തൃശ്ശൂർ: പീച്ചി വന്യജീവി ഡിവിഷന് കീഴിലുള്ള വനമേഖലകളിൽ നടത്തിയ നാലുദിവസത്തെ സമഗ്ര ജന്തുജാല സർവേയിൽ പക്ഷികൾ, ചിത്രശലഭങ്ങൾ, തുമ്പികൾ എന്നീ മൂന്ന് പ്രധാന വിഭാഗങ്ങളിലായി 395 ഇനം ജീവികളെ രേഖപ്പെടുത്തി. ചിമ്മിനി വന്യജീവി സങ്കേതം, പീച്ചി-വാഴാനി വന്യജീവി സങ്കേതം, ചൂലന്നൂർ മയിൽ സങ്കേതം എന്നിവിടങ്ങളിൽ ഒക്ടോബർ എട്ടു മുതൽ 11 വരെയാണ് വിപുലമായ സർവേ നടന്നത്. മുൻ പട്ടികകളുമായി താരതമ്യം ചെയ്യുമ്പോൾ ഈ പ്രധാന വിഭാഗങ്ങളിൽ മാത്രം 36 പുതിയ ഇനം ജീവികളെ കണ്ടെത്തി രേഖപ്പെടുത്താൻ സർവേയിലൂടെ സാധിച്ചു. കേരള വനം-വന്യജീവി വകുപ്പും തിരുവനന്തപുരത്തെ ട്രാവൻകൂർ നേച്ചർ ഹിസ്റ്ററി സൊസൈറ്റിയും സംയുക്തമായാണ് പത്ത് ബേസ് ക്യാമ്പുകൾ കേന്ദ്രീകരിച്ച് നിരീക്ഷണം നടത്തിയത്.

നിരീക്ഷണത്തിൽ പക്ഷികളുടെ വിഭാഗത്തിൽ ആകെ 165 ഇനങ്ങളെയാണ് കണ്ടെത്തിയത്. ഇതിൽ മുൻ പട്ടികകളിൽ ഇല്ലാതിരുന്ന എട്ട് പുതിയ ഇനങ്ങളും ഉൾപ്പെടുന്നു. മലബാർ ലാർക്ക് (Galerida malabarica), പർപ്പിൾ ഹെറോൺ (Ardea purpurea), സൈബീരിയൻ സ്റ്റോൺചാറ്റ് (Saxicola maurus), ഈസ്റ്റേൺ യെല്ലോ വാഗ്ടെയിൽ (Motacilla tschutschensis) എന്നിവയാണ് പുതുതായി ചേർത്തവയിൽ ശ്രദ്ധേയമായവ. ഇതിനുപുറമെ, പശ്ചിമഘട്ടത്തിൽ മാത്രം കാണപ്പെടുന്ന അപൂർവ്വ പക്ഷികളായ മലബാർ ഗ്രേ ഹോൺബിൽ (Ocyceros griseus), മലബാർ പാരക്കീറ്റ് (Psittacula columboides), വൈറ്റ് ബെല്ലിഡ് ട്രീ പൈ (Dendrocitta leucogastra), മലബാർ ബാർബെറ്റ് (Psilopogon malabaricus), ക്രിംസൺ-ബാക്ക്ഡ് സൺബേഡ് (Leptocoma minima) എന്നീ അഞ്ച് തദ്ദേശീയ ഇനങ്ങളുടെ സാന്നിധ്യവും സ്ഥിരീകരിച്ചു.

ചിത്രശലഭങ്ങളുടെ വിഭാഗത്തിൽ 174 ഇനങ്ങളെ രേഖപ്പെടുത്തിയപ്പോൾ, മുൻ പട്ടികകളേക്കാൾ 22 ഇനങ്ങളെ അധികമായി കണ്ടെത്താനായി. സഹ്യാദ്രി പ്ലെയിൻ പഫിൻ (Appias indra shiva), കോമൺ മാപ്പ് (Cyrestis thyodamas indica), സഹ്യാദ്രി കളർ സർജന്റ് (Athyma inara sahyadriensis), ബൈകളർ ഏസ് (Halpemorpha hyrtacus), ഓറഞ്ച്-സ്പോട്ടഡ് ഏസ് (Theressa honorei) എന്നിവയാണ് പുതുതായി രേഖപ്പെടുത്തിയ പ്രധാന ചിത്രശലഭങ്ങൾ. മലബാർ ബാൻഡഡ് പീക്കോക്ക് (Papilio buddha), മലബാർ റോസ് (Pachliopta pandiyana), സഹ്യാദ്രി ലേസ് വിങ് (Cethosia mahratta), സതേൺ ബ്ലൂ ഓക്ക്ലീഫ് (Kallima horsfieldii), ട്രാവൻകൂർ ഈവനിങ് ബ്രൗൺ (Parantirrhoea marshalli), ശിവ സൺബീം (Curetis siva) എന്നിവയുൾപ്പെടെ പശ്ചിമഘട്ടത്തിന് മാത്രമായുള്ള 11 തദ്ദേശീയ പൂമ്പാറ്റകളെയും കണ്ടെത്തി.

