ജോഷിയുടെ  ബിഗ് ബജറ്റ് ചിത്രത്തിൽ ജയസൂര്യ നായകൻ; 'സ്വപ്‌ന സിനിമ' എന്ന് താരം 

ജോഷിയുടെ സംവിധാനത്തിൽ ഒരുങ്ങുന്ന ബിഗ് ബജറ്റ് ചിത്രത്തിൽ ജയസൂര്യ നായകൻ. താരത്തിൻറെ ജന്മദിനത്തോട് അനുബന്ധിച്ചാണ് ചിത്രത്തിൻറെ  പ്രഖ്യാപനം നടന്നത്. ഇന്ത്യയിലും വിദേശത്തുമായാണ് ചിത്രീകരണം നടക്കുക. 

സ്വപ്‌ന സിനിമ എന്നാണ് ചിത്രത്തെ ജയസൂര്യ വിശേഷിപ്പിച്ചിരിക്കുന്നത്. ജോഷിക്കൊപ്പം ഒരു ചിത്രത്തിനായി വളരെ കാലങ്ങളായി കാത്തിരിക്കുകയായിരുന്നെന്നും ഒടുവില്‍ വളരെ അതിശയിപ്പിക്കുന്ന ഒരു പ്രമേയം തന്നെ വന്നെത്തിയെന്നും ഫസ്റ്റ് ലുക്ക് പോസ്റ്റര്‍ പങ്കുവച്ച് ജയസൂര്യ കുറിച്ചു. നിഷാദ് കോയയാണ് ചിത്രത്തിന്റെ തിരക്കഥ. മാമാങ്കത്തിന് ശേഷം വേണു കുന്നപ്പിള്ളി നിർമിക്കുന്ന ചിത്രമാണിത്. ചിത്രത്തെക്കുറിച്ചുള്ള കൂടുതൽ വിവരങ്ങൾ ഉടൻ പുറത്തുവിടും. 

ഈശോ,  മേരി ആവാസ് സുനോ, കത്തനാർ തുടങ്ങിയ ചിത്രങ്ങളാണ് ജയസൂര്യ അഭിനയിച്ച് റിലീസിന് തയ്യാറാകുന്നത്.