ഡ്രോൺ പറത്തി കാർഷിക വിപ്ലവം സൃഷ്ടിച്ച് കാസർകോട്ടെ 'ഡ്രോൺ ദീദിമാർ'; കൂട്ടായി 'ആൻഡ്രോയിഡ് കുഞ്ഞപ്പൻമാരും'

കാസർകോട്: കാസർകോട്ടെ പാടശേഖരങ്ങളിലും പച്ചക്കറിത്തോട്ടങ്ങളിലും ഇപ്പോൾ ഡ്രോണുകളുടെ ഹുങ്കാര ശബ്ദമാണ്. കർഷകർക്ക് കൈത്താങ്ങായി ആകാശത്ത് വിപ്ലവം സൃഷ്ടിക്കുന്നത് മറ്റാരുമല്ല, ജില്ലയിലെ 7 കുടുംബശ്രീ പ്രവർത്തകരായ 'ഡ്രോൺ ദീദി'മാരാണ് . കേന്ദ്ര സർക്കാരിന്റെ 'നമോ ഡ്രോൺ ദീദി' പദ്ധതിയിലൂടെ ചെന്നൈയിൽ നിന്ന് പൈലറ്റ് ലൈസൻസും സ്വന്തമായി ഡ്രോണുകളും നേടിയ ഈ വനിതകൾ 2026-ൽ എത്തുമ്പോൾ ജില്ലയിലെ കർഷകരുടെ ഏറ്റവും വലിയ ആശ്രയമായി മാറിയിരിക്കുകയാണ്.

ഇതുവരെ 256 കർഷകർക്കായി 600-ലധികം ഏക്കർ കൃഷിയിടത്തിലാണ് ഇവർ ഡ്രോൺ വഴി വളവും കീടനാശിനിയും തളിച്ചത്. തങ്ങളുടെ കാർഷിക ഡ്രോണുകളെ മലയാളത്തിലെ പ്രശസ്ത സിനിമയെ അനുസ്മരിപ്പിച്ച് 'ആൻഡ്രോയിഡ് കുഞ്ഞപ്പൻമാർ' എന്നാണ് ഈ വനിതകൾ സ്നേഹത്തോടെ വിളിക്കുന്നത്.

10 മിനിറ്റിൽ ഒരു ഏക്കർ; വിളവ് വർദ്ധിച്ചതായി കർഷകർ

"ദിവസങ്ങളോളം കഠിനാധ്വാനം ചെയ്യേണ്ടി വരുന്ന മരുന്ന് തളി ജോലി വെറും 10 മിനിറ്റ് കൊണ്ട് ഈ ഡ്രോൺ ദീദിമാർ തീർക്കും," പൊയിനാച്ചിയിലെ നെൽകർഷകയായ ശ്രീവിദ്യ സാക്ഷ്യപ്പെടുത്തുന്നു. കഴിഞ്ഞ സീസണിൽ തന്റെ തണ്ണിമത്തൻ കൃഷിക്ക് ഇവരുടെ സേവനം ശ്രീവിദ്യ ഉപയോഗിച്ചിരുന്നു. മുൻപ് ഏക്കറിന് 7 ടൺ വിളവ് കിട്ടിയിരുന്ന സ്ഥാനത്ത് ഡ്രോൺ വഴി കൃത്യമായി വളം തളിച്ചതോടെ ഇത്തവണ 10 ടൺ വിളവാണ് ലഭിച്ചത്. തൊഴിലാളി ക്ഷാമം രൂക്ഷമായ കാലത്ത് ഏക്കറിന് വെറും 500 രൂപയും ഡ്രോൺ എത്തിക്കാനുള്ള ചെറിയൊരു ട്രാൻസ്‌പോർട്ട് ചാർജും മാത്രമാണ് ഇവർ ഈടാക്കുന്നത്.

നീതി എ.വി (ബേഡകം), സക്കീന പി.എസ് (മുളിയാർ), ശ്രുതി പി.എസ് (പനത്തടി), രജനി കെ (പൊയിനാച്ചി), ജിജി സതീഷ് (പൊയിനാച്ചി), ശ്രുതി അനിൽ (ചെമ്മനാട്), സിൽന കെ.വി (അജാനൂർ) എന്നിവരടങ്ങുന്നതാണ് ഈ ഏഴംഗ സംഘം. തങ്ങൾ ആദ്യം കർഷകരാണെന്നും ലീസ് എടുത്ത ഭൂമിയിലാണ് സ്വന്തമായി കൃഷി ചെയ്യുന്നതെന്നും സക്കീന പറയുന്നു. കുടുംബശ്രീയിലെ കമ്മ്യൂണിറ്റി റിസോഴ്സ് പേഴ്സൺമാരായി (CRP) പ്രവർത്തിക്കുന്നതിനിടയിലാണ് ഇവർ ഡ്രോൺ പൈലറ്റ് പരിശീലനത്തിനായി തിരഞ്ഞെടുക്കപ്പെട്ടത്.