തുമ്പികളിൽ 56 ഇനങ്ങളെ രേഖപ്പെടുത്തിയതിൽ ആറെണ്ണം മുൻപ് പട്ടികയിൽ ഇല്ലാത്തവയാണ്. ഇന്ത്യൻ എമറാൾഡ് (Hemicordulia asiatica), കൊഡഗു ക്ലബ്‌ടെയിൽ (Gomphidia kodaguensis), സ്പോട്ടഡ് ടോറന്റ്-ഹോക്ക് (Epophthalmia frontalis binocellata), കൂർഗ് ബാംബുടെയിൽ (Caconeura ramburi), മലബാർ ബാംബുടെയിൽ (Melanoneura bilineata), ബ്ലഡ്-സ്പോട്ടഡ് റീഡ്‌ടെയിൽ (Protosticta sanguinostigma) എന്നിവയാണ് പുതുതായി ഉൾപ്പെടുത്തിയ തുമ്പികൾ. റൂബി-ടെയിൽഡ് ഹോക്കലൈറ്റ് (Epithemis mariae), ഫ്രേസേഴ്സ് ടോറന്റ്-ഡാർട്ട് (Euphaea fraseri), ട്രാവൻകൂർ ബാംബുടെയിൽ (Esme mudiensis), സാഫ്രൺ റീഡ്‌ടെയിൽ (Indosticta deccanensis), പൈഡ് റീഡ്‌ടെയിൽ (Protosticta gravelyi) ഉൾപ്പെടെ പശ്ചിമഘട്ടത്തിന്റെ എട്ട് തദ്ദേശീയ തുമ്പി ഇനങ്ങളെയും രേഖപ്പെടുത്തിയിട്ടുണ്ട്.

ആകെ രേഖപ്പെടുത്തിയവയിൽ 24 ഇനങ്ങൾ പശ്ചിമഘട്ട തദ്ദേശീയ ജീവികളാണ്. ഇതിൽ അഞ്ച് പക്ഷികളും 11 ചിത്രശലഭങ്ങളും എട്ട് തുമ്പികളും ഉൾപ്പെടുന്നു. ഈ മൂന്ന് പ്രധാന വിഭാഗങ്ങൾക്ക് പുറമെ 52 ഇനം നിശാശലഭങ്ങൾ, 22 ഇനം ഉറുമ്പുകൾ, അഞ്ചിനം ചീവീടുകൾ, മുപ്പതോളം ഇനം ചിലന്തികൾ എന്നിവയും സർവേയിൽ അടയാളപ്പെടുത്തി. കൂടാതെ കടുവ (Panthera tigris), പുള്ളിപ്പുലി (Panthera pardus), ആനക്കൂട്ടങ്ങൾ (Elephas maximus), കാട്ടുപോത്ത് (Bos gaurus) തുടങ്ങിയ വൻകിട സസ്തനികളുടെ സാന്നിധ്യവും കണ്ടെത്തിയത് ഈ വനമേഖലയുടെ മികച്ച ജൈവസുരക്ഷയെയും പാരിസ്ഥിതിക സന്തുലിതാവസ്ഥയെയുമാണ് അടിവരയിടുന്നത്.

പീച്ചി വന്യജീവി ഡിവിഷൻ വൈൽഡ്‌ലൈഫ് വാർഡൻ എം.കെ. രഞ്ജിത്തിന്റെ നേതൃത്വത്തിലാണ് സർവേ പൂർത്തിയാക്കിയത്. പീച്ചി അസിസ്റ്റന്റ് വൈൽഡ്‌ലൈഫ് വാർഡൻ ടി.എൻ. രാജേഷ്, ചിമ്മിനി അസിസ്റ്റന്റ് വൈൽഡ്‌ലൈഫ് വാർഡൻ കെ.എം. മുഹമ്മദ് റാഫി, വൈൽഡ്‌ലൈഫ് അസിസ്റ്റന്റ് സലീഷ് മേനാച്ചേരി എന്നിവർ വനംവകുപ്പിന്റെ ഏകോപനം നിർവ്വഹിച്ചു. സാങ്കേതിക ഏകോപനത്തിനും ശാസ്ത്രീയ വിവരസമാഹരണത്തിനും ഡോ. കലേഷ് സദാശിവൻ, ടിഎൻഎച്ച്എസ് റിസർച്ച് അസോസിയേറ്റ് അനില വി.എം. എന്നിവർ നേതൃത്വം നൽകി. തെക്കുപടിഞ്ഞാറൻ കാലവർഷത്തിനുശേഷം നടത്തിയ ഈ സർവേയിലെ കണ്ടെത്തലുകൾ വനത്തിലെ ജീവജാലങ്ങളുടെ മാറ്റങ്ങൾ വിലയിരുത്താനുള്ള അടിസ്ഥാന രേഖയായി മാറും. മഴക്കാലത്തിന് മുൻപുള്ള ജീവികളുടെ പ്രജനനവും ആവാസവ്യവസ്ഥയും താരതമ്യം ചെയ്യുന്നതിനായി തുടർച്ചയായ അനുബന്ധ സർവേകളും സംഘടിപ്പിക്കാൻ തീരുമാനിച്ചിട്ടുണ്ട്.