ഷെയ്‌ൻ നിഗമിനെ നായകനാക്കി ടി കെ രാജീവ് കുമാർ സംവിധാനം ചെയ്യുന്ന 'ബർമുഡ' എന്ന ചിത്രത്തിന്റെ ടൈറ്റിൽ ലുക്ക് പുറത്തുവിട്ടു. നാളെയാണ് സിനിമയുടെ ചിത്രീകരണം തുടങ്ങുന്നത്. തിരുവനന്തപുരമാണ് ലൊക്കേഷൻ. ഇന്ദുഗോപന്‍ എന്ന കഥാപാത്രമാണ് ഷെയ്ൻ അവതരിപ്പിക്കുന്നത്. സബ് ഇന്‍സ്‌പെക്ടര്‍ ജോഷ്വ ആണ് വിനയ് ഫോർട്ടിന്റെ കഥാപാത്രം. 

24 ഫ്രെയിംസിൻ്റെ ബാനറിൽ സൂരജ് സി കെ, ബിജു സി ജെ, ബാദുഷ എൻ എം എന്നിവർ ചേർന്നാണ് ചിത്രം നിർമ്മിക്കുന്നത്. വിനയ് ഫോർട്ട്, ഹരീഷ് കണാരൻ, സൈജു കുറുപ്പ്, സുധീർ കരമന, മണിയൻപിള്ള രാജു, ഇന്ദ്രൻസ്, നിരഞ്ജന അനൂപ്, ഗൗരി നന്ദ, നൂറിൻ ഷെറീഫ്, സാജൻ സുധർശൻ, ദിനേഷ് പണിക്കർ,കോട്ടയം നസീർ,ശ്രീകാന്ത് മുരളി, നന്ദു, ഷൈനി സാറ തുടങ്ങിയവരും ചിത്രത്തിൽ അഭിനയിക്കുന്നുണ്ട്. 

തീര്‍ത്തും നര്‍മ്മ പശ്ചാത്തലത്തിൽ പറയുന്ന സിനിമയുടെ രചന നിർവഹിച്ചിരിക്കുന്നത് നവാഗതനായ കൃഷ്ണദാസ് പങ്കിയാണ്.