തലശ്ശേരി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ രാജിവയ്ക്കണമെന്ന് ആവശ്യപ്പെട്ട് ഇന്ത്യ മുന്നണി നേതാക്കൾ ന്യൂഡൽഹിയിൽ നടത്തിയ പ്രതിഷേധത്തിന് നേരെ ഉണ്ടായ പൊലീസ് അതിക്രമത്തിൽ പ്രതിഷേധിച്ച് തലശ്ശേരി നഗരത്തിൽ യൂത്ത് ലീഗ് നടത്തിയ റോഡ് ഉപരോധത്തിനിടെ സംഘർഷം. സമരത്തിന് നേതൃത്വം നൽകിയ അഞ്ച് യൂത്ത് ലീഗ് നേതാക്കളെ തലശ്ശേരി ടൗൺ പൊലീസ് അറസ്റ്റ് ചെയ്തു. മുസ്ലിം യൂത്ത് ലീഗ് കണ്ണൂർ ജില്ലാ വൈസ് പ്രസിഡന്റ് തസ്ലീം മണിയാട്ട്, തലശ്ശേരി മണ്ഡലം പ്രസിഡന്റ് റമീസ് നരസിംഹ, ജനറൽ സെക്രട്ടറി റൂവൈസ് ഉബൈസ്, അസറുദ്ദീൻ കണ്ണോത്ത് പള്ളി, മുനീർ കൈവട്ടം എന്നിവരെയാണ് പൊലീസ് അറസ്റ്റ് ചെയ്ത് നീക്കിയത്.

നഗരത്തിലെ പ്രധാന പാത ഉപരോധിച്ച് പ്രവർത്തകർ റോഡിൽ കുത്തിയിരുന്ന് മുദ്രാവാക്യം വിളിച്ചതോടെ ഇതുവഴിയുള്ള വാഹന ഗതാഗതം പൂർണ്ണമായി തടസ്സപ്പെട്ടു. റോഡിൽ ഗതാഗതക്കുരുക്ക് രൂക്ഷമായതോടെ പ്രവർത്തകരെ ബലംപ്രയോഗിച്ച് നീക്കാൻ പൊലീസ് ശ്രമിച്ചതാണ് സംഘർഷത്തിൽ കലാശിച്ചത്. പോലീസും പ്രവർത്തകരും തമ്മിൽ ഉന്തും തള്ളുമുണ്ടായി. ഒടുവിൽ നേതാക്കളെ അറസ്റ്റ് ചെയ്ത് പൊലീസ് വാഹനത്തിലേക്ക് മാറ്റിയ ശേഷമാണ് പ്രദേശത്ത് ഗതാഗതം പുനഃസ്ഥാപിച്ചത്.