'ആൻഡ്രോയിഡ് കുഞ്ഞപ്പൻമാരുടെ' കുറുമ്പുകൾ സ്വന്തമായി തീർക്കും

ഒരു വശത്ത് വലിയ സാങ്കേതിക മുന്നേറ്റമാണെങ്കിലും പ്രായോഗികമായി ചില പ്രതിസന്ധികളും ഇവർ നേരിടുന്നുണ്ട്. 10 കിലോഗ്രാം മരുന്ന് വഹിക്കാൻ ശേഷിയുള്ള ഭാരമേറിയ ഡ്രോണുകൾ ആയതിനാൽ ഇവയുടെ ബാറ്ററി 10 മിനിറ്റ് മാത്രമേ നിൽക്കൂ. വലിയ കൃഷിയിടങ്ങളിൽ കൂടുതൽ ബാറ്ററി പവർ ആവശ്യമായി വരുന്നതിനാൽ ഏഴുപേരും ഒരുമിച്ചാണ് മിക്കപ്പോഴും ജോലിക്കിറങ്ങുന്നത്. ജിപിഎസ് കണക്ഷൻ നഷ്ടപ്പെട്ടാൽ ഡ്രോൺ പെട്ടെന്ന് താഴേക്ക് പതിക്കുന്നതുപോലുള്ള കുറുമ്പുകൾ ഇവരുടെ 'കുഞ്ഞപ്പൻമാർ' കാണിക്കാറുണ്ട്. എന്നാൽ റോട്ടർ ബ്ലേഡുകൾ മാറുന്നത് പോലുള്ള ചെറിയ സാങ്കേതിക തകരാറുകൾ ഈ വനിതകൾ തന്നെ സ്വന്തമായി പരിഹരിക്കും. വലിയ അറ്റകുറ്റപ്പണികൾക്ക് മാത്രമാണ് സർവീസ് സെന്ററുകളെ ആശ്രയിക്കുന്നത്. കേരളത്തിലുടനീളമുള്ള 48 ഡ്രോൺ ദീദിമാരുമായും തെലങ്കാന, തമിഴ്‌നാട്, ആന്ധ്രപ്രദേശ് എന്നിവിടങ്ങളിലെ സഹപ്രവർത്തകരുമായും ഇവർ നിരന്തരം ആശയവിനിമയം നടത്തുന്നുണ്ട്.

വെല്ലുവിളിയായി ചരിവുകളും കവുങ്ങിൻ തോട്ടങ്ങളും

സമതലമായ നെൽപാടങ്ങളിൽ ഡ്രോൺ പറത്തുന്നത് വളരെ എളുപ്പമാണെന്നും വൈദ്യുത പോസ്റ്റുകൾ മാത്രമാണ് ഇവിടെ ശ്രദ്ധിക്കേണ്ടതെന്നും ശ്രുതി പറയുന്നു. എന്നാൽ ജില്ലയിലെ കവുങ്ങിൻ തോട്ടങ്ങളിൽ നിന്നും റബ്ബർ തോട്ടങ്ങളിൽ നിന്നും ഒട്ടേറെ ഫോൺ കോളുകൾ വരുന്നുണ്ടെങ്കിലും വലിയ ഡ്രോണുകൾക്ക് കവുങ്ങുകൾക്കിടയിലൂടെ സുഗമമായി സഞ്ചരിക്കാൻ കഴിയില്ല. റബ്ബർ മരങ്ങൾ ചെറുതായിരിക്കുമ്പോൾ തളിക്കാൻ കഴിയുമെങ്കിലും അവ വളരുന്നതോടെയും കുന്നിൻചരിവുകളിലെ തോട്ടങ്ങളിലും ഡ്രോൺ ഓപ്പറേഷൻ കടുത്ത വെല്ലുവിളിയാണെന്ന് രജനി വ്യക്തമാക്കുന്നു. എങ്കിലും പ്രതിസന്ധികളെ കാറ്റിൽപ്പറത്തി കാസർകോടൻ കാർഷിക മേഖലയ്ക്ക് പുതുഊർജ്ജം പകരുകയാണ് ഈ വനിതാ പൈലറ്റുമാർ.