തേൻ ചൂടാക്കിയാൽ വിഷം!

നിരവധി പോഷക​ഗുണങ്ങൾ അടങ്ങിയതാണ് തേൻ. ഭക്ഷണത്തിന്റെ രുചി കൂട്ടുന്നതു മുതൽ ഔഷധങ്ങളിലും തേൻ ഒരു അഭിവാജ്യ ഘടകമാണ്. എന്നാൽ ചൂടാക്കിയാൽ തേനിന്റെ ഈ സ്വഭാവങ്ങളെല്ലാം മാറി, അവ വിഷമയമാകുമെന്നാണ് ആയുർവേദ വിദ​ഗ്ധർ ചൂണ്ടിക്കാണിക്കുന്നത്.

തേൻ ചൂടാക്കുമ്പോൾ അതിൽ അടങ്ങിയ രാസഘടനയിൽ മാറ്റം വരികയും ഹൈഡ്രോക്സിമീഥൈൽ (HMF) എന്ന വിഷവസ്തു ഉത്പാദിപ്പിക്കുകയും ചെയ്യുന്നു. തേൻ ഉയർന്ന താപനിലയിൽ (60 ഡി​ഗ്രി സെൽഷ്യസ് അല്ലെങ്കിൽ 140 ഡി​ഗ്രി F ന് മുകളില്‍) ചൂടാക്കുമ്പോൾ HMF രൂപപ്പെടുന്നു. കൂടാതെ തേനിലെ പ്രധാനഘടകങ്ങളായ എൻസൈമുകൾ, ആന്റി ഓക്സിഡന്റുകൾ, ബയോ ആക്ടീവ് സംയുക്തങ്ങള്‍ എന്നിവയെ ചൂടു തട്ടുമ്പോൾ നശിപ്പിക്കുന്നു.

അതുകൊണ്ട് വിഷാംശം ഇല്ലാതിരിക്കാനും പോഷകഗുണം നഷ്ടപ്പെടാതിരിക്കാനും തേന്‍ ചൂടാക്കുന്നതോ തിളച്ച വെള്ളത്തില്‍ ഒഴിക്കുന്നതോ ഒഴിവാക്കുന്നതാണ് നല്ലത്. 40 ഡി​ഗ്രി സെൽഷ്യസിന് താഴെ ചൂടാക്കുന്നത് അപകടമുണ്ടാക്കില്ല. സംസ്കരിച്ച തേൻ പാസ്ചറൈസ് ചെയ്ത് ഫിൽറ്റർ ചെയ്യാറുണ്ട്. ഇത് തേനിലെ അണുക്കളും ബാക്ടീരിയകളും നശിക്കാൻ സഹായിക്കുമെങ്കിലും ഈ പ്രക്രിയയിലൂടെ തേനിലെ ചില ഗുണങ്ങള്‍ നഷ്ടപ്പെടുന്നുണ്ടത്രേ.

ശ്രദ്ധിക്കേണ്ട കാര്യങ്ങള്‍

• ഉയര്‍ന്ന താപനിലയില്‍ തേന്‍ ചൂടാക്കരുത്. ചൂടുവെള്ളത്തില്‍ തേന്‍ ചേര്‍ത്ത് കഴിക്കുന്നവര്‍ വെളളത്തിന്റെ ചൂട് അല്‍പ്പം കുറയുമ്പോള്‍ തേന്‍ ചേര്‍ക്കുക.

• സ്മൂത്തികള്‍, സാലഡ് ഡ്രസിംഗുകള്‍ എന്നിവയില്‍ ചൂട് ഇല്ലാതെ തേന്‍ ഉപയോഗിക്കുക.

• തേന്‍ അതിന്റെ സാധാരണ നിലയില്‍ കഴിക്കുന്നതാണ് ഏറ്റവും ഉത്തമം. തൈര്, ഓട്‌സ്, പഴങ്ങള്‍ എന്നിവയില്‍ തേന്‍ ചേര്‍ത്ത് കഴിക്കാം. സാധാരണ തേനില്‍ എന്‍സൈമുകളും ആന്റിഓക്‌സിഡന്റുകളും ധാരാളമായി അടങ്ങിയിട്ടുണ്ട്.