'കാലങ്ങൾക്ക് ശേഷം ഇന്ദ്രുവിനെ കണ്ടു', മേഘ്നയേയും ജൂനിയർ ചീരുവിനേയും കാണാൻ എത്തി ഇന്ദ്രജിത്ത്

മേഘ്ന രാജിനേയും മകനേയും കാണാൻ വീട്ടിലെത്തി നടൻ ഇന്ദ്രജിത്ത്. ഇൻസ്റ്റ​ഗ്രാമിലൂടെ മേഘ്ന തന്നെയാണ് ഇന്ദ്രജിത്തിന്റെ വരവിനെക്കുറിച്ച് ആരാധകരെ അറിയിച്ചത്. ഇന്ദ്രജിത്തിനൊപ്പമുള്ള ചിത്രവും താരം പങ്കുവെച്ചു. വർഷങ്ങൾക്ക് ശേഷം സുഹൃത്തിനെ കാണാൻ കഴിഞ്ഞതിന്റെ സന്തോഷവും താരം പങ്കുവെച്ചു. 

'കുറച്ചു വൈകിയാണ് ഇത് ഇടുന്നത്. കാലങ്ങള്‍ക്ക് ശേഷം അവസാനം ഞങ്ങള്‍ കണ്ടുമുട്ടി. പൂര്‍ണിമയേയും ഉടന്‍ കാണാനാവുമെന്ന് പ്രതീക്ഷിക്കുന്നത്. മനോഹരമായ സമയമായിരുന്നു അത്. ബിരിയാണി ഇഷ്ടമായെന്നാണ് പ്രതീക്ഷിക്കുന്നത്. ജൂനിയര്‍ ചീരുവിന് നിന്റെ കമ്പനി ഇഷ്ടമായി'- മേഘ്‌ന കുറിച്ചു. ബാംഗളൂരുവിലെ മേഘ്‌നയുടെ വീട്ടിലെത്തിയാണ് ഇന്ദ്രജിത്ത് അമ്മയേയും മകനേയും കണ്ടത്. മേഘ്നയ്ക്കും കുഞ്ഞിനും മാതാപിതാക്കൾക്കുമൊപ്പം നിൽക്കുന്ന ഇന്ദ്രജിത്താണ് ചിത്രത്തിൽ. 

മുല്ലമൊട്ടും മുന്തിരിച്ചാറും, പോപ്പിൻസ്, അപ്പ് ആൻഡ് ഡൗൺ തുടങ്ങിയ ചിത്രങ്ങളിൽ ഇന്ദ്രജിത്തും മേഘ്നയും ഒന്നിച്ച് അഭിനയിച്ചിട്ടുണ്ട്. കുറച്ചു നാളായി മലയാളത്തിൽ അത്ര സജീവമല്ലെങ്കിലും മലയാളം താരങ്ങളുമായി അടുത്ത സുഹൃത്ത് ബന്ധം സൂക്ഷിക്കുന്ന ആളാണ് മേഘ്ന. പ്രസവിച്ചു കിടന്ന സമയത്ത് താരത്തെ കാണാൻ നസ്രിയയും ഫഹദും ആശുപത്രിയിൽ എത്തിയിരുന്നു. താരത്തിന്റെ ഭർത്താവും നടനുമായ ചിരഞ്ജീവി സർജയുടെ മരണ സമയത്തും മേഘ്നയ്ക്ക് പിന്തുണയുമായി ഇവർ കൂടെയുണ്ടായിരുന്നു.