'ആ ഷോർട്ട് ഫിലിം കണ്ടപ്പോൾ തന്നെ അഭിനയത്തിൽ പ്രത്യേകത തോന്നി'; 'ബാലനി'ലേക്ക് ​ഗിരീഷ് എ ഡി വന്നതിനെക്കുറിച്ച് ചിദംബരം

'തണ്ണീർമത്തൻ ദിനങ്ങൾ' എന്നൊരൊറ്റ ചിത്രം മതി ​ഗിരീഷ് എഡി എന്ന സംവിധായകനെ മലയാളികൾക്ക് എക്കാലവും ഓർത്തിരിക്കാൻ. 'തണ്ണീർമത്തൻ ദിനങ്ങൾ' ബോക്സ് ഓഫീസിൽ ഹിറ്റായതോടെ 'സൂപ്പർ ശരണ്യ', 'പ്രേമലു' എന്നീ സൂപ്പർ ഹിറ്റ് ചിത്രങ്ങളും ​ഗിരീഷ് ഒരുക്കി. ​ഗിരീഷിന്റെ സിനിമകൾ മലയാള സിനിമാ പ്രേക്ഷകർക്ക് ഒരു ആ​ഘോഷമാണ്.

നിവിൻ പോളിയെ നായകനാക്കി ഒരുക്കുന്ന 'ബത്‌ലഹേം കുടുംബയൂണിറ്റ്' ആണ് ​ഗിരീഷിന്റേതായി റിലീസിനൊരുങ്ങുന്ന ചിത്രം. ഇതിനിടെ ചിദംബരം സംവിധാനം ചെയ്ത 'ബാലൻ' എന്ന ചിത്രത്തിൽ അഭിനയിച്ചിട്ടുമുണ്ട് ​ഗിരീഷ്. ബാലനിൽ ഒരു പൊലീസുദ്യോ​ഗസ്ഥനായാണ് ​ഗിരീഷ് എത്തുന്നത്. ചിത്രത്തിലേക്ക് ​ഗിരീഷ് എത്തിയത് എങ്ങനെയാണെന്ന് പറയുകയാണ് സംവിധായകൻ ചിദംബരം.

"അത് ​ഗണപതിയുടെ കണ്ടുപിടിത്തമായിരുന്നു. ​ഗിരീഷിന്റെ ഒരു ഷോർട്ട് ഫിലിം എനിക്ക് ​ഗണപതി കാണിച്ചു തന്നിരുന്നു. അതുകണ്ടപ്പോൾ അ​ദ്ദേഹത്തിന്റെ അഭിനയം കുറച്ച് പ്രത്യേകതയുള്ളതാണെന്ന് എനിക്ക് തോന്നി.

അദ്ദേഹം കഥാപാത്രത്തെ അവതരിപ്പിക്കുന്നതും ഡയലോ​ഗ് ഡെലിവറിയുമൊക്കെ കണ്ടപ്പോൾ തന്നെ എനിക്ക് കുറച്ച് പ്രത്യേകത തോന്നിയിരുന്നു. നമ്മൾ നിത്യജീവിതത്തിൽ കാണുന്ന ഇഷ്ടം പോലെ പൊലീസുകാരുണ്ട്. അവരെല്ലാവരും ചിലപ്പോൾ ഫിറ്റായി നിൽക്കുന്നവരല്ല.

ചിലർ നന്നായി പഠിക്കാൻ താല്പര്യമുള്ളവരായിരിക്കും. അങ്ങനെ പല ടൈപ്പിലുള്ള ഉദ്യോ​ഗസ്ഥരുണ്ട്. അപ്പോൾ അത്തരത്തിൽ വ്യത്യസ്തമായ ഒരു പൊലീസുദ്യോ​ഗസ്ഥനെ എനിക്ക് കാണിക്കണമെന്നുണ്ടായിരുന്നു. അങ്ങനെയാണ് ​ഗിരീഷിലേക്ക് എത്തുന്നത്".- മീഡിയ വണ്ണിന് നൽകിയ അഭിമുഖത്തിൽ ചിദംബരം പറഞ്ഞു.