷി, വിദേശവാസം, വിവാഹം എന്നിവയ്ക്ക് സാധ്യത ഏറിയ കാലമാണിത്. ക്രയവിക്രയങ്ങള്‍ക്കും ഈ മാസം ഗുണകരമാണ്.

വിശാഖം 4-ാം പാദം, അനിഴം, തൃക്കേട്ട നക്ഷത്രങ്ങള്‍

ഇവര്‍ക്ക് ഈ ആഴ്ചയും അത്ര ഗുണകരമല്ല. നൂതനപദ്ധതികള്‍ ആരംഭിക്കുന്നതിന് തടസ്സങ്ങള്‍ക്ക് സാധ്യത കൂടുതലാണ്. കൃഷിനാശം, അകാരണഭയം, സഹായികളില്‍നിന്ന് തിക്താനുഭവങ്ങള്‍, നാശനഷ്ടങ്ങള്‍ എന്നിവയ്ക്ക് സാധ്യതയുണ്ട്.